Deuteronomy 1

Ilonggo (Ang Biblia (1982))

Jump to: Chapter 2 →

1Ini amo ang mga polong nga ginpamolong ni Moises sa bug-os nga Israel sa tabok sang Jordan sa kamingawan, sa Araba sa atubang sang Suf, sa ulut sang Paran kag Tofel, Laban, Hazerot, kag Di-zahab.

2Ini lalakton sing napulo kag isa ka adlaw kutub sa Horeb sa dalanon sang Bukid nga Seir tubtub sa Cades-barnea.

3Kag sa ikakap-atan nga tuig, sa bulan nga ikapulo kag isa, sa nahauna nga adlaw sang bulan, si Moises nagpamolong sa katawohan sang Israel sono sa tanan nga nahatag sa iya sang Ginoo sa sogo sa ila,

4sa tapus na niya malaglag si Sihon nga hari sang mga Amornon, nga nagpuyo sa Hesbon, kag si Og nga hari sang Basan, nga nagpuyo sa Astarot kag sa Edrei.

5Sa tabok sang Jordan, sa duta sang Moab, nagsugud si Moises sa pagpahayag sini nga kasogoan, nga nagasiling,

6“Ang Ginoo nga aton Dios nagpamolong sa aton sa Horeb, ‘Dugay na ang pagpuyo ninyo sa sini nga bukid;

7liso kamo kag taliwan kamo, kag kadto kamo sa kabakoloran sang mga Amornon, kag sa tanan nga duug nga malapit didto sa Araba, sa kabakoloran kag sa kapatagan, kag sa Bagatnan, kag sa ubay sang baybayon, ang duta sang mga Canaanhon, kag sa Libano, tubtub sa daku nga suba, ang suba sang Eufrates.

8Yari karon, napahamtang ko ang duta sa inyo atubangan; sulud kamo kag magtag-iya sang duta nga ginsumpa sang Ginoo sa inyo mga ginikanan, kay Abraham, kay Isaac, kag kay Jacob, nga ihatag sa ila kag sa ila mga kaliwatan sa olihi nila.’

9“Nagpamolong ako sa inyo sa sadto nga tion, ‘Indi ako makasarang magdala sa inyo nga ako lamang;

10ang Ginoo nga inyo Dios nagpabuad sa inyo, kag yari karon, kamo sa sini nga adlaw subong sang mga bitoon sang langit sa kadamuon.

11Ang Ginoo, ang Dios sang inyo mga ginikanan, magpabuad sa inyo sing makalibo pa sa kadamuon ninyo karon, kag magpakamaayo sa inyo, subong sang ginsaad niya sa inyo!

12Paano bala ang pagkadala ko sang inyo lulan kag sang inyo kabug-atan kag sang inyo sinuay?

13Kuha kamo sing mga tawo nga maalam, mahangponon, kag nakilala, sono sa inyo mga kabikahan, kag himoon ko sila nga mga pangolo ninyo.’

14Kag nagsabat kamo sa akon, ‘Maayo nga himoon namon ang butang nga ginpamolong mo.’

15Gani nagkuha ako sang mga pangolo sang inyo mga kabikahan, mga tawo nga maalam kag nakilala, kag ginhimo sila nga mga pangolo ninyo, mga pangolo sang linibo, mga pangolo sang ginatus, mga pangolo sang kinalim-an, mga pangolo sang tinagpulo, kag mga manugdumala, sono sa inyo mga kabikahan.

16Kag nagtulin ako sa inyo mga hukom sa sadto nga tion, ‘Pamati kamo sang mga panumbung sa tunga sang inyo mga utud, kag hukmi ninyo sing matarung ang tawo kag ang iya utud ukon ang manlulugayaw nga yara sa iya.

17Wala kamo sing pasulabihon sa mga tawo sa paghukom; ang magamay kag ang dalagku pamatian ninyo sing alangay; dili kamo magkahadluk sang nawung sang tawo, kay ang paghukom iya sang Dios; kag ang kasaba nga tama kaiwat sa inyo, dalhon ninyo sa akon, kag pamatian ko ini.’

18Kag ginsogo ko kamo sang tanan nga butang nga dapat ninyo himoon sa sadto nga tion.

19“Kag nagpanlakatan kita kutub sa Horeb, kag ginlatas sing bug-os yadto nga daku kag makahalangawa nga kamingawan nga nakit-an ninyo, sa dalan pakadto sa kabakoloran sang mga Amornon, sono sa ginsogo sa aton sang Ginoo nga aton Dios; kag nag-abut kita sa Cades-barnea.

20Kag nagsiling ako sa inyo, ‘Nag-abut kamo sa kabakoloran sang mga Amornon, nga ginahatag sa aton sang Ginoo nga aton Dios.

21Yari karon, ang Ginoo nga imo Dios nagbutang sa atubangan nimo sang duta; taklara, panag-iyahi, sono sa napamolong sa imo sang Ginoo, ang Dios sang imo mga ginikanan; dili magkahadluk kag dili magkahangawa.’

22Niyan nagpalapit kamo tanan sa akon, kag nagsiling, ‘Magpadala kita sing mga lalaki sa una naton, agud nga mausisa nila ang duta tungud sa aton, kag magdala sa aton sing polong liwat nahanungud sang dalan nga kinahanglan taklaran ta kag sang mga kabanwaanan nga aton abutan.’

