Numbers 15

Chinese TTVR (現代台語譯本羅馬字版)

← Chapter 14 Jump to: Chapter 16 →

1Siōng Chú bēng-lēng Mô͘-se

2tio̍h hoan-hù Í-sek-lia̍t -lâng: Lín khì kàu góa siúⁿ-sù lín khiā-khí ê tōe,

3nā beh tùi gû-kûn iûⁿ-kûn tiong-kan chhú-lâi chòe phang-phang ê chè-mi̍h, ēng hé sio hiàn hō͘ Siōng Chú, bô-lūn sī sio-hòa-chè á-sī pa̍t-khoán ê chè, sī siā-goān á-sī kam-sim hiàn ê chè, á-sī choeh-kî ê chè,

4ta̍k-chiah iûⁿ-á tio̍h phòe ēng chi̍t kong-kun iù mī-hún chhiau chi̍t kong-seng iû chòe ê sò͘-chè, í-ki̍p chi̍t kong-seng ê chiú chòe tiān-chiú-chè. Bô-lūn sī sio-hòa-chè á-sī pa̍t-khoán ê chè, hōng-hiàn ê lâng lóng tio̍h chiàu án-ni hiàn chè-mi̍h hō͘ Siōng Chú.

6Hiàn mî-iûⁿ-káng, tio̍h phòe ēng nn̄g kong-kun ê iù mī-hún chhiau chi̍t kong-seng-pòaⁿ ê iû chòe ê sò͘-chè;

7koh ēng chi̍t kong-seng-pòaⁿ ê chiú chòe tiān-chiú-chè, ēng hé sio chòe phang-phang ê chè hiàn hō͘ Siōng Chú.

8Lí nā hiàn gû-káng-á chòe sio-hòa-chè á-sī pa̍t-khoán ê chè, lâi siā-goān á-sī chòe pêng-an-chè hiàn hō͘ Siōng Chú,

9tio̍h ēng saⁿ kong-kun ê iù mī-hún chhiau nn̄g kong-seng ê iû chòe sò͘-chè, kap gû-káng-á chòe-hé hiàn;

10koh ēng nn̄g kong-seng ê chiú chòe tiān-chiú-chè, ēng hé sio chòe phang-phang ê chè hiàn hō͘ Siōng Chú.

11Hiàn múi chi̍t chiah gû-káng, mî-iûⁿ-káng, mî-iûⁿ-á, á-sī soaⁿ-iûⁿ-á, lóng tio̍h chiàu án-ni hōng-hiàn.

12Bô-lūn lí hōng-hiàn kúi chiah, múi chi̍t chiah tio̍h chiàu án-ni pān-lí.

13Ta̍k-ê chāi-tōe chhut-sì ê Í-sek-lia̍t -lâng, nā beh hiàn ēng hé sio ê phang-phang ê chè hō͘ Siōng Chú, lóng tio̍h chiàu án-ni pān-lí.

14Nā ū gōa-cho̍k-lâng lâi tòa tī lín tiong-kan, put-koán in sī chiām-sî, á-sī sè-sè-tāi-tāi tòa tī lín tiong-kan, in nā beh hiàn ēng hé sio ê phang-phang ê chè hō͘ Siōng Chú, lín án-chóaⁿ hiàn, in mā tio̍h chiàu án-ni chòe.

15Koan-hē hōe-chiòng, bô-lūn sī lín á-sī tòa tī lín tiong-kan ê gōa-cho̍k-lâng, lóng tio̍h siú kâng-khoán ê kui-lē, che beh chòe lín sè-sè-tāi-tāi éng-oán ê kui-lē; tī Siōng Chú ê bīn-chêng, lín án-chóaⁿ pān-lí, in mā tio̍h chiàu án-ni chòe.

16Lín kap tòa tī lín tiong-kan ê gōa-cho̍k-lâng, tio̍h chun-siú siâng-khoán ê lu̍t-hoat, siâng-khoán ê kui-lē.

17Siōng Chú koh bēng-lēng Mô͘-se

18tio̍h hoan-hù Í-sek-lia̍t -lâng: Lín khì kàu Siōng Chú chhōa lín ji̍p-khì hit-ê tōe,

19chia̍h hit só͘-chāi ê bí-niû, tio̍h hiàn lé-mi̍h hō͘ Siōng Chú.

20Lín tio̍h chiong tē-it tè hang--chhut-lâi ê piáⁿ, gia̍h-koân chòe lé-mi̍h hiàn hō͘ Siōng Chú, chhin-chhiūⁿ tī ngó͘-kok-tiûⁿ chiong chho͘-se̍k ê ngó͘-kok gia̍h-koân lâi hiàn kâng-khoán.

21Lín sè-sè-tāi-tāi tio̍h chiàu án-ni chòe, hiàn lé-mi̍h hō͘ Siōng Chú.

