Deuteronomy 17

Ilonggo (Ang Biblia (1982))

← Chapter 16 Jump to: Chapter 18 →

1“Dili ka maghalad sa Ginoo nga imo Dios sing baka ukon carnero nga may kasawayan, bisan anong butang nga malaut; kay kangil-aran ini sa Ginoo nga imo Dios.

2“Kon may makit-an sa tunga nimo, sa sulud sang bisan diin sang imo mga gawang nga ginahatag sa imo sang Ginoo nga imo Dios, nga lalaki ukon babayi nga nagahimo sang malaut sa itololok sang Ginoo nga imo Dios, sa paglapas sang iya katipan,

3kag nagkadto kag nag-alagad sa iban nga mga dios kag nagsimba sa ila, ukon sang adlaw ukon sang bulan ukon sang bisan anong kasoldadosan sang langit, nga wala ko ginsogo,

4kag nasugid ini sa imo kag nabatian mo ini; niyan usisaon mo sing maid-id, kag kon ini matuud kag ang butang pat-ud nga ang subong nga kangil-aran ginhimo sa Israel,

5niyan pagowaon mo sa imo mga gawang inang lalaki ukon ina nga babayi nga naghimo sining malaut nga butang, kag batohon mo sila nga mapatay.

6Sa baba sang duha ka saksi ukon sang tatlo ka saksi patyon ang palatyon; sa baba sang isa ka saksi dili sia pagpatyon.

7Ang kamut sang mga saksi magauna sa iya sa pagpatay sa iya, kag ugaling ang kamut sang tanan nga katawohan. Sa amo isikway mo ang malaut gikan sa tunga nimo.

8“Kon may magtuhaw nga kasaba nga tama kaiwat sa imo sa paghukom sa tunga sang dugo kag dugo, sa tunga sang kasuayon kag kasuayon, sa tunga sang pilas kag pilas, nga mga kabangdanan sang kasaba sa sulud sang imo mga gawang, niyan magtindug ka kag magtaklad sa duug nga pilion sang Ginoo nga imo Dios,

9kag magkadto ka sa mga sacerdote nga Levinhon, kag sa hukom sa sinang mga adlaw, kag magpakiana ka, kag sila magapakita sa imo sang pamatbat sang paghukom.

10Niyan himoon mo sono sa hagyo sang pamatbat nga ipakita nila sa imo gikan sinang duug nga pilion sang Ginoo; kag bantayan mo sa paghimo sono sa tanan nga itudlo nila sa imo;

11himoon mo sono sa hagyo sang kasogoan nga itudlo nila sa imo, kag sono sa paghukom nga isugid nila sa imo, himoon mo; dili ka maglipas sa pamatbat nga ipakita nila sa imo, sa too ukon sa wala.

12Ang tawo nga nagahimo sa pagpangahas, sa wala pagpamati sa sacerdote nga nagatindug sa pagpanghikot didto sa atubangan sang Ginoo nga imo Dios, ukon sa hukom, inang tawo patyon; gani isikway mo ang malaut gikan sa Israel.

13Kag ang bug-os nga katawohan magpamati, kag magkahadluk, kag dili na maghimo sa pagpangahas.

14“Kon nakasulud ka na sa duta nga ginahatag sa imo sang Ginoo nga imo Dios, kag magpanag-iya sini kag magpuyo sa iya, kag magsiling, ‘Magabutang ako sing hari sa ibabaw nakon, kaangay sang tanan nga pungsud nga yari sa palibut nakon’;

15sa pagkamatuud ibutang mo nga hari sa ibabaw nimo ang pilion sang Ginoo nga imo Dios. Ibutang mo nga hari sa ibabaw nimo ang isa nga gikan sa imo mga utud; dili ka makabutang sa ibabaw nimo sang dumuloong, nga indi mo utud.

16Lamang dili sia magpabuad nga sa iya sing mga kabayo, ukon magpabalik sang katawohan sa Egipto sa katuyoan nga makapabuad sia sing mga kabayo, sa bagay nga ang Ginoo nagsiling sa imo, ‘Kutub karon dili na kamo magbalik sa sinang dalanon.’

17Kag dili sia magpadamu nga sa iya sing mga asawa, agud nga indi magpahilayo ang iya tagiposoon; kag dili sia magpadamu gid nga sa iya sing bulawan kag pilak.

18“Kag kon maglingkod sia sa lingkoran nga harianon sang iya ginharian, magsulat sia nga sa iya sing huwad sining kasogoan sa tolon-an, gikan sa sina nga sa atubangan sang mga sacerdote nga Levinhon;

19kag ini manginsa iya, kag magabasa sia sini sa tanan nga adlaw sang iya kabuhi, agud nga makatoon sia sa pagkahadluk sa Ginoo nga iya Dios, sa pagbantay sang tanan nga polong sining kasogoan kag sining mga palatukuran, sa paghimo sa ila;

20agud nga indi magpalabaw ang iya tagiposoon sa iya mga utud, kag nga indi sia maglipas sa sogo, sa too ukon sa wala; sa katuyoan nga maglawig ang iya mga adlaw sa iya ginharian, sia kag ang iya mga anak, sa tunga sang Israel.

← Chapter 16 Jump to: Chapter 18 →