Deuteronomy 26

Ilonggo (Ang Biblia (1982))

← Chapter 25 Jump to: Chapter 27 →

1“Kon makasulud ka na sa duta nga ginahatag nga panublion nimo sang Ginoo nga imo Dios, kag magtag-iya sini, kag magpuyo sa iya,

2magkuha ka sa nahauna sang tanan nga bunga sang duta, nga matipon mo gikan sa duta nga ginahatag sa imo sang Ginoo nga imo Dios, kag isulud mo ini sa alat, kag magkadto sa duug nga pilion sang Ginoo nga imo Dios, sa pagpapuyo didto sang iya ngalan.

3Kag magkadto ka sa sacerdote nga yara sa sadto nga mga adlaw, kag magsiling sa iya, ‘Ginapahayag ko sini nga adlaw sa Ginoo nga imo Dios nga nag-abut ako sa duta nga ginsumpa sang Ginoo sa amon mga ginikanan nga ihatag sa amon.’

4Niyan kuhaon sang sacerdote ang alat sa imo kamut, kag ibutang ini sa atubangan sang halaran sang Ginoo nga imo Dios.

5“Kag magsabat ka sa atubangan sang Ginoo nga imo Dios, ‘Isa ka Sirianhon nga libudlibud ang akon amay; kag nagdulhog sia sa Egipto kag nagpanlugayaw didto, nga pila lamang ka bilog; kag didto nahimo sia nga isa ka pungsud, daku, gamhanan, kag madamu.

6Kag ginpintasan kami sang mga Egiptohanon, kag ginpapiotan kami, kag ginbutangan nila kami sing mapiot nga kahiolipnan.

7Niyan nagtuaw kami sa Ginoo, ang Dios sang amon mga ginikanan, kag ginpamatian sang Ginoo ang amon tingug, kag gintolok ang amon kapipit-an, ang amon pagpangabudlay, kag ang pagpigus sa amon;

8kag ginpagowa kami sang Ginoo gikan sa Egipto sa kamut nga gamhanan kag sa butkon nga inuntay, sa daku nga kakugmat, may mga tanda kag may mga katingalahan;

9kag ginpasulud niya kami sa sini nga duug kag ginhatag sa amon ini nga duta, duta nga nagailig sing gatas kag dugus.

10Kag yari karon, nadala ko ang nahauna nga bunga sang duta, nga nahatag mo sa akon, O Ginoo.’ Kag ibutang mo ini sa atubangan sang Ginoo nga imo Dios, kag magsimba sa atubangan sang Ginoo nga imo Dios;

11kag magkalipay ka sa tanan nga kaayohan nga nahatag sa imo sang Ginoo nga imo Dios, kag sa imo panimalay, ikaw, kag ang Levinhon, kag ang manlulugayaw nga yara sa tunga nimo.

12“Kon nakatapus ka na sa pagkuha sang tanan nga ikapulo sang imo patubas sa ikatlo nga tuig, nga amo ang tuig sang ikapulo, niyan ihatag mo ini sa Levinhon, sa manlulugayaw, sa ilo, kag sa balo nga babayi, agud nga makakaon sila sa sulud sang imo mga gawang kag mabusug,

13niyan magsiling ka sa atubangan sang Ginoo nga imo Dios, ‘Ginpakuha ko sa akon balay ang mga butang nga balaan, kag nahatag ko man sila sa Levinhon, sa manlulugayaw, sa ilo, kag sa balo nga babayi, sono sa tanan nga sogo nga ginsogo mo sa akon; wala ako maglapas sang bisan ano sang imo mga sogo, ukon ginkalipatan ko sila;

14wala ako sing ginkaon sini sa akon paglalaw, ukon nagpasipakpak sini nga dimatinlo, ukon naghatag sini nga sa minatay; ginpamatian ko ang tingug sang Ginoo nga akon Dios, naghimo ako sono sa tanan nga nasogo mo sa akon.

15Tamda gikan sa balaan mo nga puluy-an, gikan sa langit, kag pakamaayoha ang imo katawohan nga Israel kag ang duta nga nahatag mo sa amon, sono sa ginsumpa mo sa amon mga ginikanan, duta nga nagailig sing gatas kag dugus.’

16“Sa sini nga adlaw ang Ginoo nga imo Dios nagasogo sa imo sa paghimo sini nga mga palatukuran kag mga pagsolondan; busa bantayan mo kag himoon sila sa bug-os mo nga tagiposoon kag sa bug-os mo nga kalag.

17Napamatud-an mo ang Ginoo sini nga adlaw nga mangin-imo Dios, kag nga buut ka maglakat sa iya mga dalanon, kag magbantay sang iya mga palatukuran kag sang iya mga sogo kag sang iya mga pagsolondan, kag magpamati sang iya tingug;

18kag napamatud-an ka sang Ginoo sini nga adlaw nga mangin-iya katawohan nga kaugalingon, sono sa iya ginsaad sa imo, kag nga magbantay ka sa tanan niya nga sogo,

19sa paghimo sa imo nga mataas labaw sa tanan nga pungsud nga nahimo niya, sa kadayawan kag sa ngalan kag sa kadungganan, kag agud nga ikaw manginbalaan nga katawohan sang Ginoo nga imo Dios, sono sa napamolong niya.”

← Chapter 25 Jump to: Chapter 27 →