Numbers 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Ē-bīn chiah-ê sī Siōng Chú tī Se-nāi-soaⁿ tùi Mô͘-se kóng-ōe ê sî, A-lûn kap Mô͘-se ê hō͘-tāi:

2A-lûn ū sì ê kiáⁿ: tōa-kiáⁿ Ná-tap, koh ū A-pí-hō͘, Í-lī-a-sat, Í-tha-má;

3in lóng siū boah-iû siat-li̍p chòe chè-si, hū-chek chè-si ê chit-hūn.

4Ná-tap kap A-pí-hō͘ tī Se-nāi ê khòng-iá, tī Siōng Chú ê bīn-chêng hiàn bô sîn-sèng ê hé, chiū hō͘ Siōng Chú phah-sí; in bô kiáⁿ-jî. Í-lī-a-sat kap Í-tha-má tī in lāu-pē A-lûn oa̍h--teh ê sî, chiū tam-jīm chè-si.

5Siōng Chú tùi Mô͘-se kóng,

6“Lí kiò Lī-bī chi-cho̍k lâi góa chia, lâi hia̍p-chō͘ chè-si A-lûn.

7In tio̍h thòe A-lûn kap hōe-chiòng tī hōe-bō͘ chêng chip-hêng jīm-bū, pān-lí hōe-bō͘ ê sū.

8In tio̍h kò͘-siú hōe-bō͘ só͘-ū ê khì-khū, ūi-tio̍h Í-sek-lia̍t -lâng chip-hêng jīm-bū, pān-lí hōe-bō͘ ê sū.

9Lí tio̍h chí-phài Lī-bī -lâng hia̍p-chō͘ A-lûn kap i ê kiáⁿ; che sī in tī Í-sek-lia̍t -lâng tiong-kan siū chí-phài î-it ê jīm-bū.

10Lí tio̍h hun-phài A-lûn kap i ê kiáⁿ chip-hêng chè-si ê chit-bū; kî-tha ê lâng nā kūn-óa--lâi, it-tēng tio̍h hō͘ i sí.”

11Siōng Chú koh hoan-hù Mô͘-se kóng,

12“Góa tùi Í-sek-lia̍t -lâng ê tiong-kan kéng Lī-bī -lâng, tāi-thòe Í-sek-lia̍t -lâng só͘-ū thâu-chiūⁿ-siⁿ ê tōa-kiáⁿ; Lī-bī -lâng sī góa ê,

13in-ūi it-chhè ê tōa-kiáⁿ lóng sī góa ê. Góa phah-sí Ai-ki̍p -lâng só͘-ū thâu-chiūⁿ-siⁿ--ê hit-ji̍t, chiū chiong Í-sek-lia̍t tiong só͘-ū thâu-chiūⁿ-siⁿ--ê, bô-lūn sī lâng á-sī cheng-siⁿ, lóng hun-pia̍t-choh-sèng kui-sio̍k góa; in sī góa ê. Góa sī Siōng Chú.”

14Siōng Chú tī Se-nāi ê khòng-iá hoan-hù Mô͘-se, kóng,

15“Lí tio̍h chiàu Lī-bī -lâng ê chong-cho̍k, ka-cho̍k tiám-sǹg in ê jîn-kháu; móa-ge̍h í-siōng ê ta-po͘ gín-á lóng tio̍h sǹg chāi-lāi.”

16Mô͘-se chiū chiàu Siōng Chú tùi i ê bēng-lēng, tiám-sǹg Lī-bī -lâng ê jîn-kháu.

17Lī-bī ū saⁿ ê kiáⁿ, chiū-sī Kek-sūn, Ko-hat, kap Bí-la-lī.

18Kek-sūn ê kiáⁿ, chiàu in ê chong-cho̍k, ū Li̍p-nî kap Sī-múi.

19Ko-hat ê kiáⁿ, chiàu in ê chong-cho̍k, ū Àm-lân, Í-su-hap, Hi-pek-lûn, kap O͘-siat.

20Bí-la-lī ê kiáⁿ, chiàu in ê chong-cho̍k, ū Boat-lī kap Bō͘-sī. In sī Lī-bī chi-cho̍k ta̍k chong-cho̍k ê chó͘-sian.

21Kek-sūn ê chong-cho̍k ū Li̍p-nî kap Sī-múi nn̄g ê ka-cho̍k.

22In móa-ge̍h í-siōng ê ta-po͘-lâng tiám-sǹg liáu, jîn-sò͘ kiōng chhit-chheng gō͘-pah miâ.

23Kek-sūn ê chong-cho̍k tio̍h tī hōe-bō͘ ê sai-pêng, chiū-sī hōe-bō͘ ê āu-bīn chat-iâⁿ.

24Kek-sūn chong-cho̍k ê siú-léng sī La-i-le̍k ê kiáⁿ Í-lī-ngá-sat.

25Kek-sūn ê kiáⁿ-sun tio̍h hū-chek kò͘-siú hōe-bō͘, pò͘-phâng, pò͘-phâng ê kòa, hōe-bō͘ ê mn̂g-lî,

26hōe-bō͘ kap chè-tôaⁿ chiu-ûi ê tiâⁿ ê ûi kap mn̂g-lî, í-ki̍p teh ēng ê soh.

27Ko-hat chong-cho̍k ū Àm-lân, Í-su-hap, Hi-pek-lûn, kap O͘-siat sì ê ka-cho̍k.

28In tio̍h hū-chek chéng-lí sèng-só͘; móa-ge̍h í-siōng ê ta-po͘-lâng tiám-sǹg liáu, jîn-sò͘ kiōng poeh-chheng la̍k-pah miâ.

