Deuteronomy 9

Ilonggo (Ang Biblia (1982))

← Chapter 8 Jump to: Chapter 10 →

1“Pamatii, O Israel; ikaw magatabok sang Jordan sining adlaw, sa pagsulud sa pagsobol sang mga pungsud nga dalagku pa kag makusug pa sa imo, kabanwaanan nga dalagku kag may kuta tubtub sa langit,

2isa ka katawohan nga dalagku kag matag-as, ang mga anak sang mga Anakim, nga nakilala mo, kag nahanungud sa ila nabatian mo nga ginasiling, ‘Sin-o bala ang makatindug sa atubangan sang mga anak nga lalaki ni Anak?’

3Busa kilalaha sining adlaw nga ang Ginoo nga imo Dios amo ang magauna sa imo subong sang kalayo nga nagalamon; sia magalaglag sa ila kag sia magapapaubus sa ila sa atubangan nimo; sa amo masobol mo sila, kag mapapas sila sa madali, sono sa napamolong sang Ginoo sa imo.

4“Sang nasobol na sila sang Ginoo nga imo Dios gikan sa atubangan mo, dili ka magsiling sa imo tagiposoon, ‘Tungud sang akon pagkamatarung ginpasulud ako sang Ginoo sa pagtag-iya sining duta’; sing ugai bangud sang pagkamalaut sining mga pungsud ginasobol sila sang Ginoo gikan sa atubangan mo.

5Indi bangud sa imo pagkamatarung ukon sa katadlung sang imo tagiposoon nagasulud ka sa pagtag-iya sang ila duta; kondi bangud sa pagkamalaut sining mga pungsud ang Ginoo nga imo Dios nagsobol sa ila gikan sa atubangan mo, kag agud nga mapalig-on niya ang polong nga ginsumpa sang Ginoo sa imo mga ginikanan, kay Abraham, kay Isaac, kag kay Jacob.

6Busa kilalaha, nga indi bangud sang imo pagkamatarung ginahatag sa imo sang Ginoo nga imo Dios ining maayong duta sa pagtag-iya sa iya; kay ikaw katawohan nga tingkoyan.

7Dumduma kag dili mo pagkalimtan kon paano ang pagpasingkal mo sa Ginoo nga imo Dios sa kamingawan; kutub sang adlaw nga naggowa ka sa duta sang Egipto, tubtub sang inyo pag-abut sa sining duug, nagmabinatoon kamo sa Ginoo.

8Sa Horeb man ginpasingkal ninyo ang Ginoo, kag naakig ang Ginoo sa inyo sa paglaglag sa inyo.

9Sang nakataklad ako sa bukid sa pagbaton sang mga tapitapi nga bato, ang mga tapitapi sang katipan nga ginhimo sang Ginoo upud sa inyo, niyan nagpabilin ako sa bukid sing kap-atan ka adlaw kag kap-atan ka gab-i; wala ako magkaon sing tinapay kag wala mag-inum sing tubig.

10Kag gintugyan sang Ginoo sa akon ang duha ka tapitapi nga bato nga nasulatan sang tudlo sang Dios; kag sa ila nasulat sono sa tanan nga polong nga ginpamolong sang Ginoo sa inyo sa bukid gikan sa tunga sang kalayo sa adlaw sang pagtilipon.

11Kag sa katapusan sang kap-atan ka adlaw kag kap-atan ka gab-i ang Ginoo naghatag sa akon sang duha ka tapitapi nga bato, ang mga tapitapi sang katipan.

12Niyan ang Ginoo nagsiling sa akon, ‘Tindug ka, dulhog ka sing madali gikan diri; kay ang imo katawohan nga ginpagowa mo sa Egipto nagdunut sang ila kaugalingon; naglipas sila sing madali sa dalanon nga ginsogo ko sa ila; naghimo sila nga sa ila sing larawan nga tinunaw.’