23Ang butang nagpahamuut sa akon sing maayo, kag nagkuha ako gikan sa inyo sing napulo kag duha ka tawo, isa ka tawo sa tagsa ka kabikahan;

24kag nagtaliwan sila kag nagtaklad sa kabakoloran, kag nag-abut sa nalupyakan sang Escol kag ginlampitawan ini.

25Kag nagdala sila sang bunga sang duta sa ila mga kamut kag gindala ini sa aton kag naghatag sila sa aton sing balita, kag nagsiling, ‘Maayo ang duta nga ginhatag sa aton sang Ginoo nga aton Dios.’

26“Apang indi kamo buut magtaklad, kondi nagsumpung batok sa sogo sang Ginoo nga inyo Dios;

27kag nagkumud kamo sa inyo mga layanglayang, kag nagsiling, ‘Bangud nga gindumtan kita sang Ginoo ginpagowa niya kita gikan sa duta sang Egipto, sa pagtugyan sa aton sa kamut sang mga Amornon, sa paglaglag sa aton.

28Diin bala kita mataklad? Ang aton mga utud nagpatunaw sang aton tagiposoon, nga nagasiling, “Ang katawohan dalagku pa kag matag-as pa sa aton; ang mga banwa dalagku kag may kuta tubtub sa langit; kag labut pa didto nakita namon ang mga anak sang mga Anakim.” ’

29Niyan nagsiling ako sa inyo, ‘Dili kamo magkahanguyus ukon magkahadluk sa ila.

30Ang Ginoo nga inyo Dios nga nagauna sa inyo magapakig-away tungud sa inyo, sono sa tanan nga ginhimo niya tungud sa inyo sa Egipto sa atubangan sang inyo mga mata,

31kag sa kamingawan, diin nakita mo kon paano nga ang Ginoo nga imo Dios nagdala sa imo, subong sang isa ka tawo nga nagadala sang iya anak nga lalaki, sa bug-os nga dalanon nga inyo ginlaktan tubtub nga nag-abut kamo sa sini nga duug.’

32Apang walay sapayan sini nga butang wala kamo magtoo sa Ginoo nga inyo Dios,

33nga nag-una sa inyo sa dalanon, sa pagpangita nga sa inyo sing duug nga patindugan sang inyo mga layanglayang, sa kalayo sa gab-i, sa pagtudlo sa inyo sang dalanon nga inyo laktan, kag sa panganud sa adlaw.

34“Kag nabatian sang Ginoo ang inyo mga polong, kag nagsingkal, kag nagsumpa,

35‘Wala sing bisan isa sini nga mga tawo sini nga malaut nga kaliwatan nga makakita sang maayo nga duta nga ginsumpa ko nga ihatag sa inyo mga ginikanan,

36luwas si Caleb nga anak ni Jefone; sia makakita sini, kag sa iya kag sa iya mga anak ihatag ko ang duta nga iya natapakan, bangud nga nagsonod sia sing bug-os gid sa Ginoo!’

37Ang Ginoo man naakig sa akon bangud sa inyo, kag nagsiling, ‘Ikaw man indi magsulud didto;

38si Josue nga anak ni Nun, nga nagatindug sa atubangan nimo, sia magasulud didto; paisuga sia, kay sia magapapanubli sang Israel sini.

39Labut pa ang inyo mga magamay, nga inyo ginsiling nga mangin-inagaw, kag ang inyo mga anak, nga sini nga adlaw wala makakilala sang maayo ukon malaut, sila magasulud didto, kag sa ila ihatag ko ini, kag sila magatag-iya sini.

40Apang nahanungud sa inyo, balik kamo, kag lakat kamo pa kamingawan sa dalanon pakadto sa Dagat nga Mapula.’

41“Niyan nagsabat kamo sa akon, ‘Nakasala kami batok sa Ginoo; magataklad kami kag magapakig-away, sono sa tanan nga ginsogo sang Ginoo sa amon.’ Kag nagtaklus kamo ang tagsa ka tawo sang iya mga hinganiban sa pag-away, kag nagpangahas sa pagtaklad sa kabakoloran.

42Kag ang Ginoo nagsiling sa akon, ‘Isiling sa ila, Dili kamo magtaklad ukon magpakig-away, kay wala ako sa tunga ninyo; basi laglagon kamo sa atubangan sang inyo mga kaaway.’

43Gani nagpamolong ako sa inyo, kag wala kamo magpamati; kondi nagmalalison kamo batok sa sogo sang Ginoo, kag nagpangahas kag nagtukad sa kabakoloran.

44Niyan ang mga Amornon nga nagpuyo sadto nga kabakoloran nagsugata sa inyo kag naglagas sa inyo subong sang ginahimo sang mga putyokan kag dinaug kamo sa Seir tubtub sa Horma.

45Kag nagbalik kamo kag naghibi sa atubangan sang Ginoo; apang ang Ginoo wala magpamati sa inyo tingug ukon magdungug sa inyo.

46Gani nagpuyo kamo sa Cades sing madamu nga mga adlaw, sono sa mga adlaw nga ginpuyo ninyo didto.

Jump to: Chapter 2 →