Numbers 25

Chinese TTVR (現代台語譯本羅馬字版)

← Chapter 24 Jump to: Chapter 26 →

1Í-sek-lia̍t -lâng tī Si̍p-têng chat-iâⁿ ê sî, jîn-bîn kap Mô͘-ap ê lú-chú kiâⁿ-îm.

2Mô͘-ap ê lú-chú hiàn-chè hō͘ in ê sîn-bêng ê sî, chhiáⁿ Í-sek-lia̍t -lâng lâi chham-ka, chia̍h in ê chè-mi̍h, kūi-pài in ê sîn-bêng.

3Í-sek-lia̍t -lâng pài Pí-ní ê sîn-bêng Pa-le̍k; Siōng Chú chiū tùi Í-sek-lia̍t -lâng hoat siū-khì.

4Siōng Chú tùi Mô͘-se kóng, “Chiong jîn-bîn só͘-ū ê cho̍k-tiúⁿ, tng-thâu-pe̍h-ji̍t tī góa ê bīn-chêng kā in tiàu-sí, hō͘ góa bô koh tùi Í-sek-lia̍t -lâng hoat siū-khì.”

5Mô͘-se chiū tùi Í-sek-lia̍t -lâng ê sím-phòaⁿ-koaⁿ kóng, “Lín ê chhin-cho̍k nā ū lâng pài Pí-ní ê Pa-le̍k, tio̍h lóng kā in thâi--sí.”

6Mô͘-se kap Í-sek-lia̍t hōe-chiòng tú-á tī hōe-bō͘ mn̂g-kháu teh khàu ê sî, hut-jiân ū chi̍t ê Í-sek-lia̍t -lâng, tī in ê ba̍k-chiu chêng chhōa chi̍t ê Bí-tiân ê lú-chú ji̍p-khì i ê pò͘-pîⁿ.

7Chè-si A-lûn ê sun, Í-lī-a-sat ê kiáⁿ Hui-nî-hap khòaⁿ--tio̍h, chiū khí--lâi, lī-khui hōe-chiòng, gia̍h chhiuⁿ,

8tè hit-ê Í-sek-lia̍t -lâng ji̍p pò͘-pîⁿ, chha̍k thàng-kè hit nn̄g ê lâng ê pak-tó͘; án-ni, kong-kek Í-sek-lia̍t -lâng ê un-e̍k chiū thêng-chí.

9Hit-sî, in-ūi un-e̍k sí--ê ū nn̄g-bān sì-chheng lâng.

10Siōng Chú bēng-lēng Mô͘-se kóng,

11“Chè-si A-lûn ê sun, Í-lī-a-sat ê kiáⁿ Hui-nî-hap hō͘ góa bô koh tùi Í-sek-lia̍t -lâng hoat siū-khì, in-ūi i ū thé-hōe góa iau-kiû choân-chêng ho̍k-sāi góa ê sim, hō͘ góa bô kā in siau-bia̍t.

12Só͘-í lí tio̍h soan-pò͘: Góa beh kap i li̍p pêng-an ê iok,

13hō͘ i kap i ê hō͘-tāi éng-oán chòe chè-si, in-ūi i bô iông-ún ū jīm-hô sîn-bêng kap góa pí-phēng, koh ūi-tio̍h Í-sek-lia̍t -lâng sio̍k-chōe.”

14Hit-ê kap Bí-tiân ê lú-chú chòe-hé siū thâi-sí ê Í-sek-lia̍t -lâng kiò-chòe Sim-lī, sī Se-biān chi-cho̍k chi̍t ê chong-cho̍k ê cho̍k-tiúⁿ Sat-lō͘ ê kiáⁿ.

15Hit-ê hō͘ lâng thâi-sí ê Bí-tiân lú-chú kiò-chòe Ko-su-pí, sī Bí-tiân -lâng chi̍t ê chong-cho̍k ê siú-léng So͘-ní ê cha-bó͘-kiáⁿ.

16Siōng Chú bēng-lēng Mô͘-se kóng,

17“Lí tio̍h khì kong-kek Bí-tiân -lâng, kā in phah-pāi;

18in-ūi in tī Pí-ní ê sū-kiāⁿ kap in ê tông-pau Ko-su-pí ê tāi-chì, ēng khúi-khiat ê kè-bô͘ hām-hāi lín; Ko-su-pí sī Bí-tiân -lâng chi̍t ê siú-léng ê cha-bó͘-kiáⁿ, i in-ūi Pí-ní ê sū-kiāⁿ tī un-e̍k liû-hêng ê sî hō͘ lâng chha̍k--sí.”

← Chapter 24 Jump to: Chapter 26 →