Deuteronomy 31

Ilonggo (Ang Biblia (1982))

← Chapter 30 Jump to: Chapter 32 →

1Gani si Moises nagkadto kag nagpamolong sining mga polong sa bug-os nga Israel.

2Kag nagsiling sia sa ila, “Sining adlaw ako isa ka gatus kag duha ka pulo ka tuig; indi na ako makagowa ukon makasulud pa. Ang Ginoo nagsiling sa akon, ‘Dili ka magtabok sining Jordan.’

3Ang Ginoo nga imo Dios sia magatabok sing una sa imo; sia magalaglag sining mga pungsud gikan sa atubangan mo, kag sobolon mo sila; kag si Josue magatabok sing una sa imo, sono sa ginpamolong sang Ginoo.

4Kag himoon sang Ginoo sa ila sono sa ginhimo niya kay Sihon kag kay Og, ang mga hari sang mga Amornon, kag sa ila duta, nga ginlaglag niya.

5Kag itugyan sila sang Ginoo sa atubangan ninyo, kag himoon ninyo sa ila sono sa bug-os nga sogo nga ginsogo ko sa inyo.

6Magpakabakud kag magpakaisug, dili magkahadluk ukon malisang sa ila: kay ang Ginoo nga imo Dios amo ang nagaupud sa imo; indi sia magpabaya sa imo ukon magbiya sa imo.”

7Niyan gintawag ni Moises si Josue, kag nagsiling sa iya sa itololok sang bug-os nga Israel, “Magpakabakud kag magpakaisug; kay ikaw magasulud upud sining katawohan sa duta nga ginsumpa sang Ginoo sa ila mga ginikanan nga ihatag sa ila; kag ikaw magapapanubli sini sa ila.

8Ang Ginoo amo ang nagauna sa imo; sia magaupud sa imo, indi sia magpabaya sa imo ukon magbiya sa imo; dili magkahadluk ukon magkahangawa.”

9Kag ginsulat ni Moises ining kasogoan, kag gintugyan ini sa mga sacerdote nga mga anak ni Levi, nga nagdala sang kaban sang katipan sang Ginoo, kag sa tanan nga tigulang sang Israel.

10Kag ginsogo sila ni Moises, “Sa katapusan sang tagpito ka tuig; sa panag-on nga pinat-ud sang tuig sang paghilway, sa piesta sang mga kayangkayang,

11kon magkari ang bug-os nga Israel sa pag-atubang sa Ginoo nga imo Dios sa duug nga pilion niya, basahon mo ining kasogoan sa atubangan sang bug-os nga Israel sa idulungug nila.

12Tipona ang katawohan, ang mga lalaki, ang mga babayi, kag ang mga magamay, kag ang imo manlulugayaw nga yara sa sulud sang imo mga gawang, agud nga magpamati sila kag nga magtoon sila kag magkahadluk sa Ginoo nga imo Dios, kag magbantay sa paghimo sang tanan nga polong sining kasogoan,

13kag agud nga ang mga anak nila, nga wala makakilala, makapamati kag makatoon sa pagkahadluk sa Ginoo nga inyo Dios, tubtub nga nagakabuhi kamo sa duta diin nagatabok kamo sang Jordan sa pagtag-iya sini.”

14Kag ang Ginoo nagsiling kay Moises, “Yari karon, nagapalapit ang imo mga adlaw nga kinahanglan ka mapatay; tawga si Josue, kag atubang kamo sa layanglayang nga tiliponan, agud matulinan ko sia.” Kag si Moises kag si Josue nagkadto kag nag-atubang sila sa layanglayang nga tiliponan.

15Kag nagpahayag ang Ginoo sa layanglayang sa haligi nga panganud; kag ang haligi nga panganud nagdolog sa ibabaw sang ganhaan sang layanglayang.

