Genesis 45

Ilonggo (Ang Biblia (1982))

← Chapter 44 Jump to: Chapter 46 →

1Niyan si Jose indi makapugung sang iya kaugalingon sa atubangan sang tanan nga yara sa luyo niya; kag nagsinggit sia, “Pagowaa ang tagsa ka tawo gikan sa akon.” Gani wala sing tawo nga upud sa iya sang pagpakilala ni Jose sang iya kaugalingon sa iya mga utud.

2Kag naghaya sia, sa bagay nga nakabati ang mga Egiptohanon, kag nakabati ang panimalay ni Faraon.

3Kag si Jose nagsiling sa iya mga utud, “Ako si Jose; buhi pa bala ang akon amay?” Apang ang iya mga utud indi makasabat sa iya, kay naorongan sila sa atubangan niya.

4Gani nagsiling si Jose sa iya mga utud, “Palapit kamo sa akon, ginaampo ko sa inyo.” Kag sila nagpalapit. Kag nagsiling sia, “Ako si Jose nga inyo utud, nga ginbaligya ninyo sa Egipto.

5Kag karon dili kamo magkalisud, ukon magkaakig sa inyo kaugalingon, bangud nga ginbaligya ninyo ako diri; kay ang Dios nagpadala sa akon sing una sa inyo sa pagtipig sing kabuhi.

6Kay sining duha ka tuig ang tiggulutum yari sa duta; kag lima pa ka tuig nga wala sing pag-arado ukon ani.

7Kag ang Dios nagpadala sa akon sing una sa inyo sa pagtipig nga sa inyo sing mabilin sa duta, kag sa pagbuhi nga sa inyo sang madamu nga naluwas.

8Gani indi kamo ang nagpadala sa akon diri, kondi ang Dios; kag ginhimo niya ako nga amay kay Faraon, kag ginoo sa bug-os niya nga panimalay kag manuggahum sa bug-os nga duta sang Egipto.

9Dalidali kamo kag taklad sa akon amay kag isiling sa iya, ‘Amo ini ang ginasiling sang imo anak nga si Jose. Ang Dios naghimo sa akon nga ginoo sa bug-os nga Egipto; kari sa akon, dili ka magpalantang;

10magapuyo ka sa duta sang Gosen, kag manginmalapit ka sa akon, ikaw kag ang imo kabataan kag ang kabataan sang imo kabataan, kag ang imo mga panong, ang imo kabakahan, kag ang tanan nga imo;

11kag didto saguron ko ikaw, kay may lima pa ka tuig nga tiggulutum; basi nga mag-imol ka kag ang imo panimalay, kag ang tanan nga imo.’

12Kag karon ang imo mga mata nagatan-aw, kag ang mga mata sang akon utud nga si Benjamin, nga akon ini baba ang nagapamolong sa inyo.

13Sugiran ninyo ang akon amay sang bug-os ko nga himaya sa Egipto, kag sang tanan nga inyo nakita. Magdalidali kamo kag dalhon ninyo diri ang akon amay.”

14Niyan naghakus sia sa liog ni Benjamin nga iya utud kag naghibi; kag si Benjamin naghibi sa iya liog.

15Kag naghaluk sia sa tanan niya nga utud kag naghibi sa ila; kag ugaling nagpakighambal sa iya ang iya mga utud.

16Sang nabatian ang balita sa balay ni Faraon, “Nag-abut ang mga utud ni Jose,” nagpahamuut ini kay Faraon kag sa iya mga alagad.

17Kag si Faraon nagsiling kay Jose, “Isiling sa imo mga utud, ‘Himoa ninyo ini: lulani ninyo ang inyo kasapatan kag pauli kamo sa duta sang Canaan;

18kag kuhaa ang inyo amay kag ang inyo mga panimalay, kag kari kamo sa akon, kag ako magahatag sa inyo sang maayo gid sang duta sang Egipto, kag magakaon kamo sang tambok sang duta.’

19Sogoa man sila, ‘Himoa ninyo ini: kuha kamo sa duta sang Egipto sing mga karo nga sa inyo mga magamay kag sa inyo mga asawa, kag dalha ang inyo amay, kag magkari.

20Dili kamo magsapak man sang inyo mga galamiton, kay ang maayo gid sang bug-os nga duta sang Egipto inyo.’”

21Ginhimo ini sang mga anak ni Israel; kag ginhatagan sila ni Jose sing mga karo, sono sa sogo ni Faraon, kag ginhatagan sila sing balon sa dalanon.

22Sa tagsa kag sa ila tanan ginhatagan sing mga ilisan nga panapton; apang si Benjamin ginhatagan niya sing tatlo ka gatus ka siclo nga pilak kag lima ka ilisan nga panapton.

23Sa iya amay nagpadala sia sono sining masonod: napulo ka asno nga nalulanan sang maayong mga butang sang Egipto, kag napulo ka babayi nga asno nga nalulanan sing uyas, kalan-on, kag balon nga sa iya amay sa dalanon.

24Niyan ginpapauli niya ang iya mga utud, kag sang nagtaliwan sila, nagsiling sia sa ila, “Dili kamo mag-inaway sa dalanon.”

25Gani nagtaklad sila gikan sa Egipto, kag nag-abut sa duta sang Canaan kay Jacob nga ila amay.

26Kag ginsugiran nila sia, “Buhi pa si Jose, kag sia manuggahum sa bug-os nga duta sang Egipto.” Kag ang iya tagiposoon napunaw, kay wala sia magpati sa ila.

27Apang sang nagsugid sila sa iya sang tanan nga polong ni Jose, nga nasiling niya sa ila, kag sang nakita niya ang mga karo nga ginpadala ni Jose sa pagdala sa iya, ang espiritu ni Jacob nga ila amay naumpawan;

28kag si Israel nagsiling, “Tuman na; si Jose nga akon anak buhi pa; magakadto ako kag makigkita sa iya sa wala pa ako mapatay.”

← Chapter 44 Jump to: Chapter 46 →