22Lín nā bô-ì-tiong hoān-tio̍h Siōng Chú bēng-lēng Mô͘-se ê jīm-hô kài-bēng,

23chiū-sī Siōng Chú thong-kè Mô͘-se bēng-lēng lín--ê, tùi Siōng Chú bēng-lēng lín hit-ji̍t, kàu í-āu ta̍k sè-tāi,

24nā ū lâng hoān--tio̍h, m̄-kú bô lâng chai, hōe-chiòng tio̍h hiàn chi̍t chiah gû-káng-á chòe sio-hòa-chè, koh chiàu hiàn-chè ê kui-lē phòe sò͘-chè kap tiān-chiú-chè, chòe-hé chòe phang-phang ê chè hiàn hō͘ Siōng Chú; koh tio̍h hiàn chi̍t chiah soaⁿ-iûⁿ-káng chòe sio̍k-chōe-chè.

25Chè-si tio̍h ūi Í-sek-lia̍t choân-thé hōe-chiòng sio̍k-chōe, in chiū tit-tio̍h sià-bián; in sī bô-ì-tiong hoān-chhò, mā ū ūi-tio̍h in ê chhò-gō͘, tòa ēng hé sio ê chè-mi̍h kap sio̍k-chōe-chè kàu Siōng Chú ê bīn-chêng hiàn hō͘ I.

26Í-sek-lia̍t hōe-chiòng kap tòa tī in tiong-kan ê gōa-cho̍k-lâng, chiū beh tit-tio̍h sià-bián, in-ūi che sī jîn-bîn bô-ì-tiong hoān--tio̍h ê chōe.

27Nā ū lâng bô-ì-tiong hoān-chōe, i tio̍h hiàn chi̍t chiah chi̍t-hè ê soaⁿ-iûⁿ-bú chòe sio̍k-chōe-chè.

28Chè-si tio̍h ūi bô-ì-tiong hoān-chōe hit-ê lâng tī Siōng Chú ê bīn-chêng sio̍k-chōe, i chiū beh tit-tio̍h sià-bián.

29Chāi-tōe ê Í-sek-lia̍t -lâng kap tòa tī in tiong-kan ê gōa-cho̍k-lâng, nā bô-ì-tiong hoān-chōe, tio̍h chiàu siâng-khoán ê kui-lē pān-lí.

30Nā ū lâng kò͘-ì hoān-chōe siat-to̍k Siōng Chú, bô-lūn sī Í-sek-lia̍t -lâng á-sī tòa tī in tiong-kan ê gōa-cho̍k-lâng, tio̍h chiong i tùi jîn-bîn ê tiong-kan kek-chhut.

31Hit-ê lâng biáu-sī Siōng Chú ê ōe, ûi-pōe I ê bēng-lēng, i tio̍h siū kek-chhut, ūi ka-kī ê chōe hū chek-jīm.

32Í-sek-lia̍t -lâng tī khòng-iá ê sî, ū chi̍t ê lâng tī An-hioh-ji̍t khioh-chhâ.

33Hiah-ê hoat-kiàn i khioh-chhâ ê lâng, kā i tòa-khì Mô͘-se, A-lûn, kap choân-thé hōe-chiòng hia.

34In kā i koaiⁿ--khí-lâi, iáu-bē khak-tēng beh án-chóaⁿ pān i.

35Siōng Chú tùi Mô͘-se kóng, “It-tēng tio̍h kā hit-ê lâng chhú-sí; hōe-chiòng tio̍h tī iâⁿ-gōa ēng chio̍h-thâu kā i tìm-sí.”

36Hōe-chiòng kā hit-ê lâng chhōa-khì iâⁿ-gōa, ēng chio̍h-thâu kā i tìm-sí, sī chiàu Siōng Chú tùi Mô͘-se ê bēng-lēng.

37Siōng Chú bēng-lēng Mô͘-se

38tio̍h hoan-hù Í-sek-lia̍t -lâng: In tio̍h sè-sè-tāi-tāi tī saⁿ-á-kîⁿ chòe chhiu, koh tī chhiu ê téng-bīn tioh chi̍t tiâu nâ-sek ê iù-tòa.

39Chiah-ê chhiu sī beh hō͘ lín khòaⁿ--tio̍h, ōe-kì-tit chun-hêng Siōng Chú ê bēng-lēng, chiah bián lín hòng-chhiòng ka-kī ê sim kap ba̍k-chiu ê io̍k-bōng, tì-kàu lín tùi góa put-tiong.

40Án-ni, lín chiah ōe-kì-tit si̍t-hêng góa só͘-ū ê bēng-lēng, hun-pia̍t-choh-sèng kui lín ê Siōng-tè.

41Góa sī Siōng Chú — lín ê Siōng-tè, bat chhōa lín chhut Ai-ki̍p -tōe, beh chòe lín ê Siōng-tè. Góa sī Siōng Chú — lín ê Siōng-tè.

← Chapter 14 Jump to: Chapter 16 →