Numbers 31 — Chinese TTVR (現代台語譯本羅馬字版)

1Siōng Chú tùi Mô͘-se kóng,

2“Lí tio̍h khì kong-táⁿ Bí-tiân -lâng, thòe Í-sek-lia̍t -lâng pò-siû; āu-lâi lí ōe tò-khì lí ê lia̍t-chó͘ hia.”

3Mô͘-se chiū bēng-lēng Í-sek-lia̍t -lâng, kóng, “Lín tio̍h phài lâng tòa kun-khì khì kong-táⁿ Bí-tiân -lâng, ūi Siōng Chú pò-siû.

4Lín ta̍k chi-cho̍k tio̍h phài chi̍t-chheng lâng chhut-khì kau-chiàn.”

5Í-sek-lia̍t ta̍k chi-cho̍k chiū soán chi̍t-chheng lâng, kiōng chi̍t-bān nn̄g-chheng lâng, tòa kun-khì beh khì kau-chiàn.

6Mô͘-se phài chè-si Í-lī-a-sat ê kiáⁿ Hui-nî-hap tòa sèng-só͘ ê khì-khū kap lat-pah, chhōa chiah-ê Í-sek-lia̍t -lâng chhut-khì kau-chiàn.

7In chiàu Siōng Chú tùi Mô͘-se ê bēng-lēng, khì kap Bí-tiân -lâng kau-chiàn, chiong Bí-tiân ê ta-po͘-lâng choân-pō͘ thâi-sí,

8pau-koat Í-bī, Lī-kim, So͘-ní, Hō͘-ní, Lī-pa chit gō͘ ê Bí-tiân -lâng ê ông, mā thâi-sí Pí-ní ê kiáⁿ Pa-lân.

9Í-sek-lia̍t -lâng lia̍h Bí-tiân ê hū-lú kap gín-á, chhiúⁿ in só͘-ū ê cheng-siⁿ, gû iûⁿ, kap châi-bu̍t,

10pàng-hé sio in khiā-khí ê siâⁿ-tìn kap iâⁿ-tōe.

11Í-sek-lia̍t -lâng chiong in lia̍h--tio̍h ê lâng, chhiúⁿ--lâi ê cheng-siⁿ, kap só͘-ū ê chiàn-lī-phín,

12tòa-lâi Iok-tàn hô-piⁿ, Iâ-lī-ko tùi-hōaⁿ ê Mô͘-ap pêng-goân ê iâⁿ-tōe, kau hō͘ Mô͘-se, chè-si Í-lī-a-sat, kap Í-sek-lia̍t hōe-chiòng.

13Mô͘-se kap chè-si Í-lī-a-sat, í-ki̍p hōe-chiòng só͘-ū ê siú-léng lóng khì iâⁿ-gōa gêng-chiap Í-sek-lia̍t ê pō͘-tūi.

14Mô͘-se tùi kau-chiàn tńg--lâi ê kun-koaⁿ, chiū-sī hiah-ê chhōa chi̍t-chheng ê lâng kap chi̍t-pah ê lâng ê kun-koaⁿ, hoat siū-khì,

15kā in kóng, “Lín beh hō͘ chiah-ê cha-bó͘-lâng oa̍h--teh sī--bô?

16Lín kiám bōe-kì--tit, chiū-sī chiah-ê cha-bó͘-lâng chiàu Pa-lân ê kè-bô͘, tī Pí-ní ín-iú Í-sek-lia̍t -lâng pōe-poān Siōng Chú, hō͘ un-e̍k lîm-kàu Siōng Chú ê hōe-chiòng?

17Hiān-chāi, lín tio̍h kā só͘-ū ê ta-po͘ gín-á, í-ki̍p hiah-ê bat kap ta-po͘-lâng ū sèng-koan-hē ê cha-bó͘-lâng lóng thâi--sí.

18Hiah-ê m̄-bat kap ta-po͘-lâng ū sèng-koan-hē ê cha-bó͘ gín-á, lín ōe-ēng-tit ūi ka-kī lâu in ê sìⁿ-miā.

19Lín kap hiah-ê hu-ló͘ tio̍h lâu tī iâⁿ-gōa chhit ji̍t. Nā ū lâng thâi-sí lâng, á-sī bong-tio̍h si-thé, tio̍h tī tē-saⁿ ji̍t kap tē-chhit ji̍t kiat-chēng ka-kī; hiah-ê hu-ló͘ mā tio̍h án-ni chòe.

20Lín koh tio̍h kiat-chēng ta̍k-niá saⁿ, í-ki̍p só͘-ū ēng phê, soaⁿ-iûⁿ-mn̂g, chhâ chòe ê mi̍h-kiāⁿ.”

21Chè-si Í-lī-a-sat tùi kau-chiàn tò--lâi ê kun-peng kóng, “Siōng Chú bēng-lēng Mô͘-se ê lu̍t-hoat, ū chi̍t ê tiâu-lē án-ni kóng:

22Ōe-kham-tit hé sio ê mi̍h-kiāⁿ, chhin-chhiūⁿ kim, gûn, tâng, thih, siah, iân, tio̍h ēng hé kā in sio, jiân-āu koh ēng kiat-chēng ê chúi sóe, hō͘ in chheng-khì. Kî-tha bōe-kham-tit hé sio ê mi̍h-kiāⁿ, tio̍h ēng chúi kiat-chēng.

24Tē-chhit ji̍t, tio̍h sóe lín ê saⁿ, lín chiah chheng-khì, thang ji̍p iâⁿ-tōe.”

