Genesis 47

Ilonggo (Ang Biblia (1982))

← Chapter 46 Jump to: Chapter 48 →

1Gani si Jose nagsulud kag nagsugid kay Faraon, “Ang akon amay kag ang akon mga utud, kag ang ila mga panong kag kabakahan kag ang tanan nga ila, nag-abut gikan sa duta sang Canaan; yara na sila sa duta sang Gosen.”

2Kag nagkuha sia sing lima ka lalaki sa iya mga utud kag ginpakilala sila kay Faraon.

3Si Faraon nagsiling sa iya mga utud, “Ano bala ang inyo pangita?” Kag sila nagsiling kay Faraon, “Mga manugpahalab ang imo mga alagad, subong sang amon mga ginikanan.”

4Nagsiling sila kay Faraon, “Sa pagpanlugayaw sa duta nagkari kami; kay wala sing halalban ang mga carnero sang imo mga alagad, kay ang tiggulutum matama sa duta sang Canaan; kag karon, ginaampo namon sa imo, papuy-a ang imo mga alagad sa duta sang Gosen.”

5Niyan si Faraon nagsiling kay Jose, “Ang imo amay kag ang imo mga utud nag-abut sa imo.

6Ang duta sang Egipto yara sa imo atubangan; sa labi gid kaayo sang duta papuy-a ang imo amay kag ang imo mga utud; papuy-a sila sa duta sang Gosen; kag kon nahibaloan mo nga sa ila may mga tawo nga sampaton, himoa sila nga manugtatap sa akon kahayupan.”

7Niyan gindala ni Jose sa sulud ang iya amay nga si Jacob, kag ginpaatubang sia kay Faraon, kag ginpakamaayo ni Jacob si Faraon.

8Kag si Faraon nagsiling kay Jacob, “Kapid-an bala ang kaadlawan sang mga tuig sang imo kabuhi?”

9Kag si Jacob nagsiling kay Faraon, “Ang kaadlawan sang mga tuig sang akon pagpanlugayaw isa ka gatus kag katloan ka tuig; diotay kag malaut ang kaadlawan sang mga tuig sang akon kabuhi, kag wala sila makatupong sa kaadlawan sang mga tuig sang kabuhi sang akon mga ginikanan sa kaadlawan sang ila pagpanlugayaw.”

10Kag ginpakamaayo ni Jacob si Faraon, kag naghalin sa atubangan ni Faraon.

11Niyan ginpapuyo ni Jose ang iya amay kag ang iya mga utud, kag ginhatagan sila sing kaugalingon nga duta sa Egipto, sa labi gid kaayo sang duta, sa duta sang Rameses, sono sa nasogo ni Faraon.

12Kag ginsagud ni Jose sing kalan-on ang iya amay, ang iya mga utud, kag ang bug-os nga panimalay sang iya amay, sono sa kadamuon sang ila mga salaguron.

13Karon wala sing kalan-on sa bug-os nga duta; kay ang tiggulutum matama gid, sa bagay nga ginbungtas sa tiggulutum ang duta sang Egipto kag ang duta sang Canaan.

14Kag gintipon ni Jose ang tanan nga cuarta nga nakita sa duta sang Egipto kag sa duta sang Canaan, tungud sang uyas nga ila gindalawat; kag ginsulud ni Jose ang cuarta sa balay ni Faraon.

15Kag sang naubus na ang cuarta sa duta sang Egipto kag sa duta sang Canaan, nagkadto ang tanan nga Egiptohanon kay Jose, kag nagsiling, “Hatagi kami sing kalan-on; kay ngaa bala mapatay kami sa imo atubangan? Kay naurut ang amon cuarta.”

16Kag si Jose nagsabat, “Ihatag ang inyo kahayupan, kag hatagan ko kamo tungud sang inyo kahayupan, kon naurut na ang inyo cuarta.”