29Ko-hat chong-cho̍k tio̍h tī hōe-bō͘ ê lâm-pêng chat-iâⁿ.

30Ko-hat chong-cho̍k ê siú-léng sī O͘-siat ê kiáⁿ Í-lī-sat-hoán.

31Ko-hat ê kiáⁿ-sun tio̍h hū-chek kò͘-siú iok-kūi, pâi hiàn-chè ê piáⁿ ê toh, teng-tâi, chè-tôaⁿ kap hiuⁿ-tôaⁿ, chè-si tī sèng-só͘ lāi-bīn teh ēng ê khì-khū, mn̂g-lî, kap só͘-ū teh ēng ê mi̍h-kiāⁿ.

32Chè-si A-lûn ê kiáⁿ Í-lī-a-sat chòe Lī-bī ta̍k chong-cho̍k ê siú-léng ê thâu, hū-chek kàm-tok só͘-ū kò͘-siú sèng-só͘ ê lâng.

33Bí-la-lī chong-cho̍k ū Boat-lī kap Bō͘-sī nn̄g ê ka-cho̍k.

34In móa-ge̍h í-siōng ê ta-po͘-lâng tiám-sǹg liáu, jîn-sò͘ kiōng la̍k-chheng nn̄g-pah miâ.

35Bí-la-lī chong-cho̍k ê siú-léng sī A-pí-hâi ê kiáⁿ So͘-lia̍t; in tio̍h tī hōe-bō͘ ê pak-pêng chat-iâⁿ.

36Bí-la-lī ê kiáⁿ-sun tio̍h hū-chek kò͘-siú hōe-bō͘ ê pán, hoâiⁿ-kông, thiāu, ū sún-khang ê chō, só͘-ū ê khì-khū, kap só͘-ū teh ēng ê mi̍h-kiāⁿ;

37koh tio̍h kò͘-siú tiâⁿ chiu-ûi ê thiāu, ū sún-khang ê chō, í-ki̍p khi̍t-á kap soh-á.

38Tī hōe-bō͘ ê tang-pêng, chiū-sī tī hōe-bō͘ ǹg ji̍t chhut hit-pêng, Mô͘-se, A-lûn kap i hiah-ê kiáⁿ tī hia chat-iâⁿ; in tāi-thòe só͘-ū ê Í-sek-lia̍t -lâng hū-chek kò͘-siú sèng-só͘; kî-tha ê lâng nā kūn-óa--lâi, it-tēng tio̍h hō͘ i sí.

39Mô͘-se kap A-lûn chiàu Siōng Chú ê bēng-lēng tiám-sǹg Lī-bī -lâng; chiàu in ê chong-cho̍k, móa-ge̍h í-siōng ê ta-po͘-lâng jîn-sò͘ kiōng nn̄g-bān nn̄g-chheng miâ.

40Siōng Chú kā Mô͘-se kóng, “Lí tio̍h tiám-sǹg Í-sek-lia̍t -lâng móa-ge̍h í-siōng thâu-chiūⁿ-siⁿ ê ta-po͘-lâng ê jîn-sò͘, chō in ê miâ-chheh.

41Góa sī Siōng Chú. Lí tio̍h kéng-soán Lī-bī -lâng kui-sio̍k góa, tāi-thòe Í-sek-lia̍t -lâng só͘-ū ê tōa-kiáⁿ; mā chhú Lī-bī -lâng ê cheng-siⁿ, tāi-thòe Í-sek-lia̍t -lâng só͘ ū thâu-chúi kang ê cheng-siⁿ.”

42Mô͘-se chiū chiàu Siōng Chú ê bēng-lēng, tiám-sǹg Í-sek-lia̍t -lâng só͘-ū ê tōa-kiáⁿ.

43Chiàu miâ-chheh, móa-ge̍h í-siōng ê tōa-kiáⁿ, jîn-sò͘ kiōng nn̄g-bān nn̄g-chheng nn̄g-pah chhit-cha̍p-saⁿ miâ.

44Siōng Chú hoan-hù Mô͘-se, kóng,

45“Lí tio̍h kéng-soán Lī-bī -lâng tāi-thòe Í-sek-lia̍t -lâng só͘-ū ê tōa-kiáⁿ, koh chhú Lī-bī -lâng ê cheng-siⁿ tāi-thòe Í-sek-lia̍t ê cheng-siⁿ; án-ni, Lī-bī -lâng chiū kui-sio̍k góa. Góa sī Siōng Chú.

46Í-sek-lia̍t -lâng ê tōa-kiáⁿ pí Lī-bī -lâng ke nn̄g-pah chhit-cha̍p-saⁿ ê, lí tio̍h kā in sio̍k-hôe;

47chiàu sèng-só͘ ê kong-chhìn, chi̍t ê lâng ê sio̍k-kim sī gō͘-cha̍p-chhit kong-khek ê gûn.

48Hiah-ê ke--chhut-lâi ê lâng ê sio̍k-kim, lí tio̍h kau hō͘ A-lûn kap i ê kiáⁿ.”

49Mô͘-se chiū tùi hō͘ Lī-bī -lâng sio̍k-hôe í-gōa hiah-ê ke--chhut-lâi ê lâng the̍h sio̍k-kim.

50Tùi Í-sek-lia̍t -lâng ê tōa-kiáⁿ the̍h ê sio̍k-kim, chiàu sèng-só͘ ê kong-chhìn, tāi-iok ū gûn cha̍p-gō͘ kong-kun.

51Mô͘-se chiàu Siōng Chú ê bēng-lēng, chiong chiah-ê sio̍k-kim kau hō͘ A-lûn kap i ê kiáⁿ.

← Chapter 2 Jump to: Chapter 4 →