Deuteronomy 12

Ilonggo (Ang Biblia (1982))

← Chapter 11 Jump to: Chapter 13 →

1“Ini amo ang mga palatukuran kag ang mga pagsolondan nga bantayan ninyo sa paghimo sa duta nga nahatag sa inyo sang Ginoo, ang Dios sang inyo mga ginikanan, sa pagtag-iya sa iya, sa tanan nga adlaw nga nagakabuhi kamo sa ibabaw sang duta.

2Laglagon ninyo sing totoo ang tanan nga duug diin ang mga pungsud nga inyo daugon nag-alagad sa ila mga dios, sa ibabaw sang mga bukid nga mataas kag sa ibabaw sang kabakoloran kag sa idalum sang tagsa ka hilaw nga kahoy;

3lumpagon ninyo ang ila mga halaran, kag dugmokon ang ila mga obelisco, kag sonogon sa kalayo ang ila mga Asherim; pudlon ninyo ang mga larawan nga tinigban sang ila mga dios, kag laglagon ninyo ang ila ngalan gikan sa sadto nga duug.

4Dili kamo maghimo sing subong sa Ginoo nga inyo Dios.

5Apang sa duug nga pilion sang Ginoo nga inyo Dios gikan sa tanan ninyo nga kabikahan sa pagbutang sang iya ngalan didto bisan sa iya puluy-an pangitaon ninyo, kag didto kamo magkadto;

6didto dalhon ninyo ang inyo mga halad-nga-sinonog kag ang inyo mga halad, ang inyo mga ikapulo kag ang halad-nga-binayaw sang inyo kamut, ang inyo mga saad, ang inyo mga halad-nga-kinabubut-on, kag ang mga panganay sang inyo mga baka kag sang inyo panong;

7kag didto magakaon kamo sa atubangan sang Ginoo nga inyo Dios, kag magakalipay sa tanan nga buluhaton sang inyo kamut, kamo kag ang inyo mga panimalay, diin ang Ginoo nga imo Dios nagpakamaayo sa imo.

8Dili ninyo paghimoon sono sa tanan nga butang nga ginahimo naton diri sini nga adlaw, ang tagsa ka tawo bisan ano nga matarung sa iya kaugalingon nga mga mata;

9kay wala pa kamo makalambut sa kapahuwayan kag sa panublion nga ginahatag sa inyo sang Ginoo nga inyo Dios.

10Apang kon magtabok kamo sa Jordan, kag magpuyo sa duta nga ipapanubli sa inyo sang Ginoo nga inyo Dios, kag kon nagahatag sia sa inyo sing kapahuwayan gikan sa tanan ninyo nga kaaway palibut, sa bagay nga magpuyo kamo sa kalig-on,

11niyan sa duug nga pilion sang Ginoo nga inyo Dios, sa pagpapuyo sang iya ngalan didto, dalhon ninyo didto ang tanan nga ginasogo ko sa inyo: ang inyo mga halad-nga-sinonog kag ang inyo mga halad, ang inyo mga ikapulo kag ang halad-nga-binayaw sang inyo kamut, kag ang tanan ninyo nga pinili nga saad nga ginasaad ninyo sa Ginoo.

12Kag magakalipay kamo sa atubangan sang Ginoo nga inyo Dios, kamo, kag ang inyo mga anak nga lalaki kag ang inyo mga anak nga babayi, ang inyo mga alagad nga lalaki kag ang mga alagad nga babayi, kag ang Levinhon nga yara sa sulud sang inyo mga gawang, sanglit nga wala sia sing bahin ukon panublion upud sa inyo.

13Andami ang imo kaugalingon nga dili ka maghalad sang imo mga halad-nga-sinonog sa tagsa ka duug nga makita mo;

14kondi sa duug nga pilion sang Ginoo sa isa sang imo mga kabikahan, didto maghalad ka sang imo mga halad-nga-sinonog, kag didto maghimo ka sang tanan nga ginasogo ko sa imo.

15“Wala sing sapayan, makaihaw ka kag makakaon sing unud sa sulud sang tanan mo nga gawang, sono sa bug-os nga kaila sang imo kalag, sono sa pagpakamaayo nga nahatag sa imo sang Ginoo nga imo Dios; ang dimatinlo kag ang matinlo makakaon sini, subong sang gacela kag subong sang usa nga lalaki.

16Lamang dili kamo magkaon sang dugo; ulaon ninyo ini sa duta subong sang tubig.

