Numbers 28

Chinese TTVR (現代台語譯本羅馬字版)

← Chapter 27 Jump to: Chapter 29 →

1Siōng Chú hoan-hù Mô͘-se

2bēng-lēng Í-sek-lia̍t -lâng, kóng, “Lín tio̍h chiàu-sî sīn-tiōng hōng-hiàn chè-mi̍h hō͘ góa, ēng hé sio, chòe góa só͘ ì-ài phang-phang ê chia̍h-mi̍h.”

3Lí koh tio̍h kā in kóng, “Lín ta̍k-ji̍t tio̍h hiàn nn̄g chiah bô hâ-chhû chi̍t-hè ê iûⁿ-káng-á chòe sio-hòa-chè, ēng hé sio chòe phang-phang ê chè-mi̍h hiàn hō͘ Siōng Chú;

4chá-khí-sî kap hông-hun ê sî kok hiàn chi̍t chiah.

5Koh tio̍h chiong chi̍t kong-kun ê iù mī-hún kap chiⁿ--chhut-lâi chi̍t kong-seng ê kaⁿ-ná-iû chhiau chòe-hé, hiàn chòe sò͘-chè.

6Che sī tī Se-nāi-soaⁿ chè-tēng, ta̍k-ji̍t tio̍h ēng hé sio hiàn hō͘ Siōng Chú phang-phang ê sio-hòa-chè.

7Hiàn tē-it chiah iûⁿ-káng-á ê sî, mā tio̍h tī sèng-só͘ ēng chi̍t kong-seng ê kāu-chiú chòe tiān-chiú-chè hiàn hō͘ Siōng Chú.

8Hông-hun hiàn lēng-gōa hit-chiah iûⁿ-á ê sî, tio̍h kap chá-khí-sî kâng-khoán hiàn sò͘-chè kap tiān-chiú-chè, lóng ēng hé sio chòe phang-phang ê chè-mi̍h hiàn hō͘ Siōng Chú.”

9“An-hioh-ji̍t tio̍h hiàn nn̄g chiah chi̍t hè bô hâ-chhû ê iûⁿ-káng-á, koh hiàn nn̄g kong-kun chhiau-iû ê iù mī-hún chòe sò͘-chè, í-ki̍p tiān-chiú-chè.

10Che sī ta̍k-ji̍t tio̍h hiàn ê sio-hòa-chè kap tiān-chiú-chè í-gōa, múi chi̍t ê An-hioh-ji̍t tio̍h koh hiàn ê sio-hòa-chè.”

11“Ta̍k kò-ge̍h chhoe-it, lín tio̍h hiàn sio-hòa-chè hō͘ Siōng Chú, chiū-sī hiàn nn̄g chiah gû-káng-á, chi̍t chiah mî-iûⁿ-káng, chhit chiah chi̍t-hè ê mî-iûⁿ-káng-á; chiah-ê lóng tio̍h bô hâ-chhû--ê.

12Hiàn gû-káng ê sî, mā tio̍h hiàn saⁿ kong-kun chhiau-iû ê iù mī-hún chòe sò͘-chè; hiàn mî-iûⁿ-káng ê sî, mā tio̍h hiàn nn̄g kong-kun chhiau-iû ê iù mī-hún chòe sò͘-chè.

13Hiàn ta̍k-chiah mî-iûⁿ-káng-á ê sî, mā tio̍h hiàn chi̍t kong-kun chhiau-iû ê iù mī-hún chòe sò͘-chè. Che sī sio-hòa-chè, ēng hé sio hiàn hō͘ Siōng Chú phang-phang ê chè-mi̍h.

14Hiàn sio-hòa-chè ê sî, mā tio̍h hiàn tiān-chiú-chè: Chi̍t chiah gû-káng phòe-ha̍p nn̄g kong-seng ê chiú, chi̍t chiah iûⁿ-káng phòe-ha̍p chi̍t kong-seng-pòaⁿ ê chiú, chi̍t chiah mî-iûⁿ-káng-á phòe-ha̍p chi̍t kong-seng ê chiú. Chiah-ê sī chi̍t nî tiong-kan ta̍k kò-ge̍h chhoe-it tio̍h hiàn ê sio-hòa-chè.

