Deuteronomy 24

Ilonggo (Ang Biblia (1982))

← Chapter 23 Jump to: Chapter 25 →

1“Kon ang isa ka lalaki magpangasawa sa isa ka babayi, kag magpakasal sa iya, niyan kon indi ang babayi makapahamuut sa iya mga mata bangud nga nasapwan niya sa iya ang butang nga makahuluya, kag sia magsulat sa iya sing sulat sa pagbulagay kag ihatag ini sa kamut sang babayi kag pahalinon sia sa iya balay,

2kag sa makahalin sia sa balay sang iya bana, makalakat sia kag maasawa sang iban nga lalaki,

3kag kon ang madason nga bana magdumut sa iya kag magsulat sa iya sing sulat sa pagbulagay kag ihatag ini sa iya kamut kag pahalinon sia sa iya balay, ukon kon mapatay na ang madason nga bana, nga nagpangasawa sa iya,

4niyan ang iya nahauna nga bana, nga nagpahalin sa iya, indi makakuha sa iya liwat nga mangin-asawa niya, sa tapus nga nadagtaan sia; kay ini kangil-aran sa Ginoo, kag dili mo pagpasalaon ang duta nga ginahatag nga panublion sa imo sang Ginoo nga imo Dios.

5“Kon ang isa ka lalaki bag-o makapangasawa, dili sia maggowa upud sa kasoldadosan ukon pagtulinan sing bisan ano nga palatikangon; manginhilway sia sa iya balay sa isa ka tuig, kag lipayon niya ang iya asawa nga iya ginpangasawa.

6“Wala sing tawo nga magkuha sang galingan, ukon sang naibabaw nga bato sang galingan nga sa inugpalig-on; kay ginakuha niya ang kabuhi sang tawo nga inugpalig-on.

7“Kon makita ang isa ka tawo nga nagapangawat sa bisan kay sin-o sang iya mga utud, sang katawohan sang Israel, kag kabigon niya sia nga ulipon ukon ibaligya sia, niyan ina nga makawat patyon; sa amo ipahilayo mo ang malaut gikan sa tunga mo.

8“Mag-andam ka, sa balatian nga aro, nga magbantay ka sing makugihon, kag maghimo sono sa tanan nga itudlo sa imo sang mga sacerdote nga mga Levinhon; sono sa ginsogo ko sa ila, amo ang bantayan ninyo sa paghimo.

9Dumduma ang ginhimo sang Ginoo nga imo Dios kay Miriam sa dalanon sang naggowa kamo gikan sa Egipto.

10“Kon magpahulam ka sa imo isigkatawo sang bisan ano nga bagay sang pahulam, dili ka magsulud sa iya balay sa pagkuha sang iya inugpalig-on.

11Magtindug ka sa gowa, kag ang tawo nga ginapahulam mo magdala sa imo sa gowa sang inugpalig-on.

12Kag kon sia imol nga tawo, dili mo pag-itolog ang iya inugpalig-on;

13sa pagkamatuud iuli mo sa iya ang inugpalig-on sa pagtunud sang adlaw agud nga magtolog sia sa iya panapton kag magpakamaayo sa imo; kag ini manginpagkamatarung sa imo sa atubangan sang Ginoo nga imo Dios.

14“Dili mo pagpiguson ang sinoholan nga alagad nga imol kag nawad-an, bisan sia gikan sa imo mga utud ukon sa imo mga manlulugayaw nga yara sa imo duta sa sulud sang imo mga gawang;

15hatagan mo sia sang iya sohol sa iya inadlaw, kag dili pagpatunuran ini sang adlaw (kay sia imol, kag nagalangut ang iya tagiposoon sini); basi magtuaw sia batok sa imo sa Ginoo, kag manginsala ini sa imo.

16“Ang mga ginikanan dili pagpatyon tungud sa mga anak, kag ang mga anak dili pagpatyon tungud sa ila mga ginikanan; ang tagsa ka tawo patyon tungud sa iya kaugalingon nga sala.

17“Dili mo pagpatikoon ang katarungan nga naigo sa manlulugayaw ukon sa ilo, kag dili pagkuhaa nga inugpalig-on ang panapton sang balo nga babayi;

18kondi magdumdum ka nga ikaw nangin-ulipon sa Egipto kag gintubus ka gikan didto sang Ginoo nga imo Dios; busa ginasogo ko ikaw sa paghimo sini.

19“Kon nagaani ka sang imo alanyon sa imo uma, kag malipatan ang isa ka linaylay sa uma, dili ka magbalik sa pagkuha sini; mangin-iya ini sang manlulugayaw, sang ilo, kag sang balo nga babyi; agud nga pakamaayohon ka sang Ginoo nga imo Dios sa tanan nga binuhatan sang imo mga kamut.

20Kon magpalaspas ka sang imo kahoy nga olivo, dili mo pagsuliton ang mga sanga; ini mangin-iya sang manlulugayaw, sang ilo, kag sang balo nga babayi.

21Kon magpamopo ka sa imo ulubasan, dili mo pagsaghawan ini sa pagkatapus mo; ini mangin-iya sang manlulugayaw, sang ilo, kag sang balo nga babayi.

22Dumdumon mo nga nangin-ulipon ka sa duta sang Egipto; busa ginasogo ko ikaw sa paghimo sini.

← Chapter 23 Jump to: Chapter 25 →