Genesis 23

Ilonggo (Ang Biblia (1982))

← Chapter 22 Jump to: Chapter 24 →

1Ang pagkabuhi ni Sara isa ka gatus kag duha ka pulo kag pito ka tuig; amo ini ang mga tuig sang kabuhi ni Sara.

2Kag napatay si Sara sa Kiryat-arba (nga amo, ang Hebron) sa duta sang Canaan; kag si Abraham nag-abut sa paglalaw kay Sara kag sa paghibi sa iya.

3Kag si Abraham nagtindug gikan sa atubangan sang iya patay, kag nagsiling sa mga anak ni Het,

4“Dumuloong kag manlulugayaw ako sa inyo; hatagi ninyo ako sing kaugalingon nga lulubngan upud sa inyo, agud nga malubung ko ang akon patay gikan sa akon itololok.”

5Ang mga anak ni Het nagsabat kay Abraham,

6“Pamatii kami, ginoo ko, ikaw principe nga gamhanan sa tunga namon. Sa pili sang amon mga lulubngan ilubung ang imo patay; wala sing isa sa amon nga magadumili sa imo sang iya lulubngan, ukon magapugong sa imo sa paglubong sang imo patay.”

7Kag si Abraham nagtindug kag nagyaub sia sa katawohan sang duta, mga anak ni Het.

8Kag nagsiling sia sa ila, “Kon kabubut-on ninyo nga ako maglubung sang akon patay, pamatii ako kag patigayona ninyo ako kay Efron nga anak ni Zohar,

9agud nga ihatag niya sa akon ang lungib sang Macpela, nga iya; ini sa higad sang iya latagon. Sa bug-os nga bili ihatag niya ini sa akon nga kaugalingon nga lulubngan sa tunga ninyo.”

10Karon si Efron nagalingkod sa tunga sang mga anak ni Het; kag nagsabat si Efron nga Hethanon kay Abraham sa idulungug sang mga anak ni Het, sa tanan nga nagsulud sa gawang sang iya banwa,

11“Indi, ginoo ko, pamatii ako; ginahatag ko sa imo ang latagon, kag ginahatag ko sa imo ang lungib nga yara sa iya; sa atubangan sang mga anak sang akon katawohan ginahatag ko sia sa imo; ilubung ang imo patay.”

12Niyan si Abraham nagyaub sa atubangan sang katawohan sang duta.

13Kag nagsiling sia kay Efron sa idulungug sang katawohan sang duta, “Apang kon buut mo, pamatii ako; ihatag ko ang bili sang latagon; batona ini sa akon, agud nga ilubung ko didto ang akon patay.”

14Si Efron nagsabat kay Abraham,

15“Ginoo ko, dungga ako; ang isa ka puna nga duta nga nagabili sing apat ka gatus ka siclo nga pilak, ano bala ina sa tunga nimo kag nakon? Ilubung ang imo patay.”

16Si Abraham nagpamati kay Efron; kag gintimbang ni Abraham kay Efron ang pilak nga namitlang niya sa idulungug sang mga anak ni Het, apat ka gatus ka siclo nga pilak, sono sa mga timbang nga ginagamit sang mga manugbaligya.

17Gani ang latagon ni Efron nga yara sa Macpela, sa tampad sang Mamre, ang latagon kag ang lungib nga yara sa iya kag ang tanan nga kakahoyan sa latagon, nga yara sa tanan nga dulunan sa palibut niya, ginpalig-on

18nga kaugalingon ni Abraham sa atubangan sang mga anak ni Het, sa atubangan sang tanan nga nagsulud sa gawang sang banwa.

19Sa tapus sini, ginlubung ni Abraham si Sara nga iya asawa sa lungib sang latagon sang Macpela sa tampad sang Mamre (nga amo, ang Hebron) sa duta sang Canaan.

20Kag ang latagon kag ang lungib nga yara sa iya ginpalig-on sang mga anak ni Het nga kaugalingon nga lulubngan ni Abraham.

← Chapter 22 Jump to: Chapter 24 →