Deuteronomy 13

Ilonggo (Ang Biblia (1982))

← Chapter 12 Jump to: Chapter 14 →

1“Kon may magtindug sa tunga nimo nga isa ka manalagna, ukon manugdamgo sing mga damgo, kag maghatag sa imo sing tanda ukon katingalahan,

2kag mahanabu ang tanda ukon ang katingalahan nga ginpamolong niya sa imo, nga nagasiling, ‘Magsonod kita sa iban nga mga dios,’ nga wala mo makilal-i, ‘kag mag-alagad kita sa ila,’

3dili ka magpamati sa mga polong sina nga manalagna ukon sina nga manugdamgo sang mga damgo; kay ang Ginoo nga inyo Dios nagatilaw sa inyo, sa paghibalo kon ginahigugma ninyo ang Ginoo nga inyo Dios sa bug-os ninyo nga tagiposoon kag sa bug-os ninyo nga kalag.

4Magsonod kamo sa Ginoo nga inyo Dios kag magkahadluk sa iya, kag magbantay sang iya mga sogo kag magtuman sang iya tingug, kag mag-alagad kamo sa iya kag magtapik sa iya.

5Apang ina nga manalagna ukon ina nga manugdamgo sang mga damgo patyon, bangud nga nagpamolong sia sing pagpatalang batok sa Ginoo nga inyo Dios, nga nagpagowa sa inyo gikan sa duta sang Egipto kag nagtubus sa inyo gikan sa balay sang kahiolipnan, sa pagpalipas sa imo gikan sa dalanon nga ginsogo sa imo sang Ginoo nga imo Dios nga imo laktan. Sa amo isikway mo ang malauton gikan sa tunga nimo.

6“Kon ang imo utud nga lalaki, ang anak sang imo iloy, ukon ang imo anak nga lalaki, ukon ang imo anak nga babayi, ukon ang imo asawa nga nahamut-an, ukon ang imo abyan nga daw subong sang imo kalag, magbuyok sa imo sing tago, nga nagasiling, ‘Magkadto kita kag mag-alagad sa iban nga mga dios,’ nga wala mo makilala, ikaw ukon ang imo mga ginikanan,

7sa mga dios sang katawohan nga yara sa palibut ninyo, malapit sa imo ukon malayo sa imo, kutub sa isa ka ukbung sang duta tubtub sa isa ka ukbung sang duta,

8dili ka magsugut sa iya ukon magpamati sa iya, kag ang imo mata dili magkaawa sa iya, kag dili ka magpasaylo sa iya, kag dili mo pagtagoon sia;

9kondi patyon mo sia sing totoo; ang imo kamut mag-una sa pagpatay sa iya, kag ugaling ang kamut sang tanan nga katawohan.

10Batohon mo sia tubtub sa kamatayon, bangud nga naghimulat sia sa pagpapalayo gikan sa Ginoo nga imo Dios, nga nagpagowa sa imo gikan sa duta sang Egipto, gikan sa balay sang kahiolipnan.

11Kag ang bug-os nga Israel magapamati, kag magakahadluk, kag dili na maghimo sang bisan ano nga subong sini nga pagkamalaut sa tunga nimo.

12“Kon ikaw makabati sang sugid nahanungud sang isa sang imo kabanwaanan, nga ginahatag sa imo sang Ginoo nga imo Dios nga pagpuy-an didto,

13nga pila ka mga huroshuros naggowa gikan sa tunga nimo kag nagguyud sang mga pumuluyo sang ila banwa, nga nagasiling, ‘Magkadto kita kag mag-alagad sang iban nga mga dios,’ nga wala ninyo makilala,

14niyan magpakisayud ka kag magpangusisa kag magpamangkot sing sibo; kag yari karon, kon ini matuud kag ang butang pat-ud nga ang subong nga kangil-aran nahimo sa tunga nimo,

15sa pagkamatuud laglagon mo ang mga pumuluyo sina nga banwa sa sulab sang espada, nga nagalaglag sini sing bug-os, ang tanan nga yara sa iya kag ang iya kahayupan, sa sulab sang espada.

16Tiponon mo ang tanan nga inagaw sini sa tunga sang iya dalan, kag sonogon sa kalayo ang banwa kag ang bug-os nga inagaw sa iya, sa Ginoo nga imo Dios; kag mangintinumpok ini nga dayon, dili na ini pagpatindugon liwat.

17Wala sing magpabilin sa imo kamut sang mga butang nga tinagudilian; agud nga ang Ginoo magbiya sa kasingkal sang iya kaakig, kag magkalooy sa imo, kag magkaawa sa imo, kag magpabuad sa imo, sono sa ginsumpa niya sa imo mga ginikanan,

18kon magpamati ka sa tingug sang Ginoo nga imo Dios, sa pagbantay sang tanan niya nga sogo nga ginasogo ko sa imo sini nga adlaw, sa paghimo sang matarung sa mga mata sang Ginoo nga imo Dios.

← Chapter 12 Jump to: Chapter 14 →