Numbers 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Chiaⁿ--ge̍h, Í-sek-lia̍t -lâng choân-thé hōe-chiòng lâi kàu Sîm ê khòng-iá, tī Ka-te-su chat-iâⁿ. Bí-lī-an sí tī hia, chiū an-chòng tī hia.

2Hōe-chiòng bô chúi thang lim, chiū chū-chi̍p kong-kek Mô͘-se kap A-lûn.

3In khì kā Mô͘-se chhá, kóng, “Khó͘-bōe-tit goán ê tông-pau sí tī Siōng Chú bīn-chêng ê sî, goán mā chòe-hé sí-sí--leh.

4Lín sī-án-chóaⁿ kā Siōng Chú ê hōe-chiòng chhōa-lâi chit-ê khòng-iá, sī beh hō͘ goán kap goán ê cheng-siⁿ sí tī chia sī--bô?

5Lín sī-án-chóaⁿ chhōa goán chhut Ai-ki̍p, lâi kàu chit-ê pháiⁿ só͘-chāi? Goán tī chia bô só͘-chāi thang iā-chéng, thang chèng bû-hoa-kó, phû-tô, sia̍h-liû, koh bô chúi thang lim.”

6Mô͘-se kap A-lûn lī-khui hōe-chiòng, khì hōe-bō͘ mn̂g-kháu, phak tī thô͘-kha; Siōng Chú ê êng-kng tùi in hián-hiān.

7Siōng Chú tùi Mô͘-se kóng,

8“Lí khì kā iok-kūi thâu-chêng hit-ki koáiⁿ-á gia̍h--lâi, kap lí ê hiaⁿ-ko A-lûn tiàu-chi̍p hōe-chiòng, tī in ê ba̍k-chiu chêng bēng-lēng chio̍h-pôaⁿ chhut-chúi, chúi chiū ōe tùi chio̍h-pôaⁿ lâu--chhut-lâi, hō͘ hōe-chiòng kap in ê cheng-siⁿ lim.”

9Mô͘-se chiū chiàu Siōng Chú ê bēng-lēng, kā koáiⁿ-á gia̍h--lâi.

10Mô͘-se kap A-lûn chio hōe-chiòng khì chio̍h-pôaⁿ hia; Mô͘-se tùi in kóng, “Lín chiah-ê pōe-ge̍k ê lâng thiaⁿ leh, goán kiám tio̍h hō͘ chio̍h-pôaⁿ chhut-chúi hō͘ lín lim?”

11Mô͘-se gia̍h chhiú--ni̍h ê koáiⁿ-á, kā chio̍h-pôaⁿ kòng nn̄g ē, chiū ū chin chōe chúi lâu--chhut-lâi; hōe-chiòng kap in ê cheng-siⁿ lóng lim.

12Siōng Chú tùi Mô͘-se kap A-lûn kóng, “In-ūi lín m̄ sìn góa, bô tī Í-sek-lia̍t -lâng ê ba̍k-chiu chêng chun góa chòe sèng, só͘-í lín bōe-tàng chhōa chiah-ê hōe-chiòng ji̍p-khì góa beh sù hō͘ in ê tōe.”

13Chiah-ê chúi chiū kiò-chòe Bí-lī-pa chúi-chôaⁿ; in-ūi Í-sek-lia̍t -lâng kā Siōng Chú chhá; Siōng Chú chiū tùi in hián-bêng ka-kī sī sèng.

14Mô͘-se tùi Ka-te-su chhe sù-chiá khì kìⁿ Í-tong -ông, kóng, “Lí ê chhin-cho̍k Í-sek-lia̍t -lâng án-ni kóng: Lí chai goán ū tú-tio̍h chin chōe kan-khó͘.

15Goán ê chó͘-sian lo̍h-khì Ai-ki̍p, tòa tī hia kúi-nā nî; Ai-ki̍p -lâng ap-pek goán kap goán ê chó͘-sian.

16Goán ai-kiû Siōng Chú, I thiaⁿ goán ê siaⁿ, chiū phài sù-chiá chhōa goán lī-khui Ai-ki̍p. Hiān-chāi goán tī lí pian-kài ê siâⁿ Ka-te-su.

17Taⁿ, chhiáⁿ ún-chún goán keng-kè lí ê tōe. Goán bōe tùi lín ê chhân-hn̂g kap phû-tô-hn̂g kè, mā bōe lim chíⁿ-chúi; chí-ū kiâⁿ tōa-lō͘, bōe phian-chó-phian-iū, it-ti̍t kàu kè lí ê pian-kài.”

18Í-tong -ông kóng, “Lín bōe-ēng-tit tùi góa chia kè; nā it-tēng beh kè, góa beh phài peng kong-kek lín.”

19Í-sek-lia̍t -lâng kā i kóng, “Goán ōe tùi tōa-lō͘ kè--khì. Goán kap cheng-siⁿ nā lim lí ê chúi, goán ōe chiàu kè-siàu hō͘ lí. Pài-thok, chhiáⁿ ún-chún hō͘ goán kè.”

20Í-tong -ông kóng, “Put-chún lín kè.” I chiū chhōa chi̍t tōa-tīn bú-chong pō͘-tūi chhut-lâi kong-kek in.

21Án-ni, Í-tong -ông m̄-chún Í-sek-lia̍t -lâng tùi in ê thó͘-tōe keng-kè; Í-sek-lia̍t -lâng chiū oat tùi pa̍t-ê hong-hiòng khì.

22Í-sek-lia̍t choân-thé hōe-chiòng tùi Ka-te-su chhut-hoat khì kàu Hô-ní-soaⁿ.

23Tī Í-tong pian-kài ê Hô-ní-soaⁿ, Siōng Chú hoan-hù Mô͘-se kap A-lûn, kóng,

24“ A-lûn liâm-piⁿ ōe sí; i bōe-tàng ji̍p-khì góa beh sù hō͘ Í-sek-lia̍t -lâng ê tōe, in-ūi tī Bí-lī-pa chúi-chôaⁿ ê sū-kiāⁿ lín ûi-pōe góa ê bēng-lēng.

25Lí tio̍h chhōa A-lûn kap i ê kiáⁿ Í-lī-a-sat chiūⁿ Hô-ní-soaⁿ,

26kā A-lûn ê saⁿ thǹg khí-lâi hō͘ i ê kiáⁿ Í-lī-a-sat chhēng; A-lûn ōe sí tī hia.”

27Mô͘-se chiū chiàu Siōng Chú ê bēng-lēng chòe. In saⁿ ê lâng tī hōe-chiòng ê ba̍k-chiu chêng chiūⁿ Hô-ní-soaⁿ.

28Mô͘-se chiong A-lûn ê saⁿ thǹg--khí-lâi, chhēng tī i ê kiáⁿ Í-lī-a-sat sin-chiūⁿ, A-lûn chiū sí tī soaⁿ-téng. Mô͘-se kap Í-lī-a-sat lo̍h-soaⁿ.

29Í-sek-lia̍t choân-ke chai A-lûn í-keng sí, chiū ūi A-lûn thî-khàu saⁿ-cha̍p ji̍t.

← Chapter 19 Jump to: Chapter 21 →

推荐阅读

注释 Numbers 注释书 → 灵修 Numbers 灵修指南 → 购买此圣经 TTVR (現代台語譯本羅馬字版) 研读本圣经 →