Genesis 21

Ilonggo (Ang Biblia (1982))

← Chapter 20 Jump to: Chapter 22 →

1Ginduaw sang Ginoo si Sara subong sang nasiling niya, kag ginhimo sang Ginoo kay Sara subong sang ginsaad niya.

2Kag si Sara nagpanamkon, kag nag-anak kay Abraham sing lalaki sa iya katigulangon sa tion nga napamolong sa iya sang Dios.

3Ginhingalanan ni Abraham ang iya anak nga lalaki nga natawo nga sa iya, nga gin-anak sa iya ni Sara, Isaac.

4Kag gincircuncidar ni Abraham sa ikawalong adlaw ang iya anak nga si Isaac, subong sang nasogo sa iya sang Dios.

5Si Abraham isa ka gatus ka tuig, sang pagkatawo sa iya ni Isaac nga iya anak.

6Kag si Sara nagsiling, “Ginpakadlaw ako sang Dios; ang tagsa nga makabati magakadlaw sa akon.”

7Kag nagsiling sia, “Sin-o ayhan ang magsiling kay Abraham nga si Sara magpasoso sing mga anak? Apang ako nagpanganak sa iya sing lalaki sa iya katigulangon.”

8Kag nagtubo ang bata, kag ginlutas; kag si Abraham naghimo sing isa ka daku nga tabad sa adlaw nga ginlutas si Isaac.

9Apang nakita ni Sara ang anak nga lalaki ni Agar nga Egiptohanon, nga gin-anak niya kay Abraham, nga nagahampang upud kay Isaac nga iya anak.

10Gani nagsiling sia kay Abraham, “Isikway ining ulipon nga babayi kag ang iya anak nga lalaki; kay ang anak nga lalaki sining ulipon indi manginmanunubli upud sa akon anak nga si Isaac.”

11Kag ang butang tama kasubo kay Abraham bangud sang iya anak.

12Apang ang Dios nagsiling kay Abraham, “Dili magpakasubo bangud sang bata kag bangud sang imo ulipon nga babayi; ang tanan nga ginasiling sa imo ni Sara, himoa sono sa iya ginasogo; kay paagi sa kay Isaac tawgon ang imo mga kaliwatan.

13Kag himoon ko man nga isa ka pungsud ang anak sang ulipon nga babayi, bangud nga sia imo kaliwat.”

14Gani si Abraham nagbangon sing aga pa, kag nagkuha sing tinapay kag suludlan sang tubig, kag ginhatag ini kay Agar, nga nagapapas-an sini sa iya abaga, upud sang bata, kag ginpalakat sia. Kag nagtaliwan sia, kag nagdalangdalang sa kamingawan sang Beer-seba.

15Sang naubus ang tubig sa suludlan, ginhal-id niya ang bata sa idalum sang isa sang mga kahoykahoy.

16Niyan naglakat sia, kag naglingkod sia sa atubang niya sa malayo, subong sang isa ka pagpana; kay nagsiling sia, “Indi ako pagpatoloka sang kamatayon sang bata.” Kag sang naglingkod sia sa atubang niya, ang bata nagsinggit kag naghibi.

17Kag nabatian sang Dios ang tingug sang bata; kag ang manugtunda sang Dios nagtawag kay Agar gikan sa langit, kag nagsiling sa iya, “Ano bala ang nahanabu sa imo, Agar? Dili ka mahadluk; kay nabatian sang Dios ang tingug sang bata sa diin sia.

18Tindug, hakwata ang bata, kag uyati sia sa imo kamut; kay himoon ko sia nga dakung pungsud.”

19Niyan ginpasanag sang Dios ang iya mga mata, kag nakita niya ang isa ka bobon sang tubig; kag nagkadto sia, kag ginpuno sing tubig ang suludlan, kag ginpainum ang bata.

20Kag ang Dios nag-upud sa bata, kag nagtubo sia; nagpuyo sia sa kamingawan, kag nanginmanugpana sia.

21Nagpuyo sia sa kamingawan sang Paran; kag ang iya iloy nagpaasawa sa iya sang taga-Egipto.

22Sa sadtong tion, si Abimelec kag si Picol nga pangolo sang iya hangaway nagsiling kay Abraham, “Ang Dios upud sa imo sa tanan nga ginahimo mo;

23busa karon sumpa ka sa akon diri sa Dios nga indi mo ako paglimbongan ukon ang akon mga anak nga lalaki ukon ang akon mga apo nga lalaki, kondi sono sa kaayo nga nahimo ko sa imo, himoon mo sa akon kag sa duta sa diin nagpanlugayaw ka.”

24Kag si Abraham nagsiling, “Magasumpa ako.”

25Sang ginsabdong ni Abraham si Abimelec bangud sang bobon sa tubig nga ginkuha sing lugus sang mga alagad ni Abimelec,

26si Abimelec nagsiling, “Wala ako makahibalo kon sin-o ang naghimo sining butang; wala ikaw magsugid sa akon, kag wala ako makabati sini tubtub sining adlaw.”

27Gani nagkuha si Abraham sing mga carnero kag mga baka kag ginhatag sila kay Abimelec, kag nakigkatipan sila nga duha.

28Si Abraham nagpain sing pito ka babayi nga tinday sang carnero.

29Kag si Abimelec nagsiling kay Abraham, “Ano bala ang kahologan sining pito ka babayi nga tinday sang carnero nga ginpain mo?”

30Nagsiling sia, “Ining pito ka tinday nga carnero nga babayi batonon mo sa akon kamut, agud nga manginsaksi ka sa akon nga ako nagkutkut sining bobon.”

31Busa ginhingalanan niya yadtong duug Beer-seba; bangud nga didto nagsumpaanay sila nga duha.

32Gani nagpakigkatipan sila sa Beer-seba. Niyan nagtindug si Abimelec kag si Picol nga pangolo sang iya hangaway kag nagpauli sa duta sang mga Filistinhon.

33Si Abraham nagtanum sing kahoy nga tamarisk sa Beer-seba, kag nagpanawag didto sa ngalan sang Ginoo, ang Dios nga Dayon.

34Kag si Abraham nagpanlugayaw sa duta sang mga Filistinhon sa madamung adlaw.

← Chapter 20 Jump to: Chapter 22 →

Recommended Reading

Commentary Genesis Commentaries → Devotional Genesis Devotional Guide → Get This Bible 1982 Study Bible →