Numbers 30

Chinese TTVR (現代台語譯本羅馬字版)

← Chapter 29 Jump to: Chapter 31 →

1Mô͘-se hoan-hù Í-sek-lia̍t ta̍k-ê chi-cho̍k ê cho̍k-tiúⁿ, kóng, “Chiah-ê sī Siōng Chú ê bēng-lēng:

2Lâng nā tùi Siōng Chú hē-goān, á-sī chiù-chōa, tio̍h iok-sok ka-kī, m̄-thang sit-sìn, tio̍h chiàu i só͘ kóng--ê khì chòe.

3“Iáu tòa tī lāu-pē ê chhù ê siàu-lú, nā tùi Siōng Chú hē-goān beh iok-sok ka-kī,

4i ê lāu-pē thiaⁿ-tio̍h i hē ê goān kap iok-sok ka-kī ê ōe, nā bô piáu-sī hoán-tùi, i hē ê goān kap iok-sok ka-kī ê ōe chiū sêng-li̍p.

5I ê lāu-pē thiaⁿ--tio̍h hit-ji̍t, nā bô ún-chún, i hē ê goān kap iok-sok ka-kī ê ōe chiū bô sêng-li̍p; Siōng Chú ōe sià-bián i, in-ūi i ê lāu-pē bô ún-chún.

6“Siàu-lú chhut-kè, nā í-keng ū hē-goān, á-sī chi̍t-sî chhiong-tōng kóng-chhut iok-sok ka-kī ê ōe,

7i ê tiōng-hu thiaⁿ--tio̍h ê sî, nā bô piáu-sī hoán-tùi, i hē ê goān kap iok-sok ka-kī ê ōe chiū sêng-li̍p.

8I ê tiōng-hu thiaⁿ--tio̍h ê sî, nā bô tông-ì, chiū hòe-tû i hē ê goān kap i chi̍t-sî chhiong-tōng só͘ kóng-chhut iok-sok ka-kī ê ōe; Siōng Chú mā ōe sià-bián i.

9“Kóaⁿ-hū á-sī lî-hun ê hū-jîn-lâng só͘ hē ê goān kap iok-sok ka-kī ê ōe, lóng sêng-li̍p.

10“Hū-jîn-lâng tī tiōng-hu ê chhù hē-goān, á-sī chiù-chōa beh iok-sok ka-kī,

11tiōng-hu thiaⁿ--tio̍h, nā tiām-tiām bô kóng-ōe, bô hoán-tùi, i hē ê goān kap iok-sok ka-kī ê ōe chiū sêng-li̍p.

12M̄-kú, tiōng-hu thiaⁿ--tio̍h ê sî, nā kā i hē ê goān kap iok-sok ka-kī ê ōe hòe-tû, i kóng-chhut ê ōe chiū bô-hāu, in-ūi i ê tiōng-hu hoán-tùi; Siōng Chú mā ōe sià-bián i.

13I nā hē-goān á-sī chiù-chōa beh khek-khó͘ ka-kī, i ê tiōng-hu ū koân tông-ì á-sī hòe-tû.

14I ê tiōng-hu thiaⁿ--tio̍h liáu-āu, kúi ji̍t kú bô piáu-sī hoán-tùi, i hē ê goān kap iok-sok ka-kī ê ōe chiū sêng-li̍p, in-ūi i ê tiōng-hu tī thiaⁿ--tio̍h ê sî tiām-tiām bô kóng-ōe.

15Āu-lâi, i ê tiōng-hu nā kā i hē ê goān hòe-tû, chiū tio̍h tam-tng hū-jîn-lâng bô chiàu iok-sok ê chōe.”

16Í-siōng chiah-ê sī Siōng Chú hoan-hù Mô͘-se koan-hē tiōng-hu kap i ê bó͘, lāu-pē kap tòa tī i chhù--ni̍h ê siàu-lú tiong-kan só͘ tēng ê kui-lē.

← Chapter 29 Jump to: Chapter 31 →