Numbers 12

Chinese TTVR (現代台語譯本羅馬字版)

← Chapter 11 Jump to: Chapter 13 →

1Bí-lī-an kap A-lûn phoe-phêng Mô͘-se, in-ūi i chhōa Kó͘-si̍t lú-chú chòe bó͘. In kóng,

2“Siōng Chú kiám kan-ta thong-kè Mô͘-se kóng-ōe? Kiám bô mā thong-kè goán kóng-ōe?” Chiah-ê ōe Siōng Chú ū thiaⁿ--tio̍h.

3Mô͘-se choh-lâng hui-siông khiam-pi, iâⁿ-kè sè-kan só͘-ū ê lâng.

4Hut-jiân, Siōng Chú tùi Mô͘-se, A-lûn, kap Bí-lī-an kóng, “Lín saⁿ ê lóng chhut-lâi hōe-bō͘ chia.” In saⁿ ê chiū chhut--lâi.

5Siōng Chú tī hûn-thiāu tiong kàng-lîm, khiā tī hōe-bō͘ mn̂g-kháu, kiò A-lûn kap Bí-lī-an; in nn̄g ê chiū kiâⁿ chìn-chêng.

6Siōng Chú kóng, “Lín tio̍h thiaⁿ góa ê ōe. Lín tiong-kan nā ū sian-ti, góa Siōng Chú sī ēng īⁿ-siōng hō͘ in bat góa, thong-kè bîn-bāng kap in kóng-ōe.

7M̄-kú góa ê po̍k-jîn Mô͘-se m̄-sī án-ni; góa ū chiong góa ê choân-ke kau-tài i.

8Góa sī kap i bīn-tùi-bīn kóng-ōe; bêng-bêng kóng, i m̄-bián ioh. I sīm-chì ōe khòaⁿ-kìⁿ góa ê hêng-chōng. Lín ná káⁿ phoe-phêng góa ê po̍k-jîn Mô͘-se?”

9Siōng Chú tùi in siū-khì, chiū lī-khui.

10Hûn tùi hōe-bō͘ ê téng-bīn sóa-khui; Bí-lī-an hut-jiân khí giâm-tiōng ê phê-hu-pīⁿ, i ê phê-hu chhin-chhiūⁿ seh hiah pe̍h. A-lûn khòaⁿ-tio̍h Bí-lī-an khí giâm-tiōng ê phê-hu-pīⁿ,

11chiū tùi Mô͘-se kóng, “Góa ê chú ah, kiû lí m̄-thang in-ūi goán gû-gōng hoān-chōe, hō͘ goán siū hêng-hoa̍t.

12Kiû lí m̄-thang hō͘ i chhin-chhiūⁿ chhut bú-thai chiū nōa chi̍t-pòaⁿ ê sí-the.”

13Mô͘-se chiū ai-kiû Siōng Chú, kóng, “Siōng-tè ah, kiû lí i-hó Bí-lī-an.”

14Siōng Chú tùi Mô͘-se kóng, “I ê lāu-pē nā kā i phùi chhùi-nōa tī bīn--ni̍h, i kiám m̄-bián kiàn-siàu chhit ji̍t? Taⁿ tio̍h kā i keh-lī tī iâⁿ-gōa chhit ji̍t, jiân-āu chiah thang hō͘ i tńg--lâi.”

15Tùi án-ni, Bí-lī-an chiū hō͘ lâng keh-lī tī iâⁿ-gōa chhit ji̍t; jîn-bîn bô khí-thêng, thèng-hāu kàu Bí-lī-an tò--lâi.

16Āu-lâi, jîn-bîn tùi Hap-sé-lio̍k khí-thêng, kàu Pa-lân ê khòng-iá chat-iâⁿ.

← Chapter 11 Jump to: Chapter 13 →