Deuteronomy 4 — Ilonggo (Ang Biblia (1982))

1“Kag karon, O Israel, pamatii ang mga palatukuran kag ang mga pagsolondan nga ginatudlo ko sa inyo, sa paghimo sa ila; agud nga mabuhi kamo, kag makasulud kag makatag-iya sang duta nga ginhatag sa inyo sang Ginoo, ang Dios sang inyo mga ginikanan.

2Dili kamo magdugang sa polong nga ginasogo ko sa inyo, ukon magbuhin sa sini; agud nga mabantayan ninyo ang mga sogo sang Ginoo nga inyo Dios nga ginasogo ko sa inyo.

3Ang inyo mga mata makakita sang ginhimo sang Ginoo bangud sang Baal-peor; kay ang tanan nga tawo nga nagsonod sang Baal-peor ginlaglag sila sang Ginoo nga imo Dios gikan sa tunga ninyo;

4apang kamo nga nagtapik sa Ginoo nga inyo Dios buhi ang tagsa sa inyo sa sini nga adlaw.

5Yari karon, ako nakatudlo sa inyo sing mga palatukuran kag mga pagsolondan, sono sa ginsogo sa akon sang Ginoo nga akon Dios, nga himoon ninyo ang subong sa tunga sang duta diin nagasulud kamo sa pagtag-iya sa iya.

6Bantayi kag himoa sila; kay ini inyo kaalam kag inyo kaisipan sa itololok sang mga katawohan, nga makabati sini tanan nga palatukuran, kag magasiling, ‘Sa pagkamatuud ini nga daku nga pungsud maalam kag mahangponon nga katawohan.’

7Kag ano bala dira nga daku nga pungsud nga may dios nga tama kalapit sa ila, subong sa Ginoo nga aton Dios sa bisan san-o nga tawgon naton sia?

8Kay ano bala dira nga daku nga pungsud, nga may mga palatukuran kag mga pagsolondan nga tama katarung subong sini tanan nga kasogoan nga ginabutang ko sa atubangan ninyo sini nga adlaw?

9“Lamang andami ang imo kaugalingon, kag bantayi sing makugihon ang imo kalag, basi malimtan mo ang mga butang nga nakita sang imo mga mata, kag basi nga magbiya sila sa imo tagiposoon sa tanan nga adlaw sang imo kabuhi; ipakilala sila sa imo mga anak kag sa mga anak sang imo mga anak—

10Kon paano nga sang adlaw nga nag-atubang ka sa Ginoo nga imo Dios sa Horeb, ang Ginoo nagsiling sa akon, ‘Itipon ako sang katawohan, kag papamation ko sila sang akon mga polong, agud nga magtoon sila sa pagkahadluk sa akon sa tanan nga adlaw nga nagakabuhi sila sa duta, kag agud nga matudloan nila ang ila mga anak.’

11Kag nagpalapit kamo kag nagtindug sa ubus sang bukid, kag ang bukid nagdabdab sing kalayo tubtub sa alibutud sang langit, nga may kadulum, panganud, kag pitipit nga kadulum.

12Niyan ang Ginoo nagpamolong sa inyo gikan sa tunga sang kalayo; nabatian ninyo ang tingug sang mga polong, apang wala kamo sing nakita nga dagway; lamang nabatian ninyo ang tingug.

13Kag ginpahayag niya sa inyo ang iya katipan, nga ginsogo niya sa inyo nga himoon, ang napulo ka sogo; kag ginsulat niya sila sa duha ka tapitapi nga bato.

14Kag sa sadto nga tion nagsogo ang Ginoo sa akon sa pagtudlo sa inyo sing mga palatukuran kag mga pagsolondan, agud nga himoon ninyo sila sa duta diin nagasulud kamo sa pagtag-iya sa iya.

15“Busa andami ninyo sing maayo ang inyo kaugalingon. Kay wala kamo sing nakita nga bisan ano nga dagway sang adlaw nga ang Ginoo nagpakighambal sa inyo sa Horeb gikan sa tunga sang kalayo,

16basi nga dagtaan ninyo ang inyo kaugalingon kag maghimo kamo sing mga larawan nga tinigban sa kaangay sang bisan ano nga dagway, ang kaangay sang lalaki ukon babayi,

17ang kaangay sang bisan ano nga sapat nga yara sa duta, ang kaangay sang bisan ano nga pispis nga pakpakan nga nagalupad sa mga langit,

18ang kaangay sang bisan ano nga sapat nga nagasaug sa duta, ang kaangay sang bisan ano nga isda nga yara sa tubig sa idalum sang duta.

19Kag basi nga bayawon mo ang imo mga mata sa langit, kag sa makita mo ang adlaw kag ang bulan kag ang mga bitoon, ang bug-os nga kasoldadosan sang langit, mabuyok ka kag magsimba sa ila kag mag-alagad sa ila, nga nabahin sang Ginoo nga imo Dios sa tanan nga katawohan sa idalum sang bug-os nga langit.

20Apang ang Ginoo nagkuha sa inyo, kag nagpagowa sa inyo gikan sa horno nga salsalon, gikan sa Egipto, nga manginkatawohan niya nga panublion, subong sang sa sini nga adlaw.

21Labut pa ang Ginoo naakig sa akon tungud sa inyo, kag nagsumpa nga indi ako magtabok sang Jordan, kag nga indi ako magsulud sa sadto nga maayo nga duta nga ginahatag sa imo nga panublion sang Ginoo nga imo Dios.

22Kondi kinahanglan ako mapatay sa sini nga duta, indi ako kinahanglan magtabok sang Jordan; apang kamo magatabok kag magatag-iya sadto nga maayo nga duta.

23Andami ang inyo kaugalingon, basi nga malimtan ninyo ang katipan sang Ginoo nga inyo Dios, nga ginhimo niya upud sa inyo, kag maghimo kamo sing bisan ano nga larawan nga tinigban sa dagway sang bisan ano nga butang nga gindumili sa imo sang Ginoo nga imo Dios.

24Kay ang Ginoo nga imo Dios isa ka nagalamon nga kalayo, Dios nga maimon.

25“Kon mag-anak ka sing mga anak kag mga apo, kag magdugay ka na sa duta, kag magdagta sang inyo kaugalingon kag maghimo sing mga larawan nga tinigban sa dagway sang bisan ano nga butang, kag maghimo sang malaut sa itololok sang Ginoo nga inyo Dios, sa pagpaakig sa iya,

26ginatawag ko sa pagsaksi batok sa inyo ang langit kag ang duta sini nga adlaw, nga mawala kamo sa gilayon sing bug-os sa duta nga ginatabok ninyo ang Jordan sa pagtag-iya sini; indi maglawig ang inyo mga adlaw sa iya, kondi laglagon kamo sing bug-os.

27Kag ang Ginoo magpaaplaag sa inyo sa tunga sang mga katawohan, kag mabilin kamo nga pila ka bilog sa tunga sang mga pungsud sa diin dalhon kamo sang Ginoo.

28Kag didto magaalagad kamo sa mga dios nga kahoy kag bato, ang binuhatan sang mga kamut sang mga tawo, nga indi makakita, ukon makabati, ukon makakaon, ukon makapaninghut.

29Apang gikan didto pangitaon ninyo ang Ginoo nga inyo Dios, kag makita mo sia, kon pangitaon mo sia sa bug-os mo nga tagiposoon kag sa bug-os mo nga kalag.

30Kon yara ka sa kapipit-an, kag mag-abut sa imo ini tanan nga butang sa olihi nga mga adlaw magabalik ka sa Ginoo nga imo Dios kag magapamati sang iya tingug,

31kay ang Ginoo nga imo Dios maloloy-on nga Dios; indi sia magbiya sa imo ukon maglaglag sa imo ukon magkalimot sang katipan sang imo mga ginikanan nga ginsumpa niya sa ila.

32“Kay pamangkota karon ang mga adlaw nga nagligad, nga una sa imo, kutub sang adlaw nga gintuga sang Dios ang tawo sa duta, kag kutub sa isa ka ukbung sang langit tubtub sa isa, kon may dira bala nga subong sini kadaku nga butang ukon nabatian ang kaangay sini.

