Genesis 32

Ilonggo (Ang Biblia (1982))

← Chapter 31 Jump to: Chapter 33 →

1Si Jacob nagpadayon sang iya dalanon kag ginsugata sia sang mga manugtunda sang Dios;

2kag sang nakita ni Jacob sila nagsiling sia, “Kasoldadosan ini sang Dios!” Gani ginhingalanan niya yadtong duug Mahanaim.

3Kag si Jacob nagpadala sing mga manugbalita sa una niya kay Esau nga iya utud sa duta sang Seir, ang duta sang Edom,

4nga nagasogo sa ila, “Amo ini ang isiling ninyo sa akon ginoo nga si Esau: Amo ini ang ginasiling sang imo alagad nga si Jacob, ‘Upud ni Laban nagpanlugayaw ako, kag nagdugay didto tubtub karon;

5kag may kabakahan ako, mga asno, mga panong, mga alagad nga lalaki, kag mga alagad nga babayi; kag nagpadala ako sa pagsugid sa akon ginoo, agud nga makapahamuut ako sa imo itololok.’”

6Kag ang mga manugbalita nagbalik kay Jacob nga nagasiling, “Nakadangat kami sa imo utud nga si Esau, kag nagapakari sia sa pagsugata sa imo, kag apat ka gatus ka tawo kaupud niya.”

7Niyan si Jacob hinadlukan sing daku kag nalisang; kag ginbahinbahin niya ang mga tawo nga nagaupud sa iya, kag ang mga panong kag ang kabakahan kag ang mga camelyo, sa duha ka hut-ong,

8nga nagapainoino, “Kon mag-abut si Esau sa isa ka hut-ong kag laglagon ini, niyan ang mabilin nga hut-ong makapalagyo.”

9Kag nagsiling si Jacob, “O Dios sang akon amay nga si Abraham kag Dios sang akon amay nga si Isaac, O Ginoo nga nagsiling sa akon, ‘Balik ka sa imo duta kag sa imo kahimataan, kag ako magahimo sa imo sing maayo,’

10indi ako takus sang kubus gid sang tanan nga malig-on nga paghigugma kag sang tanan nga pagkatutum nga imo ginpakita sa imo alagad, kay upud sa akon sungkud lamang nagtabok ako sa sining Jordan; kag karon nagduha na ako ka hut-ong.

11Luwasa ako, ginaampo ko sa imo, sa kamut sang akon utud, sa kamut ni Esau, kay nahadluk ako sa iya, basi mag-abut sia kag laglagon kami tanan, ang mga iloy kaupud sang kabataan.

12Apang ikaw nagsiling, ‘Ako magahimo sa imo sing maayo, kag magahimo sang imo mga kaliwatan subong sang balas sang dagat, nga indi sarang maisip bangud sang kadamuon.’”

13Gani nagpabilin sia didto sadtong gab-i, kag nagkuha sang mga yara sa iya sing dolot nga sa kay Esau nga iya utud,

14duha ka gatus ka kanding nga babayi kag duha ka pulo ka kanding nga lalaki, duha ka gatus ka oveja kag duha ka pulo ka carnero,

15katloan ka gatasan nga camelyo pati ang ila mga tinday, kap-atan ka baka nga babayi kag napulo ka baka nga lalaki, duha ka pulo ka asno nga babayi kag napulo ka asno nga lalaki.

16Gintugyan niya sila sa kamut sang iya mga alagad, ang tagsa ka manada sing pahain, kag nagsiling sa iya mga alagad, “Tabok kamo sing una sa akon, kag butangan sing antad sa tunga sang manada kag manada.”

17Nagsogo sia sa nahauna, “Kon masugata ka ni Esau nga akon utud, kag pamangkoton ka, ‘Kay sin-o ka bala? Diin ka makadto? Kag kay sin-o bala ini sila sa una nimo?’

18niyan magsiling ka, ‘Iya sang imo alagad nga si Jacob; dolot ini nga ginpadala sa akon ginoo nga si Esau; kag labut pa sia man yara sa olihi namon.’”

19Subong man nagsogo sia sa ikaduha kag sa ikatlo kag sa tanan nga nagsonod sa mga manada, “Sa sining bagay magasiling kamo kay Esau kon makita ninyo sia,

20kag isiling ninyo, ‘Labut pa ang imo alagad nga si Jacob yara sa olihi namon.’” Kay nagpainoino sia, “Palugpayan ko sia sang dolot nga nagauna sa akon, kag ugaling makigkita ako sa iya; ayhan batonon niya ako.”

21Gani ang dolot nag-una sa iya; kag sia iya nagpabilin sadtong gab-i sa dologan.

22Nagtindug sia sadtong gab-i kag nagkuha sang iya duha ka asawa, kag sang iya duha ka alagad nga babayi, kag sang iya napulo kag isa ka bata, kag nagtabok sa ubogan sang Jaboc.

23Ginkuha niya sila kag ginpatabok sila sa sapa, kag subong man ang tanan nga iya.

24Kag nabilin si Jacob nga isa lamang; kag nagpakigdumug sa iya ang isa ka lalaki tubtub sa pamanagbanag sang adlaw.

25Sang nakita niya nga indi sia makalandas kay Jacob, gintandug niya ang lutalutahan sang iya paa; kag nagliw-as ang lutalutahan sang paa ni Jacob sang sia nagdumug sa iya.

26Niyan nagsiling sia, “Buhii ako, kay nagapamanagbanag na ang adlaw.” Apang si Jacob nagsiling, “Indi ko ikaw pagbuhian, kon indi mo ako pagpakamaayohon.”

27Kag sia nagsiling sa iya, “Sin-o bala ang imo ngalan?” Kag nagsiling sia, “Si Jacob.”

28Niyan nagsiling sia, “Indi ka na pagtawgon Jacob, kondi Israel, kay nagpakigdumug ka sa Dios kag sa mga tawo, kag naglandas.”

29Niyan namangkot si Jacob sa iya, “Ginaampo ko, sugiri ako sang imo ngalan.” Apang nagsiling sia, “Ngaa bala nagapamangkot ka sang akon ngalan?” Kag ginpakamaayo sia niya didto.

30Gani ginhingalanan ni Jacob ang duug Peniel, nga nagasiling, “Kay nakita ko ang Dios sa nawung kag nawung, kag naluwas pa ang akon kabuhi.”

31Ginsubangan sia sang adlaw sang nagtabok sia sa Penuel, nga nagasampayud sia.

32Busa ang mga Israelnon wala nagakaon sang kusug sang balikawang nga yara sa lutalutahan sang paa tubtub sining adlaw, bangud nga gintandug niya ang lutalutahan sang paa ni Jacob sa kusug sang balikawang.

← Chapter 31 Jump to: Chapter 33 →