Numbers 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Siōng Chú hoan-hù Mô͘-se

2tùi A-lûn kóng, “Lí tiám-teng ê sî, chhit chóaⁿ teng lóng tio̍h chiò ǹg thâu-chêng.”

3A-lûn chiū chiàu Siōng Chú tùi Mô͘-se ê bēng-lēng, tiám-teng chiò-kng teng-tâi ê thâu-chêng.

4Chit-ê teng-tâi lóng ēng kim phah, liân i ê chō kap hoe mā án-ni, sī chiàu Siōng Chú chí-sī Mô͘-se ê hêng-thé chō--ê.

5Siōng Chú tùi Mô͘-se kóng,

6“Lí tio̍h chiong Lī-bī -lâng tùi Í-sek-lia̍t -lâng ê tiong-kan hun-pia̍t--chhut-lâi, kā in kiat-chēng.

7Lí tio̍h án-ni kā in kiat-chēng: Ēng tû-khì chōe ê chúi hiù tī in ê seng-khu, koh kah in ēng thì-thâu-to thì choân seng-khu ê mn̂g, sóe-saⁿ, án-ni kiat-chēng ka-kī.

8Āu-lâi, in tio̍h chhú chi̍t chiah gû-káng-á, kap chhiau iû ê iù mī-hún ê sò͘-chè; lí mā tio̍h lēng-gōa chhú chi̍t chiah gû-káng-á chòe sio̍k-chōe-chè.

9Lí tio̍h chhōa Lī-bī -lâng lâi kàu hōe-bō͘ chêng, koh chū-chi̍p Í-sek-lia̍t choân hōe-chiòng;

10lí chhōa Lī-bī -lâng lâi Siōng Chú bīn-chêng, hō͘ Í-sek-lia̍t -lâng kā in hōaⁿ-chhiú.

11A-lûn tio̍h chiong Lī-bī -lâng tùi Í-sek-lia̍t -lâng tiong-kan hun-pia̍t--chhut-lâi, chòe te̍k-pia̍t ê lé-mi̍h hiàn hō͘ Siōng Chú, án-ni in chiah thang pān-lí Siōng Chú ê sū-bū.

12Lī-bī -lâng tio̍h hōaⁿ-chhiú tī hiah-ê gû-káng-á ê thâu-khak téng; lí tio̍h hiàn chi̍t chiah chòe sio̍k-chōe-chè, chi̍t chiah chòe sio-hòa-chè hō͘ Siōng Chú, ūi Lī-bī -lâng sio̍k-chōe.

13“Lí tio̍h hō͘ Lī-bī -lâng khiā tī A-lûn kap i ê kiáⁿ ê bīn-chêng, chiong in chòe te̍k-pia̍t ê lé-mi̍h hiàn hō͘ Siōng Chú.

14Án-ni, lí chiong in tùi Í-sek-lia̍t -lâng tiong-kan hun-pia̍t--chhut-lâi, Lī-bī -lâng chiū kui-sio̍k góa.

15Lí kā in kiat-chēng, hiàn-chòe te̍k-pia̍t ê lé-mi̍h; tùi hit-sî khí, in chiū thang ji̍p-khì hōe-bō͘ sū-hōng.

16In sī Í-sek-lia̍t -lâng ê tiong-kan oân-choân hiàn hō͘ góa--ê; góa hō͘ in kui-sio̍k góa, tāi-thòe Í-sek-lia̍t -lâng só͘-ū ê thâu-chiūⁿ-kiáⁿ.

17In-ūi Í-sek-lia̍t tiong só͘-ū thâu-chiūⁿ-siⁿ ê lâng á-sī cheng-siⁿ, lóng sī góa ê. Góa tī Ai-ki̍p phah-sí in it-chhè thâu-chiūⁿ-siⁿ--ê hit-ji̍t, í-keng chiong Í-sek-lia̍t -lâng hun-pia̍t-choh-sèng kui-sio̍k góa.

18Taⁿ góa kéng Lī-bī -lâng tāi-thòe Í-sek-lia̍t -lâng só͘-ū ê thâu-chiūⁿ-kiáⁿ.

19Góa tùi Í-sek-lia̍t -lâng ê tiong-kan chí-phài Lī-bī -lâng, pang-chān A-lûn kap i ê hō͘-tāi, tī hōe-bō͘ lāi ūi-tio̍h Í-sek-lia̍t -lâng sū-hōng, koh ūi in sio̍k-chōe, chiah bián Í-sek-lia̍t -lâng in-ūi óa-kūn sèng-só͘, ū chai-hō lîm-kàu in.”

20Mô͘-se, A-lûn, kap Í-sek-lia̍t -lâng choân hōe-chiòng, chiū tùi Lī-bī -lâng án-ni chòe. Siōng Chú tùi Mô͘-se só͘ kóng koan-hē Lī-bī -lâng ê bēng-lēng, Í-sek-lia̍t -lâng lóng chiàu án-ni chòe.

21Lī-bī -lâng chiū kiat-chēng ka-kī, sóe in ê saⁿ; A-lûn chiong in chòe te̍k-pia̍t ê lé-mi̍h hiàn hō͘ Siōng Chú, koh ūi in sio̍k-chōe kā in kiat-chēng.

22Jiân-āu, Lī-bī -lâng ji̍p--khì, siū A-lûn kap i ê kiáⁿ ê chí-tō tī hōe-bō͘ sū-hōng; Siōng Chú tùi Mô͘-se só͘ kóng koan-hē Lī-bī -lâng ê bēng-lēng, Í-sek-lia̍t -lâng lóng chiàu án-ni chòe.

23Siōng Chú tùi Mô͘-se kóng,

24“Ē-bīn sī koan-hē Lī-bī -lâng ê kui-tēng: In jī-cha̍p-gō͘ hè í-siōng tio̍h lâi hōe-bō͘ sū-hōng,

25kàu gō͘-cha̍p hè chiū thè-hiu;

26thè-hiu liáu-āu thang tī hōe-bō͘ hia̍p-chō͘ in ê hiaⁿ-tī pān-lí sū-bū, m̄-bián koh hū-chek kang-chok. Koan-hē Lī-bī -lâng ê kui-tēng, lí tio̍h chiàu án-ni pān-lí.”

← Chapter 7 Jump to: Chapter 9 →