Deuteronomy 32 — Ilonggo (Ang Biblia (1982))

1“Magdungug, O mga langit, kag magapamolong ako; kag papamatia ang duta sang mga polong sang akon baba.

2Ang akon pagtolon-an magatupa subong sang ulan, ang akon hambal magatolo subong sang ton-og, subong sang dabodabo sa gutuk, kag subong sang mga talithi sa gamhon.

3Kay ibantala ko ang ngalan sang Ginoo. Pakadaku-a ninyo ang aton Dios!

4“Ang Igang ang iya binuhatan himpit; kay ang tanan niyang dalanon katarungan. Dios sang katutum kag walay kalautan, matadlong kag matarung sia.

5Nahimoan nila sia sing malaut, sila indi niya mga anak, kasawayan nila ini; sila balingag kag tiko nga kaliwatan.

6Amo bala ini ang ginabalus ninyo sa Ginoo, O katawohan nga buang kag dimaalam? Indi bala sia imo amay, nga nagbakal sa imo, sia naghimo sa imo, kag nagpalig-on sa imo?

7Dumduma ang mga adlaw nga dumaan, patugsilingi ang mga tuig sang madamung mga kaliwatan; pamangkota ang imo amay, kag pakitaan ka niya; ang imo mga tigulang, kag sugiran ka nila.

8Sang naghatag ang Labing Mataas sa mga pungsud sang ila panublion, sang nagbahinbahin sia sang mga anak sang mga tawo, ginbutang niya ang mga dulunan sang mga katawohan sono sa kadamuon sang mga anak sang Israel.

9Kay ang bahin sang Ginoo amo ang iya katawohan, si Jacob amo ang puna sang iya panublion.

10“Nakita niya sia sa desierto nga duta, kag sa kigas nga nagauwang nga kamingawan; ginhakus niya sia, gin-alila niya sia, gintipigan niya sia subong sang tawotawo sang iya mata.

11Subong sang aguila nga nagaukay sang iya pugad, nga nagalupadlupad sa ibabaw sang iya buto, ginahumlad niya ang iya mga pakpak, ginkuha niya sila, gindala niya sila sa ibabaw sang iya mga kuyus,

12ang Ginoo lamang ang nagtuytuy sa iya, kag wala sing dumuloong nga dios upud sa iya.

13Ginapasalika niya sia sa mataas nga mga duug sang duta, kag nagkaon sia sang patubas sang latagon; kag ginpasupsup niya sia sing dugus sa igang, kag lana gikan sa bato nga santikan.

14Sang linatab sang kabakahan, kag gatas sang panong, pati sang sapay sang mga cordero kag mga carnero, kabakahan sang Basan kag sang mga kanding, pati sang pinili gid sang trigo— kag ikaw nag-inum sing alak sa dugo sang uvas.

15“Apang si Jesurun nagtambok, kag nagpanindak; nagtambok ka, nagbakud ka, naghining ka; niyan ginsikway niya ang Dios nga nagbuhat sa iya, kag gintamay ang Igang sang iya kaluwasan.

16Ginpapangimon nila sia bangud sang liwan nga mga dios; ginpaakig nila sia nga may mga kalangil-aran.

17Naghalad sila sa mga yawa nga indi mga dios, sa mga dios nga wala nila makilala, sa bag-ong mga dios nga bag-o maglutaw, nga ang inyo mga ginikanan wala mahangawa.

18Wala mo ginasapak ang Igang nga nag-anak sa imo, kag nalimtan mo ang Dios nga nag-anak sa imo.

19“Nakita ini sang Ginoo, kag ginkangil-aran sila, bangud sang pagpaakig sang iya mga anak nga lalaki kag sang iya mga anak nga babayi.

20Kag nagsiling sia, ‘Lipnan ko gikan sa ila ang akon nawung, tan-awon ko kon mangin-ano ang ila katapusan, kay kaliwatan sila nga tama gid kabalingag, mga anak nga sa ila wala sing katutum.

21Ginpapangimon nila ako sa indi dios; ginpaakig nila ako sa ila mga kadayawan. Gani ako magapapangimon sa ila sa indi katawohan; paakigon ko sila sa buang nga pungsud.

22Kay ginpadabdab ang isa ka kalayo sa akon kaakig, kag nagadabdab sa madalum gid nga Sheol, nagalamon sang duta pati sang iya patubas, kag nagasonog sang mga sadsaran sang kabukiran.

23“‘Kag tumpukon ko ang mga malaut sa ibabaw nila; uruton ko sa ila ang akon mga baslay:

24malaglag sila sa kagutum, kag lamonon sang nagadabdab nga kainit kag mapait nga kalaglagan; kag ipadala ko sa ila ang ngipon sang mga sapat, pati ang dalit sang nagakamang nga mga butang sang yab-ok.

25Sa luwas kuhaon sila sang espada, kag sa mga hulut kakugmat, ang olitawo kag ang ulay laglagon niya, ang nagasoso pati ang tawo nga ubanon.