17Dili ka makakaon sa sulud sang imo gawang sang ikapulo sang imo trigo ukon sang imo bag-o nga alak ukon sang imo lana, ukon sang mga panganay sang imo mga baka ukon sang imo panong, ukon bisan ano sang imo mga saad nga ginsaad mo, ukon sang imo mga halad-nga-kinabubut-on, ukon sang halad-nga-binayaw sang imo kamut;

18kondi kaonon mo sila sa atubangan sang Ginoo nga imo Dios sa duug nga pilion sang Ginoo nga imo Dios, ikaw kag ang imo anak nga lalaki kag ang imo anak nga babayi, ang imo alagad nga lalaki kag ang imo alagad nga babayi, kag ang Levinhon nga yara sa sulud sang imo gawang; kag magkalipay ka sa atubangan sang Ginoo nga imo Dios sa tanan nga buluhaton sang imo kamut.

19Andami ang imo kaugalingon nga dili mo pagpatumbayaan ang Levinhon samtang nga nagakabuhi ka sa imo duta.

20“Kon mapalapad sang Ginoo nga imo Dios ang imo ginsakpan, sono sa nasaad niya sa imo, kag magsiling ka, ‘Magakaon ako sing unud,’ bangud nga nagakaila ang imo kalag sa pagkaon sing unud, makakaon ka sing unud sono sa bug-os nga kaila sang imo kalag.

21Kon malayo sa imo ang duug nga pilion sang Ginoo nga imo Dios sa pagbutang didto sang iya ngalan, niyan mag-ihaw ka gikan sa imo kabakahan ukon gikan sa imo panong, nga nahatag sa imo sang Ginoo, sono sa nasogo ko sa imo; kag makakaon ka sa sulud sang imo mga gawang sono sa bug-os nga kaila sang imo kalag.

22Magakaon ka sini, subong sang pagkaon sang gacela ukon sang usa nga lalaki; ang dimatinlo kag ang matinlo magakaon sini sing alangay.

23Lamang andami nga dili ka magkaon sang dugo; kag ang dugo amo ang kabuhi, kag dili ka magkaon sang kabuhi upud sang unud.

24Dili mo pagkaonon ini; ulaon mo ini sa duta subong sang tubig.

25Dili mo pagkaonon ini; agud nga magmaayo sa imo kag sa imo mga anak sa olihi nimo, kon maghimo ka sang matarung sa mga mata sang Ginoo.

26Apang ang imo mga butang nga balaan nga yara sa imo, kag ang mga saad mo, dalhon mo sila, kag magkadto sa duug nga pilion sang Ginoo,

27kag idolot mo ang imo mga halad-nga-sinonog, ang unud kag ang dugo, sa halaran sang Ginoo nga imo Dios; ang dugo sang imo mga halad iula sa ibabaw sang halaran sang Ginoo nga imo Dios, apang kaonon mo ang unud.

28Bantayi kag pamatii ini tanan nga polong nga ginasogo ko sa imo, agud nga magmaayo sa imo kag sa imo mga anak sa olihi nimo sa gihapon, kon maghimo ka sang maayo kag sang matarung sa mga mata sang Ginoo nga imo Dios.

29“Kon malaglag sang Ginoo nga imo Dios ang mga pungsud gikan sa imo atubangan diin nagakadto ka sa pagdaug sa ila, kag madaug mo sila kag magpuyo sa ila duta,

30andami ang imo kaugalingon nga dili ka masiod sa pagsonod sa ila, sa tapus nga malaglag sila gikan sa imo atubangan, kag nga dili ka magpamangkot nahanungud sa ila mga dios, nga nagasiling, ‘Paano bala ang pag-alagad sini nga mga pungsud sa ila mga dios—agud nga ako man maghimo sing subong.’

31Dili ka maghimo sing subong sa Ginoo nga imo Dios; kay ang tagsa ka kangil-aran sa Ginoo nga ginadumtan niya, nahimo nila sa ila mga dios; kay bisan ang ila mga anak nga lalaki kag ang ila mga anak nga babayi ginasonog nila sa kalayo sa ila mga dios.

32“Ang bisan ano nga butang nga ginasogo ko sa inyo, ina bantayan ninyo sa paghimo; dili ka magdugang sa iya kag dili ka magbuhin sa iya.

← Chapter 11 Jump to: Chapter 13 →