Deuteronomy 5

Ilonggo (Ang Biblia (1982))

← Chapter 4 Jump to: Chapter 6 →

1Kag gintawag ni Moises ang bug-os nga Israel, kag nagsiling sa ila, “Pamatii, O Israel, ang mga palatukuran kag ang mga pagsolondan nga ginapamolong ko sa inyo mga idulungug sining adlaw, agud nga maton-an ninyo sila kag mabantayan sa paghimo sa ila.

2Ang Ginoo nga aton Dios nagpakigkatipan sa aton sa Horeb.

3Ang Ginoo wala maghimo sining katipan upud sa aton mga ginikanan, kondi upud sa aton, tanan kita diri buhi sining adlaw.

4Ang Ginoo nagpamolong sa inyo sa nawung kag nawung sa bukid, gikan sa tunga sang kalayo,

5samtang ako nagtindug sa tunga sang Ginoo kag ninyo sa sadtong tion, sa pagpahayag sa inyo sang polong sang Ginoo; kay nahadluk kamo bangud sang kalayo, kag wala magtukad sa bukid. Sia nagasiling:

6“‘Ako amo ang Ginoo nga imo Dios, nga nagpagowa sa imo gikan sa duta sang Egipto, gikan sa balay sang kahioliponan.

7“‘Dili ka maghuput sing iban nga mga dios sa atubangan ko.

8“‘Dili ka maghimo nga sa imo sing larawan nga tinigban, ukon ano nga kaangay sang bisan ano nga butang nga yara sa langit sa ibabaw, ukon yara sa duta sa idalum, ukon sa tubig sa idalum sang duta;

9dili ka magyaub sa ila ukon mag-alagad sa ila; kay ako ang Ginoo nga imo Dios maimon nga Dios, nga nagaduaw sang kalautan sang mga ginikanan sa mga anak kag sa ikatlo kag sa ikap-at nga kaliwatan sang mga nagadumut sa akon,

10apang nagapakita sing malig-on nga paghigugma sa linibo sang mga nagahigugma sa akon kag nagabantay sang akon mga sogo.

11“‘Dili mo paggamiton ang ngalan sang Ginoo nga imo Dios sa walay kapuslanan: kay indi pagkabigon sang Ginoo nga walay sala ang nagagamit sang iya ngalan sa walay kapuslanan.

12“‘Bantayi ang adlaw nga inugpahuway, sa pagpakabalaan sini, sono sa ginsogo sa imo sang Ginoo nga imo Dios.

13Sa anum ka adlaw magpangabudlay ka, kag maghimo sang tanan mong buluhaton;

14apang ang ikapitong adlaw inugpahuway sa Ginoo nga imo Dios; sa sini dili ka maghimo sing bisan anong buluhaton, ikaw, ukon ang imo anak nga lalaki, ukon ang imo anak nga babayi, ukon ang imo alagad nga lalaki, ukon ang imo alagad nga babayi, ukon ang imo baka nga lalaki, ukon ang imo asno, ukon ano sang imo kahayupan, ukon ang imo dumuloong nga yara sa sulud sang imo mga gawang, agud nga ang imo alagad nga lalaki kag ang imo alagad nga babayi makapahuway subong sa imo.

15Dumdumon mo nga ikaw nangin-ulipon sa duta sang Egipto, kag nga ang Ginoo nga imo Dios nagpagowa sa imo gikan didto paagi sa gamhanan nga kamut kag paagi sa inuntay nga butkon; busa ang Ginoo nga imo Dios nagsogo sa imo sa pagbantay sang adlaw nga inugpahuway.

16“‘Tahora ang imo amay kag ang imo iloy, subong sang ginsogo sa imo sang Ginoo nga imo Dios; agud nga maglawig ang imo mga adlaw, kag agud nga magmaayo sa imo, sa duta nga ginahatag sa imo sang Ginoo nga imo Dios.

17“‘Dili ka magpatay.

18“‘Kag dili ka magpanglahi.

19“‘Kag dili ka magpangawat.

20“‘Kag dili ka magsaksi sing dimatuud batok sa imo isigkatawo.

21“‘Kag dili ka magkaibog sang asawa sang imo isigkatawo; kag dili ka magkaibog sang balay sang imo isigkatawo, sang iya latagon, ukon sang iya alagad nga lalaki, ukon sang iya alagad nga babayi, sang iya baka nga lalaki, ukon sang iya asno, ukon bisan anong butang nga iya sang imo isigkatawo.’

22“Ining mga polong ginpamolong sang Ginoo sa bug-os ninyo nga pagtilipon sa bukid gikan sa tunga sang kalayo, sang panganud, kag sang pitipit nga kadulum, sa daku nga tingug; kag wala na sia magdugang. Kag ginsulat niya sila sa duha ka tapitapi nga bato, kag ginhatag sila sa akon.

23Kag sang nakabati kamo sang tingug gikan sa tunga sang kadudulman, samtang nagadabdab sing kalayo ang bukid, nagpalapit kamo sa akon, ang tanan nga pangolo sang mga kabikahan, kag ang inyo mga tigulang;

24kag nagsiling kamo, ‘Yari karon, ang Ginoo nga aton Dios nagpakita sa aton sang iya himaya kag sang iya pagkadaku, kag nabatian naton ang iya tingug gikan sa tunga sang kalayo; nakita naton sining adlaw nga ang Dios nagpakighambal sa tawo kag ang tawo nagakabuhi.

25Busa karon ngaa bala dapat kita mapatay? Kay ining daku nga kalayo magaupus sa aton; kon makabati pa kita sang tingug sang Ginoo nga aton Dios, mapatay kita.

26Kay sin-o bala sa tanan nga unud, nga nakabati sang tingug sang Dios nga buhi nga nagapakighambal gikan sa tunga sang kalayo, subong sang sa aton, kag nagkabuhi?

27Palapit ka, kag pamatii ang tanan nga isiling sang Ginoo nga aton Dios; kag ipamolong sa amon ang tanan nga isiling sa imo sang Ginoo nga aton Dios; kag kami magapamati kag magahimo sini.’

28“Kag nabatian sang Ginoo ang inyo mga polong, sang nagpakighambal kamo sa akon; kag nagsiling sa akon ang Ginoo, ‘Nabatian ko ang mga polong sining katawohan, nga ginpamolong nila sa imo; nasiling nila sing maayo ang tanan nga napamolong nila.

29O nga may subong kuntani nga tagiposoon sa ila, nga magkahadluk sila sa akon kag magbantay sang tanan ko nga sogo sa gihapon, agud nga magmaayo sa ila kag sa ila mga anak sa gihapon!

30Lakat kag isiling sa ila, “Pauli kamo sa inyo mga layanglayang.”

31Apang ikaw, tindug ka diri sa akon luyo, kag ipamolong ko sa imo ang tanan nga sogo kag ang mga palatukuran kag ang mga pagsolondan nga dapat mo itudlo sa ila, agud nga himoon nila ini sa duta nga ginahatag ko sa ila nga panag-iyahan.’

32Busa bantayan ninyo sa paghimo sono sa nasogo sang Ginoo nga inyo Dios sa inyo; dili kamo maglipas sa too ukon sa wala.

33Maglakat kamo sa tanan nga dalanon nga nasogo sa inyo sang Ginoo nga inyo Dios, agud nga magkabuhi kamo, kag magmaayo sa inyo, kag mapalawig ninyo ang inyo mga adlaw sa duta nga panag-iyahan ninyo.

← Chapter 4 Jump to: Chapter 6 →