15Tû-liáu ta̍k-ji̍t tio̍h hiàn ê sio-hòa-chè kap tiān-chiú-chè í-gōa, tio̍h ēng chi̍t chiah soaⁿ-iûⁿ-káng chòe sio̍k-chōe-chè hiàn hō͘ Siōng Chú.”

16“Chiaⁿ-ge̍h cha̍p-sì sī Siōng Chú ê Pôaⁿ-kè-choeh.

17Chit kò-ge̍h ê cha̍p-gō͘ khí sī choeh-kî, tio̍h chia̍h bô-kàⁿ-piáⁿ chhit ji̍t kú.

18Thâu chi̍t ji̍t tio̍h kú-hêng sèng-hōe, jīm-hô ji̍t-siông ê kang-chok lóng m̄-thang chòe.

19Lí tio̍h hiàn bô hâ-chhû ê nn̄g chiah gû-káng-á, chi̍t chiah mî-iûⁿ-káng, chhit chiah chi̍t-hè ê mî-iûⁿ-káng-á chòe sio-hòa-chè, ēng hé sio hiàn hō͘ Siōng Chú.

20Hiàn ta̍k-chiah gû-káng ê sî, tio̍h phòe-ha̍p saⁿ kong-kun chhiau-iû ê iù mī-hún chòe sò͘-chè; hiàn hit-chiah mî-iûⁿ-káng ê sî, tio̍h phòe-ha̍p nn̄g kong-kun chhiau-iû ê iù mī-hún.

21Hiàn chhit chiah mî-iûⁿ-káng-á ê sî, ta̍k-chiah tio̍h phòe-ha̍p chi̍t kong-kun chhiau-iû ê iù mī-hún.

22Koh tio̍h hiàn chi̍t chiah soaⁿ-iûⁿ-káng chòe sio̍k-chōe-chè, kā lín sio̍k-chōe.

23Lín ta̍k chá-khí hiàn sio-hòa-chè í-gōa, tio̍h koh hiàn í-siōng chiah-ê chè.

24Kâng-khoán, ta̍k-ji̍t hiàn ê sio-hòa-chè kap tiān-chiú-chè í-gōa, liân-liân chhit ji̍t, tio̍h chiàu kui-lē ēng hé sio, chiong phang-phang ê chia̍h-mi̍h hiàn hō͘ Siōng Chú.

25Tē-chhit ji̍t tio̍h kú-hêng sèng-hōe, jīm-hô ji̍t-siông ê kang-chok lóng m̄-thang chòe.”

26“Chhit-chhit Siu-koah-choeh, chiū-sī lín chiong chho͘-se̍k ê ngó͘-kok chòe sò͘-chè hiàn hō͘ Siōng Chú hit-ji̍t, tio̍h kú-hêng sèng-hōe; jīm-hô ji̍t-siông ê kang-chok lóng m̄-thang chòe.

27Lín tio̍h hiàn phang-phang ê sio-hòa-chè hō͘ Siōng Chú, chiū-sī hiàn nn̄g chiah gû-káng-á, chi̍t chiah mî-iûⁿ-káng, chhit chiah chi̍t-hè ê mî-iûⁿ-káng-á.

28Lín hiàn ta̍k-chiah gû-káng ê sî, tio̍h phòe-ha̍p saⁿ kong-kun chhiau-iû ê iù mī-hún chòe sò͘-chè; hiàn hit-chiah mî-iûⁿ-káng ê sî, tio̍h phòe-ha̍p nn̄g kong-kun chhiau-iû ê iù mī-hún;

29hiàn hit chhit chiah mî-iûⁿ-káng-á ê sî, ta̍k-chiah tio̍h phòe-ha̍p chi̍t kong-kun chhiau-iû ê iù mī-hún.

30Koh tio̍h hiàn chi̍t chiah soaⁿ-iûⁿ-káng, kā lín sio̍k-chōe.

31Ta̍k-ji̍t tio̍h hiàn ê sio-hòa-chè kap sò͘-chè í-gōa, lín tio̍h hiàn chiah-ê bô hâ-chhû ê chè-mi̍h kap tiān-chiú-chè.”

← Chapter 27 Jump to: Chapter 29 →