Genesis 14

Ilonggo (Ang Biblia (1982))

← Chapter 13 Jump to: Chapter 15 →

1Sa kaadlawan ni Amrafel nga hari sang Sinar, ni Arioc nga hari sang Elasar, ni Kedorlaomer nga hari sang Elam, kag ni Tidal nga hari sang Goim,

2ining mga hari nag-inaway batok kay Bera nga hari sang Sodoma, kay Birsa nga hari sang Gomorra, kay Sinab nga hari sang Adma, kay Semeber nga hari sang Zeboim, kag sa hari sang Bela (nga amo, ang Zoar).

3Kag ini sila nagtingub sa Nalupyakan sang Sidim (nga amo, ang Dagat nga Maasin).

4Sa napulog duha ka tuig gin-alagad nila si Kedorlaomer, apang sa ikapulog tatlo nga tuig nagribok sila.

5Kag sa tuig nga ikapulog apat nag-abut si Kedorlaomer kag ang mga hari nga upud sa iya kag gindaug ang mga Refaimnon sa Astarotcarnaim, ang mga Zuzimnon sa Ham, ang mga Emimnon sa Save-kiryataim,

6kag ang mga Horhanon sa ila bukid nga Seir tubtub sa El-paran nga yara sa luyo sang kamingawan;

7niyan nagbalik sila kag nag-abut sa En-mispat (nga amo, ang Cades), kag ginhalitan nila ang bug-os nga duta sang mga Amalecnon, kag sang mga Amornon man nga nagpuyo sa Hazazon-tamar.

8Niyan naggowa ang hari sang Sodoma, ang hari sang Gomorra, ang hari sang Adma, ang hari sang Zeboim, kag ang hari sang Bela (nga amo, ang Zoar), kag nagpaagisud sila sa inaway batok sa ila sa Nalupyakan sang Sidim

9batok kay Kedorlaomer nga hari sang Elam, kay Tidal nga hari sang Goim, kay Amrafel nga hari sang Sinar, kag kay Arioc nga hari sang Elasar, apat ka hari batok sa lima.

10Karon ang Nalupyakan sang Sidim nahil-ob sang mga bobon sang asfalto; kag sang nagpalagyo ang mga hari sang Sodoma kag sang Gomorra, naholog ang iban didto, kag ang nabilin nagpalagyo sa bukid.

11Gani gin-agaw sang kaaway ang tanan nga pagkabutang sang Sodoma kag Gomorra, kag ang tanan nila nga kalan-on, kag naglakat sila;

12gindala man nila si Lot, anak sang utud ni Abram, nga nagpuyo sa Sodoma, kag ang iya pagkabutang, kag nagtaliwan.

13Niyan nag-abut ang isa nga nakapalagyo, kag nagsugid kay Abram nga Hebreo, nga nagapuyo sa luyo sang mga terebinto ni Mamre nga Amornon, utud ni Escol kag utud ni Aner; ini sila mga kadampig ni Abram.

14Sang nabatian ni Abram nga nabihag ang iya utud, ginpangolohan niya ang iya nahanas nga mga tawo, nga natawo sa iya balay, tatlo ka gatus kag napulog walo, kag naglagas tubtub sa Dan.

15Kag ginbahinbahin niya ang iya mga hangaway batok sa ila sa kagab-ihon, sia kag ang iya mga alagad, kag ginsamad sila kag ginlagas sila tubtub sa Hoba, sa naaminhan sang Damasco.

16Niyan nabawi niya ang tanan nga pagkabutang, kag nabawi man si Lot nga iya utud upud ang iya pagkabutang, kag ang mga babayi kag ang mga tawo.

17Sang pagbalik niya gikan sa pagpatay kay Kedorlaomer kag sang mga hari upud sa iya, naggowa ang hari sang Sodoma sa pagsugata sa iya sa Nalupyakan sang Save (nga amo, ang Nalupyakan sang Hari).

18Kag si Melquisedec nga hari sang Salem nagdala sing tinapay kag alak; sacerdote sia sang Dios nga Labing Mataas.

19Kag ginpakamaayo niya sia kag nagsiling, “Pakamaayohon si Abram sang Dios nga Labing Mataas, tagbuhat sang langit kag duta;

20kag bulahan ang Dios nga Labing Mataas, nga nagtugyan sang imo mga kaaway sa imo kamut!” Kag ginhatagan sia ni Abram sang ikapulo sang tanan.

21Kag ang hari sang Sodoma nagsiling kay Abram, “Ihatag sa akon ang mga tawo, apang kuhaa nga sa imo ang pagkabutang.”

22Apang si Abram nagsiling sa hari sang Sodoma, “Ginbayaw ko ang akon kamut sa Ginoong Dios nga Labing Mataas, tagbuhat sang langit kag duta,

23nga indi ako magkuha sing isa ka nahut ukon isa ka higot sang sapin ukon bisan ano nga imo, basi nga magsiling ka, ‘Ako nagpamanggad kay Abram.’

24Indi ako magkuha sing bisan ano kondi ang nakaon sang mga pamatan-on nga lalaki, kag ang bahin sang mga lalaki nga nag-upud sa akon; si Aner, si Escol, kag si Mamre magkuha sang ila bahin.”

← Chapter 13 Jump to: Chapter 15 →