Numbers 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Siōng Chú bēng-lēng Mô͘-se kóng,

2“Lí tio̍h hoan-hù Í-sek-lia̍t -lâng, chiong só͘-ū tì-tio̍h giâm-tiōng ê phê-hu-pīⁿ, hā-siau, kap bong-tio̍h si-thé tì-kàu bô chheng-khì ê lâng sàng chhut-khì iâⁿ-gōa.

3Bô-lūn lâm-lú, lín lóng tio̍h kā in sàng chhut-khì iâⁿ-gōa, chiah bián in phah lâ-sâm chit-ê iâⁿ-tōe, in-ūi góa tòa tī chia.”

4Í-sek-lia̍t -lâng chiū chiàu án-ni, kā bô chheng-khì ê lâng sàng chhut-khì iâⁿ-gōa; Siōng Chú án-ni bēng-lēng Mô͘-se, Í-sek-lia̍t -lâng chiū chiàu án-ni chòe.

5Siōng Chú hoan-hù Mô͘-se

6tùi Í-sek-lia̍t -lâng soan-pò͘: Nā ū lâng khek-khui lâng tek-chōe Siōng Chú, bô-lūn lâm-lú, hit-ê lâng chiū ū chōe.

7I tio̍h jīn-chōe, pê choân-pō͘ ê sún-sit koh ke gō͘-hūn-chi̍t hō͘ siū-hāi ê lâng.

8Hit-ê siū-hāi ê lâng nā bô chhin-lâng thang chiap-siū pê-siông, kā lâng khek-khui hit-ê lâng tio̍h chiong pê-siông ê chîⁿ hêng hō͘ Siōng Chú, kui tī chè-si; lēng-gōa, i tio̍h koh hiàn chi̍t chiah iûⁿ-káng ūi ka-kī sio̍k-chōe, mā kui hō͘ chè-si.

9Í-sek-lia̍t -lâng tòa-lâi chè-si hia hōng-hiàn ê sèng-mi̍h tiong-kan, só͘-ū gia̍h-koân hiàn hō͘ Siōng Chú ê, lóng tio̍h kui hō͘ chè-si.

10Lâng hun-pia̍t-choh-sèng ê lé-mi̍h, lóng tio̍h kui hō͘ chè-si; lâng bô-lūn ēng sím-mi̍h sàng hō͘ chè-si, lóng tio̍h kui hō͘ chè-si.

11Siōng Chú hoan-hù Mô͘-se

12tùi Í-sek-lia̍t -lâng soan-pò͘: Nā ū lâng hoâi-gî i ê bó͘ tùi i put-tiong, àm-tiong kap lâng hoat-seng sèng-koan-hē, phah lâ-sâm ka-kī, i m̄ chai, tāi-chì mā bô po̍k-lō͘, bô lâng choh-chèng, koh bô hō͘ lâng lia̍h--tio̍h; put-koán i ê bó͘ ū phah lâ-sâm ka-kī, ín-khí i hoâi-gî oàn-tò͘, á-sī i ê bó͘ bô phah lâ-sâm ka-kī, m̄-kú i hoâi-gî oàn-tò͘;

15hit-ê lâng tio̍h chhōa i ê bó͘ khì chè-si hia, koh tòa chi̍t kong-kun bô lām iû kap jú-hiuⁿ ê tōa-be̍h-hún chòe lé-mi̍h, che sī ūi-tio̍h hoâi-gî oàn-tò͘ só͘ hiàn ê sò͘-chè, beh hō͘ lâng ōe-kì-tit chōe-kò.

16Chè-si tio̍h hō͘ hit-ê hū-jîn-lâng óa--lâi, khiā tī Siōng Chú ê bīn-chêng.

17Chè-si tio̍h ēng sèng ê chúi tóe tī chho͘-hûi, koh tùi hōe-bō͘ ê thô͘-kha the̍h chi̍t-tiám-á thô͘-hún, chham tī chúi-tiong.

