Deuteronomy 34

Ilonggo (Ang Biblia (1982))

← Chapter 33 Jump to:

1Kag si Moises nagtaklad gikan sa kapatagan sang Moab pa Bukid sang Nebo, sa putokputokan sang Pisga, nga tampad sang Jerico. Kag ginpakita sa iya sang Ginoo ang bug-os nga duta sang Galaad, tubtub sa Dan,

2ang bug-os nga Neftali, ang duta sang Efraim kag sang Manases, ang bug-os nga duta sang Juda tubtub sa dagat sa katundan,

3ang Bagatnan, kag ang Kapatagan sang nalupyakan sang Jerico nga banwa sang mga palma, tubtub sa Zoar.

4Kag nagsiling sa iya ang Ginoo, “Ini amo ang duta nga ginsumpa ko kay Abraham, kay Isaac, kag kay Jacob, ‘Sa imo kaliwat ihatag ko ini.’ Ginpakita ko ini sa imo mga mata, apang indi ka magtabok didto.”

5Gani napatay didto si Moises nga alagad sang Ginoo sa duta sang Moab, sono sa polong sang Ginoo,

6kag ginlubung sia niya sa nalupyakan sa duta sang Moab sa tampad sang Bet-peor; apang wala sing tawo nga nakahibalo sang iya lulubngan tubtub sini nga adlaw.

7Si Moises isa ka gatus kag duha ka pulo ka tuig sang pagkapatay niya; ang iya mata wala magdulum, ukon nagbuhin ang iya kinaugali nga kusug.

8Kag naghaya ang katawohan sang Israel kay Moises sa kapatagan sang Moab sing katloan ka adlaw; niyan natapus ang mga adlaw sang paghaya kag paglalaw tungud kay Moises.

9Kag si Josue nga anak ni Nun puno sang espiritu sang kaalam, kay si Moises nagtakdong sang iya mga kamut sa iya; gani ang katawohan sang Israel nagpamati sa iya, kag naghimo sono sa ginsogo sang Ginoo kay Moises.

10Kag wala na sing naglutaw nga manalagna sa Israel kaangay kay Moises, nga nakilala sang Ginoo sa nawung kag nawung,

11sa tanan nga tanda kag katingalahan nga ginpadala sang Ginoo sa iya sa paghimo sa duta sang Egipto, kay Faraon kag sa tanan niya nga alagad kag sa bug-os niya nga duta,

12kag sa tanan nga kamut nga gamhanan kag sa tanan nga dalagku nga kakugmat nga ginhimo ni Moises sa itololok sang bug-os nga Israel.

← Chapter 33 Jump to: