Deuteronomy 2

Ilonggo (Ang Biblia (1982))

← Chapter 1 Jump to: Chapter 3 →

1“Niyan nagbalik kita, kag nagpanlakatan kita pa kamingawan sa dalanon pakadto sa Dagat nga Mapula, sono sa ginpamolong sa akon sang Ginoo; kag ginlibut naton ang Bukid nga Seir sing madamu nga adlaw.

2Niyan ang Ginoo nagpamolong sa akon,

3‘Tuman na ang paglibut ninyo sa sini nga bukid; liso kamo nayon sa aminhan.

4Kag sogoa ang katawohan, Magaagi kamo sa dulunan sang inyo mga utud nga anak ni Esau, nga nagapuyo sa Seir; kag magakahadluk sila sa inyo. Busa maghalong kamo sing maayo sa inyo kaugalingon;

5dili ninyo pagtublagon sila; kay indi ako maghatag sa inyo sang duta nila, indi, bisan isa lamang ka tapak, bangud nga ginhatag ko kay Esau ang Bukid nga Seir nga iya kaugalingon.

6Magbakal kamo sa ila sa cuarta sing kalan-on, agud nga makakaon kamo; kag magbakal man kamo sa ila sa cuarta sing tubig, agud nga makainum kamo.

7Kay ang Ginoo nga imo Dios nagpakamaayo sa imo sa tanan nga binuhatan sang imo kamut; sia nakasayud sang imo paglakat sa sini nga daku nga kamingawan; sini nga kap-atan ka tuig ang Ginoo nga imo Dios nag-upud sa imo; wala sing bisan ano nga butang nga nakulang sa imo.’

8Gani nagligad kita sa aton mga utud nga mga anak ni Esau nga nagapuyo sa Seir, gikan sa dalanon sang Araba kutub sa Elat kag kutub sa Ezion-geber. “Kag nagliso kita kag nag-agi sa dalanon sang kamingawan sang Moab.

9Kag ang Ginoo nagsiling sa akon, ‘Dili mo paggamohon ang Moab kag dili magpakigsuay sa ila sa inaway, kay indi ako maghatag sa imo nga kaugalingon sang iya duta, bangud nga ginhatag ko ang Ar nga kaugalingon sang mga anak ni Lot.’

10(Ang mga Emim nagpuyo didto anay, katawohan nga dalagku kag madamu, kag matag-as subong sang mga Anakim;

11ini sila man ginbilang nga mga Refaim subong sang mga Anakim, apang ang mga Moabnon nagatawag sa ila nga mga Emim.

12Ang mga Horhanon man nagpuyo anay sa Seir, apang ginsobol sila sang mga anak ni Esau, kag ginlaglag nila sila gikan sa atubangan nila, kag nagpuyo nga tal-us sa ila; subong sang ginhimo sang Israel sa duta nga iya kaugalingon, nga ginhatag sa ila sang Ginoo.)

13‘Karon tindug kamo, kag tabok kamo sa sapa nga Zered.’ Gani nagtabok kita sa sapa nga Zered.

14Kag ang mga adlaw nga ginlakat naton kutub sa Cades-barnea tubtub nga natabok naton ang sapa nga Zered katloan kag walo ka tuig, tubtub nga napapas ang bug-os nga kaliwatan sang mga lalaki nga hangaway gikan sa tunga sang dologan, sono sa ginsumpa sang Ginoo sa ila.

15Labut pa ang kamut sang Ginoo batok sa ila, sa paglaglag sa ila gikan sa tunga sang dologan, tubtub nga napapas sila.

16“Gani sang napapas kag napatay ang tanan nga mga lalaki nga hangaway gikan sa katawohan,

17ang Ginoo nagsiling sa akon,

18‘Karon nga adlaw magatabok ka sa Ar, ang dulunan sang Moab;

19kag kon mag-abut ka malapit sa atubangan sang mga anak ni Amon, dili sila paggamoha ukon pagsuaya sa ila, kay indi ako maghatag sa imo nga kaugalingon sang duta sang mga anak ni Amon, bangud nga ginhatag ko ini nga kaugalingon sa mga anak ni Lot.’

