Numbers 14

Chinese TTVR (現代台語譯本羅馬字版)

← Chapter 13 Jump to: Chapter 15 →

1Choân hōe-chiòng chiū chhut-siaⁿ, bâi-oàn. Hit-mî in lóng thî-khàu.

2Í-sek-lia̍t -lâng bâi-oàn Mô͘-se kap A-lûn, tùi in kóng, “Khó͘-bōe-tit goán sí tī Ai-ki̍p! Khó͘-bōe-tit sí tiàm chit-ê khòng-iá!

3Siōng Chú ná beh chhōa goán lâi kàu chia, hāi goán hō͘ lâng thâi-sí, bó͘ kiáⁿ mā hō͘ lâng lia̍h--khì. Goán tò-khì Ai-ki̍p kiám bô khah hó?”

4In hō͘-siōng kóng-lâi-kóng-khì, “Lán tio̍h soán chi̍t ê siú-léng, chhōa lán tò-khì Ai-ki̍p.”

5Mô͘-se kap A-lûn phak-lo̍h tī Í-sek-lia̍t choân hōe-chiòng ê bīn-chêng.

6Thàm-cha hit-ê tōe ê lâng tiong-kan, Lūn ê kiáⁿ Iok-su-a kap Iâ-hu-nî ê kiáⁿ Ka-le̍k, thiah-li̍h in ê saⁿ,

7tùi Í-sek-lia̍t choân hōe-chiòng kóng, “Goán thàm-cha keng-kè ê tōe sī chin pûi koh súi ê tōe.

8Siōng Chú nā ì-ài lán, chiū ōe chhōa lán ji̍p-khì hit-ê tōe, chiong hit-ê lâu lin kap bi̍t ê tōe siúⁿ-sù lán.

9M̄-kú lín m̄-thang pōe-poān Siōng Chú, mā m̄-bián kiaⁿ hit só͘-chāi ê lâng, in ōe hō͘ lán thun-bia̍t. Kā in pó-pì--ê lóng í-keng lī-khui; Siōng Chú kap lán tông-chāi, m̄-bián kiaⁿ in.”

10Choân-thé hōe-chiòng kóng beh ēng chio̍h-thâu kā in tìm-sí hit-sî, Siōng Chú ê êng-kng tī hōe-bō͘ tùi só͘-ū ê Í-sek-lia̍t -lâng hián-hiān.

11Siōng Chú tùi Mô͘-se kóng, “Chit-ê chú-bîn biáu-sī góa beh kàu tī-sî? Góa tī in tiong-kan kiâⁿ hiah chōe sîn-jiah, in kàu tī-sî chiah ōe sìn góa?

12Góa beh ēng un-e̍k phah in, hō͘ in bōe-tàng sêng-chiap chit-ê ke-gia̍p. M̄-kú góa beh hō͘ lí chiâⁿ-chòe tōa-kok, pí in khah kiông-sēng.”

13Mô͘-se tùi Siōng Chú kóng, “Lí nā án-ni chòe, Ai-ki̍p -lâng it-tēng ōe chai, in-ūi lí bat ēng lí ê koân-lêng chhōa chiah-ê jîn-bîn tùi Ai-ki̍p chhut--lâi.

14Ai-ki̍p -lâng ōe tùi chit só͘-chāi ê chū-bîn kóng chit-ê sū. Chit só͘-chāi ê chū-bîn mā í-keng chai, Siōng Chú lí kap chiah-ê jîn-bîn tông-chāi; lí ê hûn tī in ê téng-bīn, tī hit tiong-kan lí tùi in hián-hiān, hō͘ in chhin-ba̍k khòaⁿ--kìⁿ; ji̍t--sî ēng hûn-thiāu, mî--sî ēng hé-thiāu ín-chhōa in.

15Taⁿ lí nā chi̍t-ē-chhiú thâi-sí chiah-ê jîn-bîn, hiah-ê thiaⁿ-kìⁿ lí ê miâ-siaⁿ ê lia̍t-kok ōe kóng,

16‘In-ūi Siōng Chú bōe-tàng chiong chit-ê jîn-bîn chhōa ji̍p-khì I tùi in li̍p-sè èng-ún ê tōe, chiū tī khòng-iá kā in châu-bia̍t.’

17Taⁿ kiû góa ê Chú chiàu lí só͘ èng-ún--ê, hián-chhut lí ê tōa koân-lêng; lí bat kóng:

18Siōng Chú bô khoài siū-khì, koh ū hong-sēng ê chû-ài; sià-bián chōe-gia̍t kap kè-sit; it-tēng bōe kā ū-chōe--ê phòaⁿ-chòe bô-chōe, beh tui-kiù lâng ê chōe, tùi pē kàu kiáⁿ, kàu saⁿ sì tāi.

19Kiû lí chiàu lí ê tōa chû-ài sià-bián chit-ê jîn-bîn ê chōe-gia̍t. Chhin-chhiūⁿ lí tùi chhōa in chhut Ai-ki̍p kàu taⁿ, siông-siông sià-bián in kâng-khoán.”

20Siōng Chú kóng, “Góa beh chiàu lí ê ōe sià-bián in.

21M̄-kú, góa kí góa ê oa̍h-miā kap góa chhiong-móa choân-tōe ê êng-kng li̍p-sè:

22Chiah-ê lâng sui-jiân ū khòaⁿ-kìⁿ góa ê êng-kng, koh khòaⁿ-tio̍h góa tī Ai-ki̍p kap khòng-iá kiâⁿ--kè ê sîn-jiah, iáu chhì-thàm góa cha̍p piàn, m̄ thiaⁿ-thàn góa ê bēng-lēng,

23só͘-í in it-tēng bōe-tàng khòaⁿ-tio̍h góa tùi in ê lia̍t-chó͘ li̍p-sè èng-ún ê tōe; só͘-ū biáu-sī góa--ê lóng bōe-tàng khòaⁿ--tio̍h.