18Chè-si tio̍h hō͘ hit-ê hū-jîn-lâng khiā tī Siōng Chú ê bīn-chêng, phah-sàm hū-jîn-lâng ê thâu-mn̂g, chiong hō͘ lâng ōe-kì-tit chōe-kò ê sò͘-chè, chiū-sī hoâi-gî oàn-tò͘ ê sò͘-chè, hē tī hū-jîn-lâng ê chhiú; chè-si tio̍h phóng chiù-chó͘ ê khó͘-chúi,

19kiò hū-jîn-lâng chiù-chōa, tùi i kóng, “Lí í-keng kè hō͘ lí ê tiōng-hu, nā bô kap pa̍t-lâng hoat-seng sèng-koan-hē, phah lâ-sâm ka-kī, lí chiū bōe siū-tio̍h chit-ê khó͘-chúi ê chiù-chó͘.

20M̄-kú lí nā tùi lí ê tiōng-hu put-tiong, kap tiōng-hu í-gōa ê lâng hoat-seng sèng-koan-hē,

21goān Siōng Chú hō͘ lí ê tōa-thúi siau-sán, pak-tó͘ tiòng--khí-lâi, hō͘ lí chiâⁿ-chòe jîn-bîn chiù-chó͘ ê ōe-pìⁿ.

22Koh chit-ê chiù-chó͘ ê chúi beh ji̍p-khì lí ê seng-khu, hō͘ lí ê pak-tó͘ tiòng--khí-lâi, tōa-thúi siau-sán.” Hū-jîn-lâng tio̍h ìn kóng, “Amen, Amen.”

23Chè-si tio̍h chiong chiah-ê chiù-chó͘ ê ōe siá tī chheh-kǹg, khǹg ji̍p-khì khó͘-chúi lāi-bīn sóe-tiāu.

24Hit-ê hū-jîn-lâng nā lim chit-ê chiù-chó͘ ê khó͘-chúi, chit-ê chúi ji̍p-khì i ê seng-khu, ōe hō͘ i thòng-khó͘.

25Chè-si tio̍h tùi hū-jîn-lâng ê chhiú chiap hoâi-gî oàn-tò͘ ê sò͘-chè, tī Siōng Chú ê bīn-chêng iô-iô--leh, tòa-khì chè-tôaⁿ chêng;

26koh tio̍h mi chi̍t pé tōa-be̍h-hún, tāi-piáu só͘ hiàn ê sò͘-chè, hē tī tôaⁿ-téng sio, jiân-āu hō͘ hū-jîn-lâng lim chit-ê chúi.

27Hit-ê hū-jîn-lâng lim chit-ê chiù-chó͘ ê khó͘-chúi, i nā chin-chiàⁿ ū phah lâ-sâm ka-kī, tùi tiōng-hu put-tiong, chit-ê chúi ji̍p-khì i ê seng-khu, ōe hō͘ i thòng-khó͘, pak-tó͘ tiòng--khí-lâi, tōa-thúi siau-sán; hit-ê hū-jîn-lâng ōe hō͘ tông-pau chiù-chó͘.

28M̄-kú i nā bô phah lâ-sâm ka-kī, si̍t-chāi sī chheng-pe̍k, chiū bōe siū chit-khoán chai-hō, ōe koh hoâi-īn.

29Í-siōng sī hoâi-gî bó͘ put-tiong ê chhú-lí pān-hoat. Bó͘ í-keng kè hō͘ tiōng-hu, nā tùi tiōng-hu put-tiong phah lâ-sâm ka-kī,

30á-sī tiōng-hu oàn-tò͘ hoâi-gî i ê bó͘, chiū tio̍h hō͘ i ê bó͘ khiā tī Siōng Chú ê bīn-chêng; chè-si tio̍h chiàu chit-ê pān-hoat chhú-lí.

31Án-ni, ta-po͘-lâng bô chōe, hū-jîn-lâng tio̍h tùi ka-kī ê chōe hū chek-jīm.

← Chapter 4 Jump to: Chapter 6 →