20(Ina man ginbilang nga duta sang mga Refaim; ang mga Refaim nagpuyo didto anay, apang ang mga Amonhon nagtawag sa ila nga mga Zamzumim,

21katawohan nga dalagku kag madamu, kag matag-as subong sang mga Anakim; apang ginlaglag sila sang Ginoo sa atubangan nila; kag ginsobol nila sila, kag nagpuyo sa tal-us nila;

22subong sang ginhimo niya tungud sa mga anak ni Esau, nga nagapuyo sa Seir, sang paglaglag niya sang mga Horhanon sa atubangan nila, kag ginsobol nila sila, kag nagpuyo nga tal-us nila bisan tubtub sining adlaw.

23Ang mga Avim, nga nagpuyo sa mga minoro tubtub sa Gaza ang mga Caftorim, nga naggikan kay Caftor, naglaglag sa ila kag nagpuyo nga tal-us nila.)

24‘Tindug kamo, lakat kamo, kag tabok kamo sa nalupyakan sang Arnon; yari karon, ginhatag ko sa imo kamut si Sihon nga Amornon, hari sang Hesbon, kag ang iya duta; sugdi ang pagtag-iya sini, kag suaya sia sa inaway.

25Sa sining adlaw isugud ko sa pagbutang ang kakugmat kag ang kahadluk sa imo sa mga katawohan sa idalum sang bug-os nga langit, nga makabati sang sugid nahanungud sa imo kag magakurug, kag magakasakit bangud sa imo.’

26“Gani nagpadala ako sing mga manugbalita kutub sa kamingawan sang Quedemot kay Sihon nga hari sang Hesbon nga may mga polong sa paghidait, nga nagasiling,

27‘Paagiha ako sa imo duta: magausuy ako sang dalan, indi ako maglipas sa too ukon sa wala.

28Baligyaan mo ako sing kalan-on tungud sa cuarta, agud nga makakaon ako, kag hatagi ako sing tubig tungud sa cuarta, agud nga makainum ako; lamang paagiha ako sa akon mga tiil,

29subong sang ginhimo sa akon sang mga anak ni Esau nga nagapuyo sa Seir kag sang mga Moabnon nga nagapuyo sa Ar, tubtub nga makatabok ako sang Jordan pasulud sa duta nga ginhatag sa amon sang Ginoo nga amon Dios.’

30Apang si Sihon nga hari sang Hesbon indi buut magpaagi sa aton sa iya; kay ginpatig-a sang Ginoo nga imo Dios ang iya espiritu kag ginpabatinggilan ang iya tagiposoon, agud nga matugyan niya sia sa imo kamut, subong sang sa sining adlaw.

31Kag ang Ginoo nagsiling sa akon, ‘Yari karon, ginsugdan ko sa pagtugyan kay Sihon kag ang iya duta sa atubangan mo; sugdi ang pagtag-iya, agud nga mapanubli mo ang iya duta.’

32Niyan si Sihon kag ang bug-os niyang katawohan naggowa sa pagsugata sa aton sa pagpakig-away sa Jahaz.

33Kag ang Ginoo nga aton Dios nagtugyan sa iya sa atubangan naton; kag ginlaglag naton sia kag ang iya mga anak nga lalaki kag ang bug-os niyang katawohan.

34Kag gin-agaw naton ang tanan niyang banwa sa sadtong tion kag ginlaglag sing bug-os ang tagsa ka banwa nga napuy-an, pati ang mga babayi kag ang mga magamay; wala gid kita sing ginbilin;

35lamang ginkuha naton nga aton inatihan ang kahayupan, pati ang inagaw sa mga banwang gin-agaw naton.

36Kutub sa Aroer, nga yara sa pangpang sang nalupyakan sang Arnon, kag kutub sa banwa nga yara sa nalupyakan, tubtub sa Galaad, wala sing banwa nga tama kataas sa aton; ang tanan gintugyan sang Ginoo nga aton Dios sa aton.

37Lamang wala ka magpalapit sa duta sang mga anak ni Amon, ang bug-os nga natabok sang suba nga Jaboc, kag ang mga banwa sa kabakoloran, kag sa bisan diin nga gindumilian kita sang Ginoo nga aton Dios.

← Chapter 1 Jump to: Chapter 3 →