Numbers 18

Chinese TTVR (現代台語譯本羅馬字版)

← Chapter 17 Jump to: Chapter 19 →

1Siōng Chú tùi A-lûn kóng, “Lí kap lí ê kiáⁿ-jî, í-ki̍p lí ê chhin-cho̍k, tio̍h sêng-tam sèng-só͘ siū chhim-hoān ê chōe; lí kap lí ê kiáⁿ-jî tio̍h sêng-tam chè-si chit-hūn siū chhim-hoān ê chōe.

2Lí tio̍h chhōa Lī-bī chi-cho̍k ê lâng lâi, tī lí kap lí ê kiáⁿ-jî tī hōe-bō͘ ho̍k-sāi ê sî hia̍p-chō͘ lín.

3In tio̍h chòe lí ê chō͘-chhiú, chòe hōe-bō͘ ê khang-khè; m̄-kú m̄-thang óa-kūn sèng-só͘ ê khì-khū kap chè-tôaⁿ, chiah bián in kap lín lóng sí.

4In tio̍h kap lí chòe-hé tī hōe-bō͘ ho̍k-sāi, chòe hōe-bō͘ só͘-ū ê kang-chok; m̄-kú m̄-thang hō͘ pa̍t-ê chi-cho̍k ê lâng óa-kūn lín.

5Lín tio̍h hū-chek chip-hêng sèng-só͘ kap chè-tôaⁿ ê kang-chok, chiah bián góa ê siū-khì koh lîm-kàu Í-sek-lia̍t -lâng.

6Góa ū tùi Í-sek-lia̍t -lâng ê tiong-kan kéng lín ê chhin-cho̍k Lī-bī -lâng siúⁿ-sù lín, kui hō͘ Siōng Chú, thang pān-lí hōe-bō͘ ê kang-chok.

7Lí kap lí ê kiáⁿ-jî tio̍h tī chè-tôaⁿ kap hōe-bō͘ lāi-bīn, chīn lín chòe chè-si ê chit-hūn; chit-ê chè-si ê chit-hūn sī góa hō͘ lín ê lé-mi̍h. Nā ū pa̍t-ê chi-cho̍k ê lâng óa-kūn lín, tio̍h hō͘ i sí.”

8Siōng Chú koh kā A-lûn kóng, “Góa chiong Í-sek-lia̍t -lâng hun-pia̍t-choh-sèng hiàn hō͘ góa ê lé-mi̍h kau-tài lí; chiah-ê mi̍h lóng sù hō͘ lí kap lí ê hō͘-tāi chòe éng-oán ê hūn-gia̍h.

9Jîn-bîn hiàn hō͘ góa chì-sèng ê sò͘-chè, sio̍k-chōe-chè, pê-chōe-chè tiong-kan, bô tī chè-tôaⁿ ēng hé sio ê chè-mi̍h lóng kui hō͘ lí kap lí ê hō͘-tāi.

10Chiah-ê sī chì-sèng ê mi̍h, lí tio̍h sīn-tiōng lâi chia̍h; ta-po͘-lâng lóng thang chia̍h; lí tio̍h khòaⁿ chiah-ê mi̍h chòe sèng.

11“ Í-sek-lia̍t -lâng só͘ hiàn gia̍h-koân á-sī iô--kè ê chè-mi̍h, góa mā lóng sù hō͘ lí kap lí ê hō͘-tāi chòe éng-oán ê hūn-gia̍h; lí chhù-lāi só͘-ū chheng-khì ê lâng lóng thang chia̍h.

12“ Í-sek-lia̍t -lâng hiàn hō͘ góa Siōng Chú chho͘-se̍k ê mi̍h, chiū-sī siōng-hó ê iû, chiú, kap ngó͘-kok, góa lóng siúⁿ-sù lí.

13Chiah-ê lóng kui hō͘ lí; lí chhù-lāi só͘-ū lé-gî-siōng chheng-khì ê lâng lóng thang chia̍h.

14“ Í-sek-lia̍t -lâng éng-oán hiàn hō͘ Siōng Chú ê mi̍h, lóng beh kui hō͘ lí.

15“Só͘-ū hiàn hō͘ Siōng Chú thâu-chiūⁿ-siⁿ--ê, bô-lūn sī lâng á-sī cheng-siⁿ, lóng kui hō͘ lí; m̄-kú tōa-kiáⁿ it-tēng tio̍h sio̍k-hôe; bô chheng-khì ê cheng-siⁿ thâu-chiūⁿ-siⁿ--ê, mā tio̍h sio̍k-hôe.

16Beh sio̍k-hôe móa-ge̍h í-siōng--ê, tio̍h chiàu sèng-só͘ ê kong-chhìn, la̍p gō͘-cha̍p-chhit kong-khek ê gûn.

