Deuteronomy 3

Ilonggo (Ang Biblia (1982))

← Chapter 2 Jump to: Chapter 4 →

1“Niyan nagpadayon kita kag nagtaklad sa dalan pa Basan; kag si Og nga hari sa Basan naggowa, sia kag ang bug-os niyang katawohan, batok sa aton sa inaway sa Edrei.

2Apang ang Ginoo nagsiling sa akon, ‘Dili ka magkahadluk sa iya; kay gintugyan ko sia kag ang bug-os niyang katawohan kag ang iya duta sa imo kamut; kag himoon mo sa iya subong sang ginhimo mo kay Sihon nga hari sang Amornon, nga nagpuyo sa Hesbon.’

3Gani gintugyan sang Ginoo nga aton Dios sa aton kamut si Og man, ang hari sang Basan, kag ang bug-os niyang katawohan; kag ginlaglag naton sia tubtub nga wala gid sing nabilin sa iya.

4Kag gin-agaw naton ang tanan niyang kabanwaanan sa sadtong tion—walay banwa nga wala naton maagaw sa ila—kan-uman ka banwa, ang bug-os nga ginsakpan sang Argob, ang ginharian ni Og sa Basan.

5Ini sila tanan kabanwaanan nga napamakuran sing mataas nga mga kuta, mga gawang, kag mga pintal, wala labut sang madamu gid nga kabanwaanan nga walay sing kuta.

6Kag ginlaglag naton sila sing bug-os, subong sang ginhimo naton kay Sihon nga hari sang Hesbon, nga nagalaglag sing bug-os sang tagsa ka banwa nga napuy-an, pati ang mga babayi, kag ang mga magamay.

7Apang ginkuha naton nga aton inatihan ang tanan nga kahayupan kag ang inagaw sa kabanwaanan.

8Gin-agaw naton ang duta sadtong tion gikan sa duha ka hari sang mga Amornon nga didto sa tabok sang Jordan, kutub sa nalupyakan sang Arnon tubtub sa Bukid nga Hermon

9(ang amo nga Hermon ginatawag sang mga Sidonhon Sirion, kag ang mga Amornon nagatawag sini Senir),

10ang tanan nga kabanwaanan sang kapatagan kag ang bug-os nga Galaad kag ang bug-os nga Basan, tubtub sa Salca kag Edrei, kabanwaanan sang ginharian ni Og sa Basan.

11(Kay si Og lamang nga hari sang Basan amo ang salin sang nabilin sang mga Refaim; yari karon, ang iya katre salsalon; wala bala ini sa Raba sa mga anak ni Amon? Ang iya kalabaon siam ka maniko, kag ang iya kasangkaron apat ka maniko, sono sa maniko sang tawo.)

12“Sang nagtag-iya kita sini nga duta sa sadto nga tion, kutub sa Aroer, nga yara sa ubay sang nalupyakan sang Arnon, kag ang katunga sang kabakoloran sang Galaad kag ang iya kabanwaanan, ginhatag ko sa mga Rubenhon kag sa mga Gadhanon;

13ang nabilin sang Galaad, kag ang bug-os nga Basan, ang ginharian ni Og, ginhatag ko sa katunga nga kabikahan ni Manases ang bug-os nga ginsakpan sang Argob. (Ang bug-os nga Basan ginatawag nga duta sang mga Refaim.

14Si Jair nga anak ni Manases nagkuha sang bug-os nga ginsakpan sang Argob, tubtub sa dulunan sang mga Gesurnon kag sang mga Maacatnon, kag gintawag sila, bisan ang Basan, sono sa iya kaugalingon nga ngalan, nga Havot-jair, tubtub sini nga adlaw.)

15Ginhatag ko ang Galaad kay Maquir,

16kag sa mga Rubenhon kag sa mga Gadhanon ginhatag ko kutub sa Galaad tubtub sa nalupyakan sang Arnon, ang tunga sang nalupyakan amo ang dulunan, tubtub sa suba nga Jaboc, nga amo ang dulunan sang mga anak ni Amon;

17ang Araba man, kag ang Jordan kag ang iya dulunan, kutub sa Cineret tubtub sa dagat sang Araba, ang Dagat nga Maasin, sa ubus sang mga lubluban sang Pisga pa Sidlangan.

18“Kag nagsogo ako sa inyo sa sadto nga tion, nga nagasiling, ‘Ang Ginoo nga inyo Dios naghatag sa inyo sini nga duta sa pagtag-iya sa iya; magatabok kamo nga nalupit sa hinganiban nga una sa inyo mga utud nga katawohan sang Israel, ang tanan nga lalaki nga isganan.

19Apang ang inyo mga asawa, ang inyo mga magamay, kag ang inyo kahayupan (nakahibalo ako nga may madamu kamo nga kahayupan) magapabilin sa inyo kabanwaanan nga nahatag ko sa inyo,

20tubtub nga ang Ginoo magpapahuway sang inyo mga utud, subong sa inyo, kag sila man magtag-iya sang duta nga ginahatag sa ila sang Ginoo nga inyo Dios sa tabok sang Jordan; niyan magabalik kamo ang tagsa ka tawo sa iya kaugalingon nga nahatag ko sa inyo. ’

21Kag nagsogo ako kay Josue sadto nga tion, ‘Ang imo mga mata nakakita sang tanan nga nahimo sang Ginoo nga inyo Dios sa sini nga duha ka hari; amo ini ang himoon sang Ginoo sa tanan nga ginharian nga ginaagihan mo.

22Dili kamo magkahadluk sa ila; kay ang Ginoo nga inyo Dios amo ang nagapakig-away tungud sa inyo.’

23“Kag sa sadto nga tion nagpakilooy ako sa Ginoo, nga nagasiling,

24‘O Ginoong Dios, ikaw nagsugud sa pagpakita sa imo alagad sang imo pagkadaku kag sang imo kamut nga makusug; kay ano bala nga dios nga yara sa langit ukon sa duta, nga makahimo sono sa imo mga buluhaton, kag sono sa imo gamhanan nga mga hinimoan?

25Ginaampo ko sa imo, pataboka ako kag patan-awa sang maayo nga duta nga yara sa tabok sang Jordan, sina nga matahum nga bukid, kag sang Libano.’

26Apang ang Ginoo nagsingkal sa akon tungud sa inyo, kag wala magpamati sa akon; kag nagsiling sa akon ang Ginoo, ‘Tuman na ini sa imo; dili ka na magpamolong sa akon sini nga butang.

27Tukad ka sa putokputokan sang Pisga, kag lantaw pa katundan kag pa aminhan kag pa bagatnan kag pa sidlangan, kag toloka sang imo mga mata; kay indi ka magtabok sa sini nga Jordan.

28Apang tulini si Josue, kag pabakura sia kag palig-ona sia; kay sia magatabok nga una sa sini nga katawohan, kag papanublion niya sila sang duta nga imo makita.’

29Gani nagpuyo kita sa nalupyakan sa atubang sang Bet-peor.

← Chapter 2 Jump to: Chapter 4 →