33May katawohan bala nga nakabati sang tingug sang bisan ano nga dios nga nagpamolong gikan sa tunga sang kalayo, subong sang nabatian mo, kag nabuhi?

34Ukon nakapangahas bala ang bisan ano nga dios sa pagkadto kag sa pagkuha sing isa ka pungsud gikan sa tunga sang isa ka pungsud, paagi sa mga pagtilaw, paagi sa mga tanda, kag paagi sa mga kalatingalahan, kag paagi sa inaway, kag paagi sa gamhanan nga kamut, kag paagi sa inuntay nga butkon, kag paagi sa dalagku nga mga kakugmat, sono sa tanan nga ginhimo sang Ginoo nga imo Dios sa inyo sa Egipto sa atubangan sang inyo mga mata?

35Sa imo ginpakita ini, agud nga makahibalo ka nga ang Ginoo amo ang Dios: wala na gid sing iban luwas sa iya.

36Gikan sa langit ginpabati niya ikaw sang iya tingug, agud nga matudloan niya ikaw; kag sa duta ginpakita niya ikaw sang iya daku nga kalayo, kag nabatian mo ang iya mga polong gikan sa tunga sang kalayo.

37Kag bangud nga ginhigugma niya ang imo mga ginikanan busa ginpili niya ang ila kaliwat sa olihi nila, kag ginpagowa ikaw gikan sa Egipto sa iya pagtambong, sa iya daku nga gahum,

38sa pagsobol gikan sa atubangan mo sing mga pungsud nga labi pa kadaku kag labi pa kakusug sa imo, sa pagpasulud sa imo, sa paghatag sa imo nga panublion sang ila duta, subong sang sa sini nga adlaw;

39busa kilalaha sa sini nga adlaw, kag hupti sa imo tagiposoon, nga ang Ginoo amo ang Dios sa langit sa ibabaw kag sa duta sa idalum; wala na gid sing iban.

40Busa bantayi ang iya mga palatukuran kag ang iya mga sogo, nga ginasogo ko sa imo sini nga adlaw, agud nga magmaayo sa imo, kag sa imo mga anak sa olihi nimo, kag nga mapalawig mo ang imo mga adlaw sa duta nga ginahatag sa imo sing dayon sang Ginoo nga imo Dios.”

41Niyan ginpain ni Moises ang tatlo ka banwa sa tabok sang Jordan nayon sa bulutlakan sang adlaw,

42agud nga magpalagyo didto ang nakapatay sing tawo, nga nagapatay sa iya isigkatawo sing dihungud, kag wala magdumut sa iya sa tion nga nagligad, kag nga sa pagpalagyo sa isa sini nga mga banwa magkabuhi sia:

43ang Bezer sa kamingawan sa kapatagan nga sa mga Rubenhon, kag ang Ramot sa Galaad nga sa mga Gadhanon, kag anag Golan sa Basan nga sa mga Manasinhon.

44Amo ini ang kasogoan nga ginpahamtang ni Moises sa atubangan sang mga anak sang Israel;

45ini amo ang mga pagpamatuud, ang mga palatukuran, kag ang mga pagsolondan, nga ginpamolong ni Moises sa mga anak sang Israel sang ila paggowa sa Egipto,

46sa tabok sang Jordan sa nalupyakan sa atubang sang Bet-peor, sa duta ni Sihon nga hari sang mga Amornon, nga nagpuyo sa Hesbon, nga ginlaglag ni Moises kag sang mga anak sang Israel, sang ila paggowa sa Egipto.

47Kag ginkuha nila sa pagtag-iya ang iya duta kag ang duta ni Og nga hari sang Basan, ang duha ka hari sang mga Amornon, nga yara sa tabok sang Jordan nayon sa bulutlakan sang adlaw;

48kutub sa Aroer, nga yara sa pangpang sang nalupyakan sang Arnon, tubtub sa Bukid nga Sion (nga amo, ang Hermon),

49lakip ang bug-os nga Araba sa tabok sang Jordan nayon sa sidlangan tubtub sa Dagat sang Araba, sa ubus sang lubluban sang Pisga.