Numbers 35

Chinese TTVR (現代台語譯本羅馬字版)

← Chapter 34 Jump to: Chapter 36 →

1Siōng Chú tī Iok-tàn hô-piⁿ, Iâ-lī-ko tùi-bīn ê Mô͘-ap pêng-goân tùi Mô͘-se kóng,

2“Lí tio̍h bēng-lēng Í-sek-lia̍t -lâng, tùi in tit--tio̍h ê sán-gia̍p pun kúi ê siâⁿ-tìn í-ki̍p chiu-ûi ê chháu-po͘ hō͘ Lī-bī -lâng.

3Hiah-ê siâⁿ-tìn beh hō͘ in khiā-khí, chháu-po͘ beh hō͘ in chhī gû, iûⁿ, cheng-siⁿ, kap in só͘-ū ê tōng-bu̍t.

4Lín hō͘ Lī-bī -lâng ê chháu-po͘, sī tùi siâⁿ-chhiûⁿ niû khí, ǹg gōa niû sì-pah gō͘-cha̍p kong-chhioh;

5chiū-sī ēng siâⁿ chòe tiong-sim, tang sai lâm pak ta̍k-pêng kok ū káu-pah kong-chhioh ê sì-kak-hêng khu-he̍k; siâⁿ-tìn chiu-ûi ê tōe beh hō͘ Lī-bī -lâng chòe chhī cheng-siⁿ ê só͘-chāi.

6Lín hō͘ Lī-bī -lâng ê siâⁿ-tìn tiong-kan, tio̍h siat-li̍p la̍k ê chòe pī-lān-siâⁿ, hō͘ thâi-sí-lâng--ê ōe-tàng tô-lān khì hia. Chit la̍k ê siâⁿ-tìn í-gōa, lín tio̍h koh hō͘ in sì-cha̍p-jī ê siâⁿ-tìn.

7Lín tio̍h hō͘ Lī-bī -lâng sì-cha̍p-poeh ê siâⁿ-tìn, pau-koat in chiu-ûi ê chháu-po͘ lóng tio̍h hō͘ in.

8Í-sek-lia̍t -lâng tùi sán-gia̍p ê tiong-kan pun hō͘ Lī-bī -lâng ê siâⁿ-tìn, thó͘-tōe tōa ê chi-cho̍k chiū chhut khah chōe, thó͘-tōe sió ê chi-cho̍k chiū chhut khah chió; ta̍k chi-cho̍k chiàu ka-kī tit--tio̍h sán-gia̍p ê chōe-chió, chiong siâⁿ-tìn pun hō͘ Lī-bī -lâng.”

9Siōng Chú tùi Mô͘-se kóng,

10“Lí tio̍h án-ni bēng-lēng Í-sek-lia̍t -lâng: Lín kè Iok-tàn-hô, chìn-ji̍p Ka-lâm -tōe,

11tio̍h chí-tēng kúi ê siâⁿ chòe pī-lān-siâⁿ, hō͘ gō͘-sat-lâng--ê thang cháu-khì hia.

12Chiah-ê siâⁿ thang chòe lín tô-pī pò oan-siû ê lâng ê siâⁿ, hō͘ gō͘-sat-lâng--ê tī hōe-chiòng bīn-chêng siū sím-phòaⁿ í-chêng, bōe hō͘ lâng thâi-sí.

13Lín tio̍h chí-tēng la̍k chō siâⁿ chòe pī-lān-siâⁿ;

14Iok-tàn-hô tang-pêng saⁿ chō, Ka-lâm -tōe saⁿ chō.

15Chit la̍k chō siâⁿ beh hō͘ Í-sek-lia̍t -lâng, kap chiām-sî á-sī tn̂g-kî tòa tī in tiong-kan ê gōa-cho̍k-lâng, chòe pī-lān-siâⁿ, hō͘ gō͘-sat-lâng--ê thang tô-cháu khì hia.

16“Nā ū lâng ēng thih-khì kā lâng phah-sí, i chiū-sī kò͘-ì thâi-lâng; kò͘-ì thâi lâng--ê, it-tēng tio̍h kā i chhú-sí.

17Nā ū lâng ēng ōe hō͘ lâng sí ê chio̍h-thâu phah-sí lâng, i chiū-sī kò͘-ì hoān-chōe; kò͘-ì phah-sí lâng--ê, it-tēng tio̍h kā i chhú-sí.

