Numbers 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Siōng Chú bēng-lēng Mô͘-se, kóng,

2“Lí tio̍h tùi ta̍k-ê chi-cho̍k soán chi̍t ê cho̍k-tiúⁿ, phài in khì thàm-cha góa beh sù hō͘ Í-sek-lia̍t -lâng ê Ka-lâm -tōe.”

3Mô͘-se chiū chiàu Siōng Chú ê bēng-lēng, phài ta̍k chi-cho̍k ê cho̍k-tiúⁿ tùi Pa-lân ê khòng-iá chhut-hoat.

4Chiah-ê cho̍k-tiúⁿ ê miâ kì tī ē-bīn: Lū-piān chi-cho̍k sī Sat-khek ê kiáⁿ Sa-bō͘-a

5Se-biān chi-cho̍k sī Hô-lī ê kiáⁿ Sa-hoat

6Iû-tāi chi-cho̍k sī Iâ-hu-nî ê kiáⁿ Ka-le̍k

7Í-sat-ka chi-cho̍k sī Iok-sek ê kiáⁿ Í-ka

8Í-hoat-liân chi-cho̍k sī Lūn ê kiáⁿ Hô-se-a

9Piān-ngá-bín chi-cho̍k sī La-hu ê kiáⁿ Phà-thê

10Se-pò͘-lûn chi-cho̍k sī So-tí ê kiáⁿ Ka-tia̍p

11Iok-sek ê hō͘-tāi Má-ná-se chi-cho̍k sī So͘-se ê kiáⁿ Ka-tí

12Tān chi-cho̍k sī Ki-má-lī ê kiáⁿ A-bí-lī

13A-siat chi-cho̍k sī Bí-ka-le̍k ê kiáⁿ Se-thiap

14Ná-hut-tha-lī chi-cho̍k sī Po̍k-se ê kiáⁿ Ná-pí

15Ka-tek chi-cho̍k sī Má-ki ê kiáⁿ Kiū-lī

16Í-siōng sī Mô͘-se phài-khì thàm-cha hit-ê tōe ê lâng ê miâ. Mô͘-se kā Lūn ê kiáⁿ Hô-se-a hō-miâ chòe Iok-su-a.

17Mô͘-se phài in khì thàm-cha Ka-lâm -tōe ê sî, tùi in kóng, “Lín khì Nî-kek-hu, peh-chiūⁿ soaⁿ,

18khòaⁿ hit-ê tōe siⁿ-chòe sím-mi̍h khoán: Hia ê chū-bîn sī kiông á-sī jio̍k, jîn-sò͘ chōe á-sī chió,

19tòa ê tōe sī hó á-sī bái, tòa ê só͘-chāi sī bô siâⁿ-chhiûⁿ ê iâⁿ-tōe á-sī kian-kò͘ ê siâⁿ.

20Koh khòaⁿ hit-ê thó͘-tōe sī pûi á-sī sán, ū chhiū-ba̍k á bô. Lín tio̍h ióng-kám, chiong hit só͘-chāi ê ké-chí tòa chi̍t-kóa tò--lâi.” Hit-sî tú-á sī phû-tô chho͘-se̍k ê sî.

21In chiū khì thàm-cha, tùi Sîm ê khòng-iá kàu Lī-ha̍p ê tōe-khu, ti̍t-kàu Hap-má ài-kháu.

22In koh tùi Nî-kek-hu chiūⁿ-khì Hi-pek-lûn; chit-ê siâⁿ pí Ai-ki̍p ê Só-an -siâⁿ khah chá chhit nî khí-chō, ū A-la̍p -cho̍k ê A-hi-bān -lâng, Sī-su -lâng, Ta̍t-mái -lâng tòa tī hia.

23In kàu Í-si̍t-kok Soaⁿ-kok, chhò chi̍t ki phû-tô chhiū-oe, téng-bīn ū chi̍t pha phû-tô, su-iàu nn̄g ê lâng kng; koh tòa chi̍t-kóa sia̍h-liû kap bû-hoa-kó tò--lâi.

24In-ūi Í-sek-lia̍t -lâng tùi hia chhò chi̍t pha phû-tô, hit-ê só͘-chāi chiū kiò-chòe Í-si̍t-kok Soaⁿ-kok.

25In thàm-cha hit-ê tōe sì-cha̍p ji̍t kú, chiah tò--lâi.

26In lâi kàu Pa-lân khòng-iá ê Ka-te-su, kìⁿ Mô͘-se, A-lûn, kap Í-sek-lia̍t ê hōe-chiòng, kā in hôe-pò kui-ê hêng-thêng, koh hō͘ in khòaⁿ hit só͘-chāi ê ké-chí.

27In tùi Mô͘-se kóng, “Lí phài goán khì thàm-cha hit-ê tōe-khu, kó-jiân sī lâu lin kap bi̍t ê tōe; chiah-ê chiū-sī hit-ê só͘-chāi ê ké-chí.

28M̄-kú hit só͘-chāi ê chū-bîn chin ióng, siâⁿ tōa koh kian-kò͘; goán tī hia mā khòaⁿ-tio̍h A-la̍p -cho̍k.

29A-má-le̍k -lâng tòa tī Nî-kek-hu tōe-khu; Hek -lâng, Iâ-pò͘-su -lâng, A-mô͘-lī -lâng tòa tī soaⁿ-tōe; Ka-lâm -lâng tòa tī hái-piⁿ kap Iok-tàn hô-piⁿ.”

30Ka-le̍k tī Mô͘-se ê bīn-chêng hō͘ jîn-bîn an-chēng--lo̍h-lâi, kóng, “Lán kóaⁿ-kín lâi-khì kong-chiàm hit-ê só͘-chāi; lán it-tēng ōe iâⁿ.”

31M̄-kú hiah-ê kap i chòe-hé khì ê lâng kóng, “Lán bô hoat-tō͘ kong-kek hiah-ê jîn-bîn; in pí lán khah ióng.”

32Hiah-ê khì thàm-cha ê lâng tùi Í-sek-lia̍t -lâng sàn-pò͘ iâu-giân, kóng, “Goán thàm-cha kiâⁿ--kè ê tōe sī thun-chia̍h lâng ê tōe, koh khòaⁿ--tio̍h ê chū-bîn lóng chin tōa-hàn.

33Goán khòaⁿ--tio̍h ê A-la̍p -cho̍k ê lâng chiū-sī tōa-hàn-lâng, in sī tōa-hàn-lâng ê hō͘-tāi; kap in pí--khí-lâi, lán chhin-chhiūⁿ chháu-meh, in khòaⁿ lán mā-sī án-ni.”

← Chapter 12 Jump to: Chapter 14 →

推荐阅读

注释 Numbers 注释书 → 灵修 Numbers 灵修指南 → 购买此圣经 TTVR (現代台語譯本羅馬字版) 研读本圣经 →