Deuteronomy 7

Ilonggo (Ang Biblia (1982))

← Chapter 6 Jump to: Chapter 8 →

1“Kon mapasulud ka na sang Ginoo nga imo Dios sa duta diin nagakadto ka sa pagtag-iya sini, kag magsobol sang madamung mga pungsud gikan sa atubangan mo, ang mga Hethanon, ang mga Gergasnon, ang mga Amornon, ang mga Canaanhon, ang mga Pereznon, ang mga Hevhanon, kag ang mga Jebusnon, pito ka pungsud nga labi pa kadaku kag labi pa kagamhanan sa imo,

2kag kon ang Ginoo nga imo Dios magtugyan sa ila sa atubangan mo, kag dag-on mo sila; niyan laglagon mo sila sing bug-os; dili ka magpakigkatipan sa ila, ukon magpakita sing kalooy sa ila.

3Dili ka magpangasawa sa ila, dili ka maghatag sang imo anak nga babayi sa iya anak nga lalaki, kag dili ka magkuha sang iya anak nga babayi nga sa imo anak nga lalaki.

4Kay patalikdon niya ang imo anak gikan sa pagsonod sa akon, agud nga mag-alagad sila sa iban nga mga dios; sa amo ang kasingkal sang Ginoo magadabdab batok sa imo, kag laglagon ka niya sing madali.

5Apang amo ini ang himoon ninyo sa ila: lumpagon ninyo ang ila mga halaran, kag dugmukon ang ila mga obelisco, kag pudlon ang ila mga Asherim, kag sonogon sa kalayo ang ila mga larawan nga tinigban.

6“Kay ikaw katawohan nga balaan sa Ginoo nga imo Dios; ang Ginoo nga imo Dios nagpili sa imo nga mangin-iya katawohan nga kaugalingon, labaw sa tanan nga katawohan nga yara sa kadaygan sang duta.

7Ang Ginoo wala maghigugma sa inyo ukon magpili sa inyo bangud nga labi pa kamo kadamu sa bisan anong katawohan, kay kamo labi pa gid kadiotay sa tanan nga katawohan;

8kondi bangud nga ang Ginoo nagahigugma sa inyo, kag bangud nga buut niya tumanon ang sumpa niya sa inyo mga ginikanan, ginpagowa kamo sang Ginoo sa gamhanan nga kamut, kag gintubus kamo gikan sa balay sang kahiolipnan, gikan sa kamut ni Faraon nga hari sang Egipto.

9Busa kilalaha nga ang Ginoo nga imo Dios amo ang Dios, ang Dios nga matutum nga nagabantay sing katipan kag malig-on nga paghigugma sa mga nagahigugma sa iya kag nagabantay sang iya mga sogo, tubtub sa linibo nga mga kaliwatan,

10kag nagabalus sa ila sa nawung sa nagadumut sa iya, sa paglaglag sa ila; indi sia magpadugay sa nagadumut sa iya, magabalus sia sa iya nawung.

11Busa bantayan mo ang sogo, kag ang mga palatukuran, kag ang mga pagsolondan, nga ginasogo ko sa imo sining adlaw, sa paghimo sa ila.

12“Kag bangud nga nagpamati kamo sining mga pagsolondan, kag nagabantay kag nagahimo sa ila, ang Ginoo nga imo Dios magabantay upud sa imo sang katipan kag sang malig-on nga paghigugma nga ginsumpa niya sa imo mga ginikanan;

13sia magahigugma sa imo, magapakamaayo sa imo, kag magapabuad sa imo; sia magapakamaayo man sang bunga sang imo lawas kag sang bunga sang imo duta, sang imo uyas kag sang imo bag-ong alak kag sang imo lana, sang binuad sang imo kahayupan kag sang mga tinday sang imo panong, sa duta nga ginsumpa niya sa imo mga ginikanan nga ihatag sa imo.

14Pakamaayohon ka labaw sa tanan nga katawohan; walay baw-as nga lalaki ukon babayi sa inyo, ukon sa imo kahayupan.

15Kag ang Ginoo magakuha sa imo sang tanan nga balatian; kag wala gid sang malaut nga mga masakit sang Egipto, nga nahibaloan mo, nga ibutang niya sa imo, kondi ibutang sila sa tanan nga nagadumut sa imo.

16Kag papason mo ang tanan nga katawohan nga itugyan sa imo sang Ginoo nga imo Dios, ang imo mga mata dili magkaawa sa ila; kag dili ka mag-alagad sa ila mga dios, kay ina manginsiod sa imo.

17“Kon magsiling ka sa imo tagiposoon, ‘Ining mga pungsud labi pa kadamu sa akon; paano bala ang pagkasarang ko sa pagsobol sa ila?’

18Dili ka mahadluk sa ila, apang dumdumon mo sing maayo ang ginhimo sang Ginoo nga imo Dios kay Faraon kag sa bug-os nga Egipto,

19ang dalagku nga mga pagtilaw nga nakita sang imo mga mata, ang mga tanda, ang mga kalatingalahan, ang gamhanan nga kamut, kag ang butkon nga inuntay, nga paagi sini ginpagowa ikaw sang Ginoo nga imo Dios; sa amo ang Ginoo nga imo Dios magahimo sa tanan nga katawohan nga ginakahadlukan mo.

20Labut pa ang Ginoo nga imo Dios magapadala sa ila sang alingayo, tubtub nga ang mga nabilin kag ang mga nagapanago mawala sa atubangan mo.

21Dili ka malisang sa ila; kay ang Ginoo nga imo Dios yara sa tunga nimo, Dios nga daku kag makakulugmat.

22Kag ang Ginoo nga imo Dios magasobol sadtong mga pungsud gikan sa atubangan mo sing amat-amat; dili mo pagpapason sila sa gilayon, basi nga ang kasapatan sang latagon magdamu sa imo.

23Apang ang Ginoo nga imo Dios magatugyan sa ila sa atubangan nimo, kag magalutus sa ila sa dakung paglutus, tubtub nga malaglag sila.

24Kag itugyan niya ang ila mga hari sa imo kamut, kag walaon mo ang ila ngalan sa idalum sang langit; walay tawo nga makatindiug sa atubangan mo, tubtub nga malaglag mo sila.

25Sonogon ninyo sa kalayo ang mga larawan nga tinigban sang ila dios; dili mo pagkaibogan ang pilak ukon ang bulawan nga yara sa ila, ukon kuhaon ini nga sa imo, basi nga masiod ka sa ila; kay ini kangil-aran sa Ginoo nga imo Dios.

26Kag dili mo pagpasudlon ang kangil-aran sa imo balay, agud nga indi ka mangintinagudilian subong sa iya; maglihi ka sa iya sing bug-os kag magkangil-ad ka sa iya sing bug-os; kay tinagudilian ini nga butang.

← Chapter 6 Jump to: Chapter 8 →