Deuteronomy 11

Ilonggo (Ang Biblia (1982))

← Chapter 10 Jump to: Chapter 12 →

1“Busa higugmaon mo ang Ginoo nga imo Dios, kag bantayan ang iya tinulin, ang iya mga palatukuran, ang iya mga pagsolondan, kag ang iya mga sogo sa gihapon.

2Kilalaha ninyo sining adlaw (kay wala ako nagapamolong sa inyo mga anak nga wala makahibalo kag wala makakita sini), kilalaha ang panabdong sang Ginoo nga inyo Dios, ang iya pagkadaku, ang iya gamhanan nga kamut, kag ang iya inuntay nga butkon,

3ang iya mga tanda kag ang iya mga binuhatan nga ginhimo niya sa tunga sang Egipto kay Faraon nga hari sang Egipto kag sa bug-os niyang duta;

4kag ang ginhimo niya sa hangaway sang Egipto, sa ila mga kabayo kag sa ila mga kangga; kon paano ang iya pagpalapaw sa ila sang tubig sang Dagat nga Mapula sang naglagas sila sa inyo, kag kon paano ang paglaglag sang Ginoo sa ila tubtub sining adlaw;

5kag kon ano ang ginhimo niya sa inyo sa kamingawan, tubtub nga nag-abut kamo sa sining duug;

6kag kon ano ang ginhimo niya kay Datan kag kay Abiram ang mga anak ni Eliab, ang anak ni Ruben; kon paano ang pagbuka sang duta sang iya baba kag naglamon sa ila, sang ila mga panimalay, sang ila mga layanglayang, kag sang tagsa ka butang nga buhi nga nagsonod sa ila, sa tunga sang bug-os nga Israel;

7kay ang inyo mga mata nakakita sang tanan nga dalagku nga binuhatan sang Ginoo nga ginhimo niya.

8“Busa bantayan ninyo ang bug-os nga sogo nga ginasogo ko sa imo sining adlaw, agud nga magbakud kamo, kag magsulud kag magtag-iya sang duta nga nagatabok kamo sa pagtag-iya sa iya,

9kag agud nga mapalawig ninyo ang inyo mga adlaw sa duta nga ginsumpa sang Ginoo sa inyo mga ginikanan nga ihatag sa ila kag sa ila mga kaliwatan, duta nga nagailig sing gatas kag dugus.

10Kay ang duta nga imo ginasulud sa pagtag-iya sa iya indi subong sang duta sang Egipto, nga inyo ginhalinan, diin nagsab-ug ka sang imo binhi kag nagbunyag sini sang imo tiil, subong sang katamnan sang mga ulutanon;

11apang ang duta nga nagatabok kamo sa pagtag-iya sa iya amo ang duta sang kabakoloran kag mga nalupyakan, nga nagainum sing tubig sa ulan sang langit,

12duta nga ginaalila sang Ginoo nga imo Dios; yara gihapon sa iya ang mga mata sang Ginoo nga imo Dios, kutub sa pamuno sang tuig tubtub sa katapusan sang tuig.

13“Kag kon magpamati kamo sing makugi sa akon mga sogo nga ginasogo ko sa inyo sining adlaw, sa paghigugma sa Ginoo nga inyo Dios, kag sa pag-alagad sa iya sa bug-os ninyong tagiposoon kag sa bug-os ninyong kalag,

14nga ihatag ko ang ulan sa inyo duta sa iya panag-on, ang nahaunang ulan kag ang naolihing ulan, agud nga matipon mo ang imo uyas kag ang imo bag-ong alak kag ang imo lana.

15Kag magahatag ako sing hilamon sa imo mga latagon nga sa imo kahayupan, kag magakaon ka kag mabusug.

16Andami ang inyo kaugalingon basi nga madayaan ang inyo tagiposoon, kag maglipas kamo kag mag-alagad sa iban nga mga dios kag magsimba sa ila,

17kag ang kaakig sang Ginoo magdabdab batok sa inyo, kag takpan niya ang mga langit, sa bagay nga walay na ulan, kag ang duta indi na magpatubas sang iya bunga, kag sa madali mawala kamo gikan sa maayong duta nga ginahatag sa inyo sang Ginoo.

18“Busa tipigan ninyo ining akon mga polong sa inyo tagiposoon kag sa inyo kalag; kag ibugkos ninyo sila nga tanda sa inyo kamut, kag manginfilacteria sila sa ulut sang inyo mga mata.

19Kag itudlo ninyo sila sa inyo mga anak, nga nagahambal nahanungud sa ila sa nagalingkod ka sa imo balay, kag sa nagalakat ka sa dalanon, kag sa nagahigda ka, kag sa nagabangon ka.

20Kag isulat mo sila sa mga bakalan sang ganhaan sang imo balay kag sa imo mga gawang,

21agud nga magdamu ang imo mga adlaw kag ang mga adlaw sang imo mga anak sa duta nga ginsumpa sang Ginoo sa inyo mga ginikanan nga ihatag sa ila, subong sang mga adlaw sang mga langit sa ibabaw sang duta.

22Kay kon bantayan ninyo sing makugi ini tanan nga sogo nga ginasogo ko sa inyo sa paghimo sini, sa paghigugma sa Ginoo nga inyo Dios, sa paglakat sa tanan niya nga dalanon, kag sa pagtapik sa iya,

23niyan sobolon sang Ginoo gikan sa atubangan ninyo ini tanan nga pungsud, kag maagawan ninyo ang mga pungsud nga daku pa kag makusug pa sa inyo.

24Ang tagsa ka duug nga matapakan sang inyo dapadapa mangin-inyo; mangin-inyo dulunan kutub sa kamingawan tubtub sa Libano kag kutub sa Suba, ang Suba nga Eufrates, tubtub sa dagat nga nakatundan.

25Wala sing tawo nga makasarang sa pagtindug sa atubangan ninyo; ibutang sang Ginoo nga inyo Dios ang kahadluk sa inyo kag ang kakugmat sa inyo sa tanan nga duta nga tapakan ninyo, sono sa napamolong niya sa inyo.

26“Yari karon, ginabutang ko sa atubangan ninyo sini nga adlaw ang pagpakamaayo kag ang pagpakamalaut:

27ang pagpakamaayo, kon magpamati kamo sa mga sogo sang Ginoo nga inyo Dios, nga ginasogo ko sa inyo sini nga adlaw,

28kag ang pagpakamalaut, kon indi kamo magpamati sang mga sogo sang Ginoo nga inyo Dios, kondi maglipas sa dalanon nga ginasogo ko sa inyo sini nga adlaw, sa pagsonod sa iban nga mga dios nga wala ninyo makilal-i.

29Kag kon mapasulud ka na sang Ginoo nga imo Dios sa duta diin nagakadto ka sa pagtag-iya sa iya, ipahamtang mo ang pagpakamaayo sa Bukid nga Gerizim kag ang pagpakamalaut sa Bukid nga Ebal.

30Wala sila bala sa tabok sang Jordan, sa likod sang dalan nga nakatundan, sa duta sang mga Canaanhon nga nagapuyo sa Araba, sa atubang sang Gilgal, sa luyo sang mga terebinto sang More?

31Kay magatabok kamo sang Jordan sa pagsulud sa pagtag-iya sang duta nga ginahatag sa inyo sang Ginoo nga inyo Dios; kag kon magatag-iya kamo sa iya, kag magapuyo sa iya,

32bantayan ninyo sa paghimo sang tanan nga palatukuran kag sang mga pagsolondan nga ginabutang ko sa atubangan ninyo sini nga adlaw.

← Chapter 10 Jump to: Chapter 12 →