13“Labut pa ang Ginoo nagsiling sa akon, ‘Nakita ko ining katawohan, kag yari karon, ini katawohan nga tingkoyan;

14pabayai ako, agud nga malaglag ko sila kag mapanas ang ila ngalan gikan sa idalum sang langit; kag magahimo ako gikan sa imo sing pungsud nga gamhanan pa kag daku pa sa ila.’

15Gani nagbalik ako kag nagdulhog sa bukid, kag nagdabdab ang bukid sing kalayo; kag ang duha ka tapitapi sang katipan yara sa akon duha ka kamut.

16Kag naglantaw ako, kag yari karon, nakasala kamo batok sa Ginoo nga inyo Dios; nakahimo kamo nga sa inyo sing tinday nga baka nga tinunaw; nakalipas kamo sing madali sa dalanon nga nasogo sang Ginoo sa inyo.

17Gani ginkaptan ko ang duha ka tapitapi, kag ginpus-ang sila sang akon duha ka kamut, kag ginboong sila sa atubangan sang inyo mga mata.

18Niyan naghapa ako sa atubangan sang Ginoo, subong sang sa nahauna, sing kap-atan ka adlaw kag kap-atan ka gabi-i; wala ako magkaon sing tinapay ukon mag-inum sing tubig, bangud sang tanan ninyo nga sala nga inyo ginhimo, sa paghimo sang malaut sa itololok sang Ginoo, sa pagpaakig sa iya.

19Kay nahadluk ako sa kaakig kag mainit nga kaalipungut nga sa sini ang Ginoo nagsingkal batok sa inyo, sa paglaglag sa inyo. Apang ang Ginoo nagpamati sa akon sadtong tion man.

20Kag ang Ginoo naakig sing tama kay Aaron sa paglaglag sa iya; kag nagpangamuyo ako tungud kay Aaron man sa among tion.

21Niyan ginkuha ko ang inyo sala, ang tinday nga baka nga inyo nabuhat, kag ginsonog ini sa kalayo kag gindugmok ini, nga ginabukbuk ini, tubtub nga nagpino subong sang yab-ok; kag ginsabwag ko ang yab-ok sini sa sapa nga nagadulhog gikan sa bukid.

22“Sa Tabera, kag sa Masa, kag sa Kibrot-hataava, ginpasingkal ninyo ang Ginoo.

23Kag sang ginpadala kamo sang Ginoo gikan sa Cades-barnea, nga nagasiling, ‘Taklad kamo kag panag-iyahi ang duta nga nahatag ko sa inyo, ’ niyan nagsumpung kamo batok sa sogo sang Ginoo nga inyo Dios, kag wala kamo magpati sa iya ukon magpamati sa iya tingug.

24Nanginmabinatoon kamo sa Ginoo kutub sang adlaw nga nakilala ko kamo.

25“Gani naghapa ako sa atubangan sang Ginoo sing kap-atan ka adlaw kag kap-atan ka gab-i, bangud nga ang Ginoo nakasiling nga laglagon niya kamo.

26Kag nagpangamuyo ako sa Ginoo, ‘O Ginoong Dios, dili paglaglaga ang imo katawohan kag ang imo panublion, nga imo natubus paagi sa imo pagkadaku, nga napagowa mo gikan sa Egipto sa gamhanan nga kamut.

27Dumduma ang imo mga alagad, si Abraham, si Isaac, kag si Jacob; dili pagtoloka ang pagkabatinggilan sining katawohan, ukon ang ila pagkamalaut, ukon ang ila sala,

28basi nga ang duta nga ginpagowaan mo sa amon magsiling, “Bangud nga ang Ginoo indi makasarang sa pagpasulud sa ila sa duta nga ginsaad niya sa ila, kag bangud nga gindumtan niya sila, ginpagowa niya sila sa pagpatay sa ila sa kamingawan.”

29Kay sila imo katawohan kag imo panublion, nga ginpagowa paagi sa imo dakung gahum kag paagi sa imo inuntay nga butkon.’

← Chapter 8 Jump to: Chapter 10 →