Deuteronomy 6

Ilonggo (Ang Biblia (1982))

← Chapter 5 Jump to: Chapter 7 →

1“Karon ini amo ang sogo, ang mga palatukuran kag ang mga pagsolondan nga ginsogo sang Ginoo nga inyo Dios nga itudlo sa inyo, agud nga mahimo ninyo sila sa duta nga ginatabok ninyo, sa pagtag-iya sini;

2agud nga magkahadluk ka sa Ginoo nga imo Dios, sa pagbantay sang tanan niyang palatukuran kag sang iya mga sogo, nga ginasogo ko sa imo, ikaw kag ang imo anak nga lalaki kag ang imo apo, sa tanan nga adlaw sang imo kabuhi; kag agud nga maglawig ang imo mga adlaw.

3Busa pamatii, O Israel, kag bantayi sa paghimo sini; agud nga magmaayo sa imo, kag agud nga magdamu ka gid, subong sang ginsaad sa inyo sang Ginoo, ang Dios sang imo mga ginikanan, sa duta nga nagailig sing gatas kag dugus.

4“Pamatii, O Israel: ang Ginoo nga aton Dios, isa ka Ginoo lamang;

5kag higugmaon mo ang Ginoo nga imo Dios sa bug-os mong tagiposoon, kag sa bug-os mong kalag, kag sa bug-os mong kusug.

6Kag ining mga polong nga ginasogo ko karon sa imo manginsa imo tagiposoon;

7kag itudlo mo sila sing makugihon sa imo mga anak, kag hambalon mo sila sa nagalingkod ka sa imo balay, kag sa nagalakat ka sa dalanon, kag sa nagahigda ka, kag sa nagabangon ka.

8Kag ibugkos mo sila nga tanda sa imo kamut, kag manginfilacteria sila sa ulut sang imo mga mata.

9Kag isulat mo sila sa mga bakalan sang imo balay kag sa imo mga gawang.

10“Kag kon mapasulud ka na sang Ginoo nga imo Dios sa duta nga ginsumpa niya sa imo mga ginikanan, kay Abraham, kay Isaac, kag kay Jacob, sa paghatag sa imo, sing kabanwaanan nga dalagku kag maayo, nga wala mo pagpatinduga,

11kag mga balay nga puno sang tanan nga maayo nga butang, nga wala mo pagpun-a, kag mga suluptan sing tubig nga pinakutkut, nga wala mo pagkutkuta, kag mga katamnan sang uvas kag kakahoyan nga olivo, nga wala mo pag-itanum, kag kon magkaon ka kag mabusug,

12niyan mag-andam ka basi nga malipat ka sa Ginoo, nga nagpagowa sa imo gikan sa duta sang Egipto, gikan sa balay sang kahiolipnan.

13Kahadlukan mo ang Ginoo nga imo Dios; kag alagdon mo sia, kag magsumpa tungud sa iya ngalan.

14Dili kamo magsonod sa iban nga mga dios, sa mga dios sang mga katawohan nga yara sa palibut ninyo;

15kay ang Ginoo nga imo Dios nga yara sa tunga nimo Dios nga maimon; basi nga magdabdab ang kaakig sang Ginoo nga imo Dios batok sa imo, kag laglagon ka niya gikan sa kadaygan sang duta.

16“Dili ninyo pagsulayon ang Ginoo nga inyo Dios, subong sang pagsulay ninyo sa iya sa Masa.

17Bantayan ninyo sing makugi ang mga sogo sang Ginoo nga inyo Dios, kag ang iya mga pagpamatuud, kag ang iya mga palatukuran, nga nasogo niya sa imo.

18Kag himoon mo ang matarung kag maayo sa itololok sang Ginoo, agud nga magmaayo sa imo, kag nga makasulud ka kag makapanag-iya sang maayong duta nga ginsumpa sang Ginoo sa imo mga ginikanan

19sa pagsobol sang tanan mong kaaway gikan sa atubangan mo, sono sa napamolong sang Ginoo.

20“Kon damlag magpamangkot sa imo ang imo anak nga lalaki, ‘Ano bala ang kahologan sang mga pagpamatuud kag sang mga palatukuran kag sang mga pagsolondan nga ginsogo sa inyo sang Ginoo nga aton Dios?’

21Niyan magsiling ka sa imo anak, ‘Kami mga ulipon ni Faraon sa Egipto; kag ang Ginoo nagpagowa sa amon gikan sa Egipto sa gamhanan nga kamut;

22kag ang Ginoo nagpakita sing mga tanda kag mga kalatingalahan, nga dalagku kag makalaglag, batok sa Egipto, kag batok kay Faraon kag batok sa bug-os niyang panimalay, sa atubangan sang amon mga mata;

23kag ginpagowa niya kita gikan didto, agud nga mapasulud niya kita sa paghatag sa aton sang duta nga ginsumpa niya sa aton mga ginikanan.

24Kag nagsogo sa aton ang Ginoo sa paghimo sini tanan nga palatukuran, sa pagkahadluk sa Ginoo nga aton Dios, tungud sa aton kaayohan sa gihapon, agud nga matipigan niya kita nga buhi, subong sang sa sining adlaw.

25Kag ini manginpagkamatarung nga sa aton, kon bantayan naton sa paghimo sini tanan nga sogo sa atubangan sang Ginoo nga aton Dios, sono sa nasogo niya sa aton.’

← Chapter 5 Jump to: Chapter 7 →