26Nagsiling ako, “Paaplaagon ko sila sa malayo, pauntaton ko gikan sa mga tawo ang handumanan nila,”

27Kon wala ako mahadluk sang pagpaakig sang kaaway, basi nga ang iya mga kasumpung maghukom sing sayup, basi nga magsiling sila, “Ang amon kamut ginpataas, ang Ginoo wala maghimo sini tanan.” ’

28“Kay sila pungsud nga walay laygay, kag walay paghangup sa ila.

29O kabay kuntani nga maalam sila, agud nga nahangpan nila ini, agud nga pamalandongan nila ang ila kaolihian!

30Paano bala ang paglagas sang isa sa isa ka libo, kag pagpapalagyo sang duha sa napulo ka libo, luwas kon nabaligya sila sang ila Igang, kag natugyan sila sang Ginoo?

31Kay ang ila igang indi subong sang aton Igang, bisan ang aton gid mga kaaway mga hukom.

32Kay ang balagon nila gikan sa balagon sang Sodoma, kag gikan sa mga latagon sang Gomorra; ang ila mga uvas mga uvas nga apdo, mapaitang ila mga pinungpung;

33ang ila alak amo ang dalit sang mga man-ug, kag mapintas nga dalit sang mga man-ug nga dalitan.

34Wala ko bala matigana ini upud sa akon, nga pinat-inan sa tunga sang akon mga bahandi?

35Akon ang pagtimalus, kag ang pagtumbas, sa tion nga makadalin-as ang ila tiil; kay malapit na ang adlaw sang iya kalalat-an, kag magadalidali ang mga butang nga nagaabut sa ila.

36Kay hukman sang Ginoo ang iya katawohan kag magakalisud sia tungud sa iya mga alagad, kon makita niya nga wala na ang ila gahum, kag wala na gid sing nabilin, nga nabilanggo ukon nahilway.

37Niyan magasiling sia, ‘Diin bala ang ila mga dios, ang igang nga gindangpan nila,

38nga nagkaon sang sapay sang ila mga halad, kag nag-inum sang alak sang ila halad-nga-ilimnon? Patinduga sila kag pabuliga sa inyo, manginpangapin sila ninyo!

39“‘Tan-awa karon nga ako, ako gid, amo sia, kag wala sing dios upud sa akon; ako nagapatay kag ako nagabuhi; ako nagapilas kag ako nagapaayo; kag wala gid sing makaluwas gikan sa akon kamut.

40Kay ginabayaw ko sa langit ang akon kamut, kag nagasiling, sa nagakabuhi ako sa gihapon,

41kon bairon ko ang akon nagaidlap nga espada, kag kaptan sang akon kamut ang paghukom, magahatag ako sing pagtimalus sa akon mga kasumpung, kag tumbasan ang mga nagadumut sa akon.

42Hugbon ko sa dugo ang akon mga baslay, kag ang akon espada magalamon sing unud— sa dugo sang mga pinatay kag sang mga bihag, gikan sa olo sang mga pangolo sang kaaway.’

43“Hinugyaw, O kamo nga mga pungsud, pati sang iya katawohan; kay magatimalus sia sang dugo sang iya mga alagad, kag magahatag sing pagtimalus sa iya mga kasumpung, kag magahimo sing katumbasan tungud sa duta sang iya katawohan.”

44Si Moises nag-abut kag nagpamolong sang tanan nga polong sining ambahanon sa mga idulungug sang katawohan, sia kag si Josue nga anak ni Nun.

45Kag sang si Moises nagtapus sa pagpamolong sini tanan nga polong sa bug-os nga Israel,

46nagsiling sia sa ila, “Ituhoy ang inyo tagiposoon sa tanan nga polong nga ginapamatuud ko sa inyo sining adlaw, nga isogo ninyo sa inyo mga anak sa pagbantay sa paghimo ang tanan nga polong sini nga kasogoan.

47Kay ini indi butang nga walay pulus sa inyo, bangud nga kabuhi ninyo ini, kag paagi sining butang palawigon ninyo ang inyo mga adlaw sa duta diin nagatabok kamo sang Jordan sa pagtag-iya sini.”

48Kag ang Ginoo nagsiling kay Moises sa among adlaw,

49“Taklad ka sa sining bukid sang Abarim, sa Bukid nga Nebo, nga yara sa duta sang Moab, nga nagaatubang sa Jerico; kag lantawa ang duta sang Canaan, nga ginahatag ko nga kaugalingon sa katawohan sang Israel;

50kag pakamatay sa bukid nga ginataklad mo, magsimpon sa imo katawohan, subong kay Aaron nga imo utud nga napatay sa Bukid nga Hor kag ginsimpon sa iya katawohan;

51bangud nga naglapas kamo batok sa akon sa tunga sang katawohan sang Israel sa mga tubig sang Meriba sang Cades, sa kamingawan sang Zin; bangud nga wala ako ninyo pagpakabalaana sa tunga sang katawohan sang Israel.

52Kay makita mo ang duta sa atubangan mo; apang dili ka magsulud sa duta nga ginahatag ko sa katawohan sang Israel.”