24M̄-kú góa ê po̍k-jîn Ka-le̍k, góa beh chhōa i ji̍p-khì i kiâⁿ--kè ê tōe, i ê hō͘-tāi mā beh tit-tio̍h hit-ê tōe chòe ke-gia̍p, in-ūi i ū kap pa̍t-lâng bô kâng-khoán ê sim-chì, choân-sim kun-tè góa.

25Bîn-á-chài lín tio̍h choán hong-hiòng, tùi Âng-hái ê lō͘ khì khòng-iá, in-ūi A-má-le̍k -lâng kap Ka-lâm -lâng tòa tī soaⁿ-kok.”

26Siōng Chú koh tùi Mô͘-se kap A-lûn kóng,

27“Chit-ê pháiⁿ ê hōe-chiòng tùi góa hoat oàn-giân beh kàu tī-sî? Í-sek-lia̍t -lâng tùi góa ê oàn-giân, góa lóng ū thiaⁿ--kìⁿ.

28Tio̍h kā in kóng Siōng Chú kóng, ‘Góa kí góa ê oa̍h-miā li̍p-sè: Góa beh chiàu lín só͘ kóng ê oàn-giân tùi-thāi lín.

29Lín ê sin-si ōe tó tī chit-ê khòng-iá. Lín tiong-kan ū teng-lio̍k, jī-cha̍p hè í-siōng, tùi góa hoat oàn-giân ê lâng,

30it-tēng bōe-tàng ji̍p-khì góa li̍p-sè èng-ún beh hō͘ lín khiā-khí ê tōe; chí-ū Iâ-hu-nî ê kiáⁿ Ka-le̍k kap Lūn ê kiáⁿ Iok-su-a chiah ōe-tàng ji̍p--khì.

31M̄-kú lín só͘ teh siūⁿ ōe hō͘ lâng lia̍h--khì ê gín-á, góa beh chhōa in ji̍p--khì, in ōe tit-tio̍h lín só͘ khì-sak hit-ê tōe.

32Lín leh, lín ê sin-si ōe tó tī chit-ê khòng-iá.

33Lín ê kiáⁿ-jî ōe tī khòng-iá liû-lōng sì-cha̍p nî, tam-tng lín bô tiong-si̍t ê chōe, ti̍t-kàu lín tī khòng-iá oân-choân siau-bia̍t.

34Lín thàm-cha hit-ê tōe ê ji̍t-chí kiōng sì-cha̍p ji̍t, chi̍t nî tú chi̍t ji̍t, lín tio̍h tùi lín hoān ê chōe-gia̍t hù-chhut tāi-kè sì-cha̍p nî; lín chiū chai hoán-tùi góa ê kiat-kó sī án-chóaⁿ.’

35Góa Siōng Chú í-keng kóng, góa beh án-ni tùi-thāi só͘-ū chū-chi̍p tùi-te̍k góa ê pháiⁿ hōe-chiòng; in beh tī chit-ê khòng-iá siau-sit, sí tī chia.”

36Mô͘-se phài-khì thàm-cha hit-ê tōe ê lâng, tò-tńg-lâi pò hit só͘-chāi ê pháiⁿ siau-sit, tì-kàu choân hōe-chiòng tùi Mô͘-se hoat oàn-giân;

37hiah-ê pò pháiⁿ siau-sit ê lâng lóng tú-tio̍h un-e̍k, sí tī Siōng Chú ê bīn-chêng.

38Khì thàm-cha hit só͘-chāi ê lâng tiong-kan, chí-ū Lūn ê kiáⁿ Iok-su-a kap Iâ-hu-nî ê kiáⁿ Ka-le̍k iáu oa̍h--teh.

39Mô͘-se chiong chiah-ê ōe kā Í-sek-lia̍t chèng-lâng kóng, jîn-bîn chiū chin pi-siong.

40In thàu-chá khí--lâi, chiūⁿ-khì soaⁿ-téng, kóng, “Goán ū hoān-chōe. Taⁿ goán tī chia, goán beh chiūⁿ-khì Siōng Chú èng-ún goán ê tōe.”

41Mô͘-se kóng, “Lín ná beh ûi-pōe Siōng Chú ê bēng-lēng? Lín án-ni chòe bōe sêng-kong.

42M̄-thang khì, in-ūi Siōng Chú bô kap lín tông-chāi, khióng-kiaⁿ lín hō͘ tùi-te̍k phah-pāi.

43A-má-le̍k -lâng kap Ka-lâm -lâng lóng tī lín ê thâu-chêng, lín ōe sí tī in ê to-ē; in-ūi lín bô tè Siōng Chú, só͘-í Siōng Chú bô beh kap lín tông-chāi.”

44In kian-chhî beh chiūⁿ soaⁿ-téng; m̄-kú Siōng Chú ê iok-kūi kap Mô͘-se bô chhut iâⁿ-tōe.

45Tùi án-ni, A-má-le̍k -lâng kap tòa tī soaⁿ--ni̍h ê Ka-lâm -lâng lóng lo̍h-lâi kong-kek in, kā in phah-pāi, kā in kóaⁿ kàu Hô-ní-má.

← Chapter 13 Jump to: Chapter 15 →