25Siōng Chú tùi Mô͘-se kóng,

26“Lí kap chè-si Í-lī-a-sat, í-ki̍p hōe-chiòng ê léng-siù, tio̍h kè-sǹg lia̍h--lâi ê hu-ló͘ kap chhiúⁿ--lâi ê cheng-siⁿ ê chóng-sò͘.

27Kā lia̍h--lâi-ê pun-chòe nn̄g hūn, chi̍t-pòaⁿ hō͘ chhut-khì kau-chiàn ê ióng-sū, chi̍t-pòaⁿ hō͘ hōe-chiòng.

28Koh tùi beh pun hō͘ kun-peng ê hu-ló͘, gû, lû, iûⁿ ê tiong-kan, múi gō͘-pah thiu chi̍t hiàn hō͘ Siōng Chú;

29chiong chiah-ê kau hō͘ chè-si Í-lī-a-sat, chòe te̍k-pia̍t ê lé-mi̍h hiàn hō͘ Siōng Chú.

30Koh tio̍h tùi beh pun hō͘ Í-sek-lia̍t -lâng hit chi̍t-pòaⁿ ê hu-ló͘, gû, lû, iûⁿ, gō͘-cha̍p thiu chi̍t kau hō͘ hū-chek kò͘-siú Siōng Chú hōe-bō͘ ê Lī-bī -lâng.”

31Mô͘-se kap chè-si Í-lī-a-sat chiū chiàu Siōng Chú tùi Mô͘-se ê bēng-lēng chòe.

32Kun-peng ka-kī lâu--lo̍h-lâi ê chiàn-lī-phín í-gōa, ū iûⁿ la̍k-cha̍p-chhit-bān gō͘-chheng chiah,

33gû chhit-bān nn̄g-chheng chiah,

34lû la̍k-bān chi̍t-chheng chiah,

35m̄-bat kap ta-po͘-lâng ū sèng-koan-hē ê lú-chú saⁿ-bān nn̄g-chheng lâng.

36Chhut-khì kau-chiàn hiah-ê kun-peng tit-tio̍h hit chi̍t-pòaⁿ, kiōng ū iûⁿ saⁿ-cha̍p-saⁿ-bān chhit-chheng gō͘-pah chiah,

37tùi hit tiong-kan chhú-lâi hiàn hō͘ Siōng Chú ê, la̍k-pah chhit-cha̍p-gō͘ chiah;

38gû ū saⁿ-bān la̍k-chheng chiah, kî-tiong hiàn hō͘ Siōng Chú ê, chhit-cha̍p-jī chiah;

39lû ū saⁿ-bān khòng gō͘-pah chiah, kî-tiong hiàn hō͘ Siōng Chú ê la̍k-cha̍p-it chiah;

40lâng ū chi̍t-bān la̍k-chheng ê, tùi hit tiong-kan chhú-lâi hiàn hō͘ Siōng Chú ê saⁿ-cha̍p-jī lâng.

41Mô͘-se chiàu Siōng Chú tùi i ê bēng-lēng, chiong chiah-ê kau hō͘ chè-si Í-lī-a-sat, chòe te̍k-pia̍t ê lé-mi̍h hiàn hō͘ Siōng Chú.

42Mô͘-se chiong hiah-ê kun-peng chhiúⁿ--lâi ê chiàn-lī-phín pun hō͘ Í-sek-lia̍t -lâng ê hit chi̍t-pòaⁿ,

43ū iûⁿ saⁿ-cha̍p-saⁿ-bān chhit-chheng gō͘-pah chiah,

44gû saⁿ-bān la̍k-chheng chiah,

45lû saⁿ-bān khòng gō͘-pah chiah,

46kap lâng chi̍t-bān la̍k-chheng ê.

47Bô-lūn lâng á-sī cheng-siⁿ, Mô͘-se lóng chiàu Siōng Chú tùi i ê bēng-lēng, gō͘-cha̍p thiu chi̍t, kau hō͘ hū-chek kò͘-siú Siōng Chú hōe-bō͘ ê Lī-bī -lâng.

48Chhōa chi̍t-chheng ê kap chhōa chi̍t-pah ê kun-peng ê koaⁿ-tiúⁿ lâi kìⁿ Mô͘-se,

49tùi i kóng, “Lí ê po̍k-jîn í-keng tiám-sǹg chiah-ê kun-peng ê chóng-sò͘, liân chi̍t ê to bô chiàn-sí.

50Taⁿ, goán chiong ta̍k-ê lâng tit--tio̍h ê kim-khì, chhin-chhiūⁿ kha-liān-á, chhiú-khoân, phah-chòe ìn-á ê chhiú-chí, hī-kau, phoa̍h-liān, lóng tòa-lâi hiàn hō͘ Siōng Chú, thang ūi goán ka-kī sio̍k-chōe.”

51Mô͘-se kap chè-si Í-lī-a-sat chiū chiap-siū in phah-chòe ta̍k-khoán chong-sek-phín ê kim-á.

52Chiah-ê koaⁿ-tiúⁿ hiàn hō͘ Siōng Chú chòe te̍k-pia̍t lé-mi̍h ê kim-á, chóng-kiōng tāi-iok ū nn̄g-pah kong-kun.

53Ta̍k-ê kun-peng chhiúⁿ--tio̍h ê chiàn-lī-phín, lóng kui hō͘ in ka-kī.

54Mô͘-se kap chè-si Í-lī-a-sat chiong chiah-ê koaⁿ-tiúⁿ hōng-hiàn ê kim-á tòa-ji̍p hōe-bō͘, hō͘ Siōng Chú put-sî ōe-kì-tit Í-sek-lia̍t -lâng.