Genesis 31 — Ilonggo (Ang Biblia (1982))

1Karon nabatian ni Jacob ang mga anak nga lalaki ni Laban nga nagasiling, “Ginkuha ni Jacob ang tanan nga iya sang aton amay; kag sang iya sang aton amay nag-agum sia sini tanan nga manggad.”

5kag nagsiling sa ila, “Nakita ko ang nawung sang inyo amay, nga indi na nayon sa akon subong sang sa una. Apang ang Dios sang akon amay nag-upud sa akon.

6Kamo nakahibalo nga sa akon bug-os nga ikasarang nag-alagad ako sa inyo amay;

7apang ang inyo amay nagdaya sa akon kag nagbaylo sang akon sohol sing makapulo, apang ang Dios wala magtugut sa iya sa paghalit sa akon.

8Kon sia nagsiling, ‘Ang mga pintokpintokon mangin-imo sohol,’ niyan ang bug-os nga panong nagbata sing pintokpintokon; kag kon nagsiling sia, ‘Ang mga guraygurayon mangin-imo sohol,’ niyan ang bug-os nga panong nagbata sing guraygurayon.

9Sa amo ginkuha sang Dios ang kahayupan sang inyo amay, kag ginhatag sila sa akon.

10Sang tion nga ang panong nagapalainit ginbayaw ko ang akon mata, kag nakita sa damgo nga ang mga lalaki nga kanding nga nagapalainit sa panong guraygurayon, pintokpintokon, kag kambangkambang.

11Niyan nagsiling sa akon ang manugtunda sang Dios sa damgo, ‘Jacob,’ kag nagsiling ako, ‘Yari ako!’

12Kag nagsiling sia, ‘Bayawa ang imo mga mata kag tan-awa, ang tanan nga kanding nga lalaki nga nagapalainit sa panong guraygurayon, pintokpintokon, kag kambangkambang; kay nakita ko ang tanan nga ginahimo sa imo ni Laban.

13Ako ang Dios sang Bet-el, diin ginhaplas mo ang isa ka haligi kag naghimo ka sing saad sa akon. Tindug ka karon, gowa ka sa sining duta, kag balik sa duta nga imo natawohan.’”

14Niyan nagsabat si Raquel kag si Lea sa iya, “May bahin pa bala ukon panublion kami sa panimalay sang amon amay?

15Wala bala niya kami pag-isipa subong nga mga dumuloong? Kay ginbaligya niya kami, kag ginlamon pa niya ang amon bili.

16Ang tanan nga manggad nga ginkuha sang Dios sa amon amay amon ina kag ila sang amon mga anak; busa niyan, ang tanan nga ginsiling sang Dios sa imo, himoa.”

17Gani nagtindug si Jacob, kag ginpasakay ang iya mga anak nga lalaki kag ang iya mga asawa sa mga camelyo;

18kag gindala niya ang bug-os niyang kahayupan, ang bug-os niyang pagkabutang nga iya natipon, ang kahayupan nga iya nakuha nga iya natipon sa Padana-ram, sa pagbalik kay Isaac nga iya amay sa duta sang Canaan.

19Si Laban nagkadto sa pag-alot sang iya mga carnero, kag ginkawat ni Raquel ang mga diosdios sang iya amay.

20Kag naglakat sing kawat si Jacob gikan kay Laban nga Sirianhon, nga wala niya sia pagsugiri nga magapalagyo sia.

21Nagpalagyo sia pati ang tanan nga iya, kag nagtindug, kag nagtabok sa Eufrates, kag gin-atubang niya ang Kabakoloran sang Galaad.

22Sang ginsugid ini kay Laban sa ikatlong adlaw nga si Jacob nagpalagyo,

23gindala niya ang iya kahimataan nga lalaki upud sa iya kag naglagas sa iya sing pito ka adlaw kag nalambut niya sia sa kabakoloran sang Galaad.

24Apang nag-abut ang Dios kay Laban nga Sirianhon sa damgo sa kagab-ihon, kag nagsiling sa iya, “Andam nga dili ka magsiling kay Jacob sing bisan maayo ukon malain.”

25Kag nalambut ni Laban si Jacob. Karon si Jacob nagpahamtang sang iya layanglayang sa kabakoloran kag si Laban upud ang iya kahimataan nga lalaki nagpahamtang sang iya layanglayang sa kabakoloran sang Galaad.

26Kag nagsiling si Laban kay Jacob, “Ano bala ang ginhimo mo, nga naglakat ka sing kawat, kag gindala ang akon mga anak nga babayi subong nga mga bihag sa espada?

27Ngaa bala nagpalagyo ka sa tago, kag ginkawatan ako, kag wala ako pagpahibaloa, agud mapalakat ko ikaw nga may kasadya kag mga amba, may mga tambor kag mga arpa?

28Kag ngaa wala mo ako pagpahaluka sa akon mga anak nga lalaki kag sa akon mga anak nga babayi? Karon naghimo ka sing binuang.

29Yari sa gahum sang akon kamut ang paghalit sa inyo; apang ang Dios sang imo amay nagpamolong sa akon kagab-i, nga nagasiling, ‘Andam nga dili ikaw magpamolong kay Jacob sing bisan maayo ukon malain.’

30Kag karon ikaw nagtaliwan bangud nga ginahidlaw ka sang panimalay sang imo amay, apang ngaa bala ginkawat mo ang akon mga dios?”

31Si Jacob nagsabat kay Laban, “Bangud nga ginhadlukan ako, kay naghunahuna ako basi kon bawion mo sa akon sa lugus ang imo mga anak nga babayi.