16Kag ang Ginoo nagsiling kay Moises, “Yari karon, magatolog ka upud sa imo mga ginikanan; niyan magatindug ining katawohan kag magamakihilawason sa pagsonod sa liwan nga mga dios sang duta, nga didto magasulud sila sa pagpuyo sa tunga nila, kag magabiya sa akon kag magalalis sang akon katipan nga ginhimo ko upud sa ila.

17Niyan magadabdab ang akon kaakig batok sa ila sa sadtong adlaw, kag bayaan ko sila kag lipnan ko ang akon nawung gikan sa ila, kag lamonon sila; kag madamu nga mga malaut kag mga kagamu ang magaabut sa ila, sa bagay nga magasiling sila sa sadtong adlaw, ‘Wala bala mag-abut sa aton ining mga malaut bangud nga ang aton Dios wala sa tunga naton?’

18Kag sa pagkamatuud lipnan ko ang akon nawung sadtong adlaw bangud sang tanan nga malaut nga mahimo nila, bangud nga nagliso sila pakadto sa iban nga mga dios.

19Busa karon isulat ninyo ining ambahanon nga sa inyo, kag itudlo mo ini sa katawohan sang Israel; ibutang ini sa ila mga baba, agud nga ining ambahanon manginsaksi nga sa akon batok sa katawohan sang Israel.

20Kay kon mapasulud ko na sila sa duta nga ginsumpa ko sa ila mga ginikanan, nga nagailig sing gatas kag dugus, kag nakakaon sila kag nabusug kag nagtambok, niyan magaliso sila sa iban nga mga dios kag magaalagad sa ila, kag magatamay sa akon kag magalalis sang akon katipan.

21Kag kon madamu nga malaut kag kagamu ang mag-abut sa ila, ining ambahanon magapamatuud sa atubangan nila subong nga saksi (kay indi malipatan ini sa mga baba sang ila mga kaliwatan); kay nahibaloan ko ang ila painoino nga ginahuman nila sining adlaw, sa wala ko pa sila mapasulud sa duta nga ginsumpa ko.”

22Gani si Moises nagsulat sining ambahanon sa among adlaw, kag gintudlo ini sa katawohan sang Israel.

23Kag ang Ginoo nagtulin kay Josue nga anak ni Nun kag nagsiling, “Magpakabakud kag magpakaisug; kay ikaw magapasulud sang mga anak sang Israel sa duta nga ginsumpa ko sa ila: kag ako magaupud sa imo.”

24Sang nakatapus si Moises pagsulat sang mga polong sining kasogoan sa tolon-an, tubtub nga natapus sila,

25si Moises nagsogo sa mga Levinhon nga nagdala sang kaban sang katipan sang Ginoo,

26“Kuhaa ining tolon-an sang kasogoan, kag ibutang ini sa luyo sang kaban sang katipan sang Ginoo nga inyo Dios, agud nga mabilin ini didto subong nga saksi batok sa imo.

27Kay nahibal-an ko ang imo pagkamabinatoon kag ang imo pagkatingkoyan; yari karon, samtang nga nagakabuhi ako upud sa inyo sining adlaw, nagmabinatoon kamo sa Ginoo; kag daw ano pa gid sa tapus na ako mapatay!

28Tipona sa akon ang tanan nga tigulang sang inyo mga kabikahan, kag ang inyo mga manugdumala, agud nga magpamolong ako sining mga polong sa ila mga idulungug kag magtawag sang langit kag duta sa pagsaksi batok sa ila.

29Kay nakahibalo ako nga sa tapus ako mapatay magadunut kamo sing totoo sang inyo kaugalingon, kag magalipas gikan sa dalanon nga nasogo ko sa inyo; kag ang malaut magaabut sa inyo sa ulihing mga adlaw, bangud nga himoon ninyo ang malaut sa itololok sang Ginoo, sa pagpaakig sa iya paagi sa binuhatan sang inyo mga kamut.”

30Niyan si Moises nagpamolong sa mga idulungug sang bug-os nga pagtilipon sang Israel sang mga polong sining ambahanon, tubtub nga natapus sila:

← Chapter 30 Jump to: Chapter 32 →