17Gani gindala nila ang ila kahayupan kay Jose; kag si Jose naghatag sa ila sing kalan-on nga baylo sang ila mga kabayo, mga panong, kabakahan, kag mga asno: kag ginsagud sila niya sa baylo sang tanan nila nga kahayupan sadtong tuig.

18Kag sang natapus yadtong tuig, nagkadto sila sa iya sa ikaduhang tuig, kag nagsiling sa iya, “Indi kami maglikum sa akon ginoo nga ang amon cuarta naubus na hinguyang; kag ang kabakahan sang kahayupan iya sang akon ginoo; wala na gid sing nabilin sa itololok sang akon ginoo kondi ang amon mga lawas kag ang amon mga duta.

19Ngaa bala nga mawala kami sa atubangan sang imo mga mata, tingub kami kag ang amon duta? Bakla kami kag ang amon duta tungud sa kalan-on, kag mangin-alagad kami kag ang amon duta ni Faraon; kag hatagi kami sing binhi, agud nga mabuhi kami, kag indi mapatay, kag ang duta indi magmingaw.”

20Gani ginbakal ni Jose ang bug-os nga duta sang Egipto nga kay Faraon; kay ang mga Egiptohanon nagbaligya ang tagsa ka tawo sang iya uma, bangud nga ang tiggulutum matama sa ila. Ang duta nangin-iya ni Faraon;

21kag nahanungud sa katawohan, gin-ulipon niya sila kutub sa isa ka dulunan sang Egipto tubtub sa isa.

22Ang duta lamang sang mga sacerdote wala niya pagbakla; kay ang mga sacerdote may pahat gikan kay Faraon, kag nagkaon sang ila pahat nga ginhatag sa ila ni Faraon; busa wala nila pag-ibaligya ang duta nila.

23Niyan si Jose nagsiling sa katawohan, “Yari karon, nabakal ko sining adlaw kamo kag ang inyo duta nga kay Faraon. Karon yari ang binhi nga sa inyo, kag sab-ugan ninyo ang duta.

24Kag sa mga pagdamisag ihatag ninyo ang ikalima kay Faraon, kag ang apat ka bahin mangin-inyo, nga sa binhi sang uma kag sa inyo kalan-on kag sa ila sang inyo mga panimalay, kag sa kalan-on sang inyo magamay.”

25Kag nagsiling sila, “Naluwas mo ang amon mga kabuhi; magmahamut-an kami sa akon ginoo, mangin-alagad kami ni Faraon.”

26Gani ginhimo ni Jose ining palatukuran nahanungud sa duta sang Egipto, tubtub sini nga adlaw, nga ang ikalima iya ni Faraon; ang duta gid lamang sang mga sacerdote indi mangin-iya ni Faraon.

27Sa amo nagpuyo si Israel sa duta sang Egipto, sa duta sang Gosen; kag nakaangkon sila didto sing mga pagkabutang, kag nagmabungahon kag nagbuad sing lakas.

28Kag nagkabuhi si Jacob sa duta sang Egipto sing napulog pito ka tuig; gani ang kaadlawan ni Jacob, ang mga tuig sang iya kabuhi, isa ka gatus kag kap-atan kag pito ka tuig.

29Kag sang nagpalapit ang tion nga si Israel dapat mapatay, gintawag niya si Jose nga iya anak kag nagsiling sa iya, “Kon nakapahamuut ako karon sa imo itololok, ibutang ang imo kamut sa idalum sang akon paa, kag magsaad sa pag-unong kag magmaminatud-on sa akon. Dili ako pag-ilubung sa Egipto,

30apang patologa ako upud sa akon mga ginikanan; dalhon mo ako pagowa sa Egipto kag ilubung ako sa lulubngan nila.” Nagsabat sia, “Himoon ko sono sa imo nasiling.”

31Kag sia nagsiling, “Sumpa ka sa akon”; kag nagsumpa sia sa iya. Niyan si Israel nagduko sa olohan sang iya higdaan.

← Chapter 46 Jump to: Chapter 48 →