18Nā the̍h ōe hō͘ lâng sí ê chhâ-khì kā lâng phah-sí, i chiū-sī kò͘-ì phah-sí lâng; kò͘-ì phah-sí lâng--ê, it-tēng tio̍h kā i chhú-sí.

19Hō͘ lâng phah--sí hit-ê lâng ê chì-chhin tio̍h chhin-sin kā hiong-siú thâi--sí; chi̍t-ē tú-tio̍h i, chiū thang hō͘ i sí.

20“Nā ū lâng in-ūi oàn-hūn lâng kā lâng chhia-tó, á-sī kò͘-ì ēng mi̍h-kiāⁿ kā lâng tìm, hō͘ hit-ê lâng sí;

21á-sī in-ūi khioh-hūn ēng chhiú kā lâng phah-sí, i chiū-sī kò͘-ì phah-sí lâng; kò͘-ì phah-sí lâng--ê it-tēng tio̍h kā i chhú-sí. Hō͘ lâng phah--sí hit-ê lâng ê chì-chhin chi̍t-ē tú-tio̍h hiong-siú, chiū thang hō͘ i sí.

22“M̄-kú, nā ū lâng bô-ì-tiong kā lâng chhia-tó, á-sī ēng mi̍h-kiāⁿ tìm-tio̍h lâng,

23á-sī tī bô khòaⁿ--kìⁿ ê sî, á-sī kap tùi-hong bô oan-siû, mā bô ì-sù beh hāi-sí tùi-hong, m̄-kú soah ēng ōe hō͘ lâng sí ê chio̍h-thâu kā lâng tìm-sí,

24hōe-chiòng tio̍h chiàu kui-lē, tī phah-sí-lâng--ê kap pò oan-siû--ê tiong-kan sím-phòaⁿ.

25Hōe-chiòng tio̍h kiù hit-ê gō͘-sat-lâng--ê thoat-lī sí-chiá ê chì-chhin, kā i sàng tò-khì i cháu-khì bih ê pī-lān-siâⁿ, tī siū boah-iû siat-li̍p ê tōa-chè-si sí í-chêng hō͘ i tòa tī hia.

26M̄-kú gō͘-sat-lâng--ê it-tàn lī-khui pī-lān-siâⁿ,

27hō͘ lâng phah--sí hit-ê lâng ê chì-chhin nā tī siâⁿ-gōa tú-tio̍h i, kā i phah-sí, bô sǹg ū-chōe.

28In-ūi hit-ê gō͘-sat-lâng--ê tio̍h tī tōa-chè-si sí í-chêng, lóng tòa tī pī-lān-siâⁿ. Tōa-chè-si sí í-āu, i chiah thang tńg-khì i ka-kī ke-gia̍p ê tōe.

29Bô-lūn lín tòa tī sím-mi̍h só͘-chāi, che beh chòe lín sè-sè-tāi-tāi éng-oán ê kui-lē.

30“Nā ū lâng siū khòng-kò thâi-sí lâng, tio̍h ū nn̄g ê í-siōng ê chèng-jîn choh-chèng, chiah thang kā i chhú-sí; nā chí-ū chi̍t ê chèng-jîn, m̄-thang kā i soan-phòaⁿ sí-chōe.

31Phòaⁿ sí-chōe ê hiong-siú bōe-ēng-tit ēng sio̍k-kim sio̍k-hôe sìⁿ-miā; it-tēng tio̍h kā i chhú-sí.

32Nā ū lâng cháu-khì pī-lān-siâⁿ, bōe-ēng-tit siu sio̍k-kim hō͘ i tī tōa-chè-si sí í-chêng tò-khì i ê pún-tōe khiā-khí.

33Lín m̄-thang phah lâ-sâm lín khiā-khí ê tōe; in-ūi lâu lâng ê huih chiū-sī phah lâ-sâm thó͘-tōe. Nā ū lâng thâi-sí lâng, tio̍h ēng i ê miā pê miā lâu i ê huih, hit-ê tōe chiah ōe-tàng tit-tio̍h kiat-chēng.

34Lín m̄-thang phah lâ-sâm lín khiā-khí ê thó͘-tōe, in-ūi góa Siōng Chú mā tiàm tī chit-ê tōe, tòa tī Í-sek-lia̍t -lâng ê tiong-kan.”

← Chapter 34 Jump to: Chapter 36 →