32Sa bisan kay sin-o makita mo ang imo mga dios indi sia magkabuhi. Sa atubangan sang amon kahimataan itudlo ang yari sa akon nga imo, kag kuhaa ini.” Karon si Jacob wala makahibalo nga ginkawat sila ni Raquel.

33Gani nagsulud si Laban sa layanglayang ni Jacob, kag sa layanglayang ni Lea, kag sa layanglayang sang duha ka alagad nga babayi, apang wala niya makita sila. Kag naggowa sia sa layanglayang ni Lea, kag nagsulud sa layanglayang ni Raquel.

34Karon ginkuha ni Raquel ang mga diosdios kag ginbutang sila sa siyasiya sang camelyo, kag ginlingkoran sila. Ginhikap ni Laban ang bug-os nga layanglayang, apang wala makita sila.

35Kag nagsiling sia sa iya amay, “Dili maakig ang akon ginoo nga indi ako makatindug sa atubangan nimo, kay yari sa akon ang kinaugali sang mga babayi.” Gani sia nag-usisa, apang wala makita ang mga diosdios.

36Niyan si Jacob nagsingkal, kag nagbangig kay Laban; si Jacob nagsiling kay Laban, “Ano bala ang akon linapas? Ano bala ang akon sala, nga ginalagas mo ako sing tama kasingkal?

37Bisan ginpanghikap mo ang tanan kong galamiton, ano bala ang nakita mo sang tanan nga galamiton sang imo balay? Ibutang ini diri sa atubangan sang akon kahimataan kag sang imo kahimataan, agud maghukom sila sa tunga naton nga duha.

38Sining duha ka pulo ka tuig nagpuyo ako sa imo; ang imo mga oveja kag ang imo mga kanding nga babayi wala mahar-asi, kag ang mga carnero nga lalaki sang imo panong wala ako makakaon.

39Ang ginkusnit sang mga sapat wala ko pagdalha sa imo; ako nagbayad sang nadula; ang kinawat sa adlaw ukon sa gab-i, sa akon kamut ginkinahanglan mo ini.

40Subong ako sini; sa adlaw ginhagas ako sang init, kag sa gab-i sang tugnaw, kag ang akon katologon nalagyo sa akon mga mata.

41Sa sining duha ka pulo ka tuig nakapuyo ako sa imo balay; nagpangagad ako sa imo sing napulog apat ka tuig tungud sa imo duha ka anak nga babayi, kag anum ka tuig tungud sa imo panong, kag ginbaylohan mo sing makapulo ang akon mga sohol.

42Kon ang Dios sang akon amay, ang Dios ni Abraham kag ang Kahadluk ni Isaac, wala mag-upud sa akon, sa pagkamatuud karon napalakat mo ako nga wala sing dala. Nakita sang Dios ang akon kapipit-an kag ang pangabudlay sang akon mga kamut, kag ginsabdong ka kagab-i.”

43Niyan nagsabat si Laban kag nagsiling kay Jacob, “Ang mga anak nga babayi akon mga anak, ang kabataan akon kabataan, ang mga panong akon mga panong, kag ang tanan nga ginatan-aw mo akon. Apang ano bala ang sarang ko mahimo sa sining adlaw sa akon mga anak nga babayi, ukon sa ila kabataan nga gin-anak nila?

44Kari karon, maghimo kita sing katipan, ikaw kag ako; kag manginsaksi ini sa tunga nimo kag nakon.”

45Gani si Jacob nagkuha sing isa ka bato, kag ginpatindug niya ini nga haliging handumanan.

46Kag nagsiling si Jacob sa iya kahimataan nga lalaki, “Tipon kamo sing mga bato,” kag nagkuha sila sing mga bato, kag naghimo sing isa ka tumpok; kag nagkaon sila didto sa luyo sang tinumpok.

47Ginhingalanan ini ni Laban Jegar-sahaduta: apang ginhingalanan ini ni Jacob Galeed.

48Si Laban nagsiling, “Ining tinumpok saksi karon nga adlaw sa tunga nimo kag nakon.” Busa ginhingalanan ini Galeed,

49kag ang haligi Mizpa, kay nagsiling sia, “Magbantay ang Ginoo sa tunga nimo kag nakon, kon kita wala sa isa kag isa.

50Kon paantuson mo ang akon mga anak nga babayi, ukon kon magpangasawa ka luwas sa akon mga anak, bisan wala sing tawo nga nagaupud sa aton, dumduma, ang Dios saksi sa tunga nimo kag nakon.”

51Niyan si Laban nagsiling kay Jacob, “Tan-awa ining tinumpok kag ang haligi, nga ginpatindug ko sa tunga nimo kag nakon.

52Manginsaksi ining tinumpok, kag manginsaksi ining haligi, nga indi ako maglakbay sa sining tinumpok pakadto sa imo, kag nga indi ikaw maglakbay sa sining tinumpok kag sa sining haligi pakadto sa akon, sa malaut.

53Ang Dios ni Abraham kag ang Dios ni Nahor, ang Dios sang ila ginikanan, maghukom sa tunga naton.” Gani si Jacob nagsumpa sa Kahadluk ni Isaac nga iya amay,

54kag si Jacob nagdolot sing halad sa bukid kag gintawag niya ang iya kahimataan nga lalaki sa pagkaon sing kalan-on; kag nagkaon sila kag nagpabilin sa bug-os nga gab-i sa bukid.

55Sa aga pa si Laban nagtindug, kag naghaluk sa iya mga apo kag sa iya mga anak nga babayi kag ginpakamaayo sila; niyan si Laban nagtaliwan kag nagpauli.