17M̄-kú thâu-chiūⁿ-siⁿ ê gû, mî-iûⁿ, soaⁿ-iûⁿ, lí m̄-thang sio̍k-hôe; chiah-ê sī sèng, in ê huih tio̍h hiù tī chè-tôaⁿ, iû tio̍h ēng hé sio chòe phang-phang ê chè hiàn hō͘ Siōng Chú.

18Hiah-ê bah, chhin-chhiūⁿ chiàⁿ-thúi í-ki̍p iô--kè ê heng-khám-bah, siâng-khoán lóng kui hō͘ lí.

19“ Í-sek-lia̍t -lâng gia̍h-koân hiàn hō͘ Siōng Chú sèng ê chè-mi̍h, góa lóng sù hō͘ lí kap lí ê hō͘-tāi chòe éng-oán ê hūn-gia̍h. “Chiah-ê sī Siōng Chú kap lí, lí ê hō͘-tāi só͘ li̍p éng-oán bōe hòe-tû ê iok.”

20Siōng Chú tùi A-lûn kóng, “Lí tī Í-sek-lia̍t -lâng ê kéng-lāi bô sán-gia̍p, tī jîn-bîn ê tiong-kan bô hūn-gia̍h. Góa chiū-sī lí ê hūn-gia̍h, lí ê sán-gia̍p.”

21Siōng Chú kóng, “ Í-sek-lia̍t -lâng ê cha̍p-hūn-chi̍t hōng-hiàn, góa í-keng sù hō͘ Lī-bī -lâng chòe sán-gia̍p, pò-tap in tī hōe-bō͘ ho̍k-sāi ê lô-khó͘.

22Kî-tha ê Í-sek-lia̍t -lâng m̄-thang koh óa-kūn hōe-bō͘, chiah bián in hoān-chōe lâi sí.

23Lī-bī -lâng chòe hōe-bō͘ ê kang-chok, tio̍h sêng-tam in ka-kī ê chōe; che beh chòe lín sè-sè-tāi-tāi éng-oán ê kui-lē. In tī Í-sek-lia̍t -lâng ê tiong-kan m̄-thang ū sán-gia̍p.

24In-ūi Í-sek-lia̍t -lâng chiong chhut-sán ê cha̍p-hūn-chi̍t chòe te̍k-pia̍t ê lé-mi̍h hōng-hiàn hō͘ Siōng Chú, góa chiong chiah-ê sù hō͘ Lī-bī -lâng chòe sán-gia̍p, só͘-í góa hoan-hù in, tī Í-sek-lia̍t -lâng ê tiong-kan m̄-thang ū sán-gia̍p.”

25Siōng Chú bēng-lēng Mô͘-se

26hoan-hù Lī-bī -lâng: Siōng Chú ū chiong Í-sek-lia̍t -lâng hiàn hō͘ I cha̍p-hūn-chi̍t ê hōng-hiàn, sù lín chòe sán-gia̍p; lín tio̍h tùi hit cha̍p-hūn-chi̍t ê tiong-kan koh the̍h cha̍p-hūn-chi̍t, chòe te̍k-pia̍t ê lé-mi̍h hiàn hō͘ Siōng Chú.

27Chit-ê te̍k-pia̍t ê lé-mi̍h tú chhin-chhiūⁿ choh-sit-lâng só͘ hiàn chho͘-se̍k ê be̍h-á, kap chiú-khut ê sin-chiú.

28Án-ni, lín tùi Í-sek-lia̍t -lâng tit--tio̍h ê cha̍p-hūn-chi̍t, the̍h-lâi chòe te̍k-pia̍t ê lé-mi̍h hiàn hō͘ Siōng Chú, chiong chiah-ê kui hō͘ chè-si A-lûn.

29Lín tio̍h tùi só͘ tit--tio̍h it-chhè ê lé-mi̍h, chiong siōng-hó--ê hun-pia̍t-choh-sèng chòe te̍k-pia̍t ê lé-mi̍h hiàn hō͘ Siōng Chú.

30Lí tio̍h tùi Lī-bī -lâng kóng: Lín í-keng tùi hit tiong-kan hōng-hiàn siōng-hó ê lé-mi̍h, che tú chhin-chhiūⁿ hiàn chho͘-se̍k ê be̍h-á, kap chiú-khut ê sin-chiú.

31Lín kap lín ê ka-koàn thang tī ta̍k só͘-chāi chia̍h lín hōng-hiàn só͘ chhun--ê; che sī lín eng-kai tit--tio̍h-ê, pò-tap lín tī hōe-bō͘ chòe kang ê lô-khó͘.

32Lín nā hōng-hiàn siōng-hó ê lé-mi̍h hō͘ Siōng Chú, jiân-āu chia̍h hōng-hiàn só͘ chhun--ê chiū bô chōe; nā bô seng hōng-hiàn siōng-hó ê lé-mi̍h, lín chiū-sī siat-to̍k Í-sek-lia̍t -lâng ê sèng-mi̍h, tio̍h siū chhú-sí.

← Chapter 17 Jump to: Chapter 19 →