Deuteronomy 8

Ilonggo (Ang Biblia (1982))

← Chapter 7 Jump to: Chapter 9 →

1“Ang bug-os nga sogo nga ginasogo ko sa imo sining adlaw bantayan ninyo sa paghimo, agud nga magkabuhi kamo kag magbuad, kag magsulud kag magtag-iya sang duta nga ginsumpa sang Ginoo sa inyo mga ginikanan.

2Kag dumdumon mo ang bug-os nga dalanon nga gintuytuyan sa imo sang Ginoo nga imo Dios sining kap-atan ka tuig sa kamingawan, agud nga mapapaubus ka niya, sa pagtilaw sa imo sa pagkilala sang yara sa imo tagiposoon, kon bala bantayan mo ang iya mga sogo, ukon indi.

3Kag ginpapaubus ka niya kag ginpagutuman ka kag ginpakaon ka sang mana, nga wala mo makilala, ukon makilala sang imo mga ginikanan; agud nga mapakilala ka niya nga indi lamang paagi sa kalan-on nagakabuhi ang tawo, kondi paagi sa tagsa ka butang nga nagagowa sa baba sang Ginoo nagakabuhi ang tawo.

4Ang imo panapton wala maglapat sa imo, ukon nagbanug ang imo tiil, sining kap-atan ka tuig.

5Niyan patugsilingan mo sa imo tagiposoon nga, subong nga ang tawo nagasilot sang iya anak, sa amo ang Ginoo nga imo Dios nagasilot sa imo.

6Gani bantayan mo ang mga sogo sang Ginoo nga imo Dios, sa paglakat sa iya mga dalanon, kag sa pagkahadluk sa iya.

7Kay ang Ginoo nga imo Dios nagadala sa imo sa maayong duta, duta sang kasapaan sang tubig, sang mga tuburan kag sang mga nagapuswit nga tubig, nga nagailig sa mga nalupyakan kag sa kabakoloran,

8duta sang trigo kag sebada, kag mga uvas kag mga higuera kag mga granada, duta sang mga olivo kag dugus,

9duta nga sa iya magakaon ka sing kalan-on nga walay kaiwaton, indi ka pagkulangon sing bisan ano sa iya, duta nga ang iya mga bato salsalon, kag sa iya kabakoloran magakutkut ka sing tumbaga.

10Kag magakaon ka kag mabusug, kag magapakamaayo ka sa Ginoo nga imo Dios tungud sang maayong duta nga nahatag niya sa imo.

11“Andami basi nga malipat ka sa Ginoo nga imo Dios, sa indi pagbantay sang iya mga sogo, sang iya mga pagsolondan, kag sang iya mga palatukuran, nga ginasogo ko sa imo sining adlaw:

12basi nga, sang nakakaon ka na kag nabusug, kag nakapatindug sing maayong mga balay kag nakapuyo sa ila,

13kag sang nagbuad ang imo kabakahan kag ang imo mga panong, kag nagbuad ang imo pilak kag ang imo bulawan, kag nagbuad ang tanan nga yara sa imo,

14niyan ang imo tagiposoon magtaas, kag malipat ka sa Ginoo nga imo Dios, nga nagpagowa sa imo gikan sa duta sang Egipto, gikan sa balay sang kahiolipnan,

15nga nagtuytuy sa imo paagi sa daku nga makakulugmat nga kamingawan, diin may mga man-ug nga dalitan kag mga iwiiwi kag duta nga kigas nga walay tubig, nga sia nagpatubud sing tubig gikan sa bato nga santikan,

16nga sa kamingawan nagpakaon sa imo sang mana, nga wala makilal-i sang imo mga ginikanan, agud nga mapapaubus ka niya kag matilawan ka niya, sa paghimo sa imo sing maayo sa kaolihian mo.

17Mag-andam basi nga magsiling ka sa imo tagiposoon, ‘Ang akon gahum kag ang kusug sang akon kamut nagpaagum sa akon sining manggad.’

18Magdumdum ka sa Ginoo nga imo Dios, kay sia amo ang nagahatag sa imo sing gahum sa pag-agum sing manggad; agud nga mapalig-on niya ang iya katipan nga ginsumpa niya sa imo mga ginikanan, subong sang sa sining adlaw.

19Kag kon kalimtan mo ang Ginoo nga imo Dios kag magsonod sa iban nga mga dios kag mag-alagad sa ila kag magsimba sa ila, nagapanaksi ako batok sa inyo sining adlaw nga sa pagkamatuud mawala kamo.

20Subong sang mga pungsud nga ginwala sang Ginoo sa atubangan ninyo, sa amo mawala kamo, bangud nga indi kamo magpamati sa tingug sang Ginoo nga inyo Dios.

← Chapter 7 Jump to: Chapter 9 →