Genesis 25

Ilonggo (Ang Biblia (1982))

← Chapter 24 Jump to: Chapter 26 →

1Si Abraham nagpangasawa liwat, kag ang iya ngalan si Cetura.

2Nag-anak sia sa iya kay Zimram, kay Jocsan, kay Medan, kay Madian, kay Isbac, kag kay Sua.

3Si Jocsan amay ni Seba kag ni Dedan. Ang lalaki nga mga anak ni Dedan amo si Asurim, si Letusim, kag si Leumim.

4Ang mga anak ni Madian amo si Efa, si Efer, si Hanoc, si Abida, kag si Eldaa. Ini tanan anak ni Cetura.

5Ginhatag ni Abraham kay Isaac ang tanan nga iya.

6Apang sa lalaki nga mga anak sang iya mga babayi naghatag si Abraham sing mga dolot, kag sang nagakabuhi pa sia ginpadala niya sila malayo kay Isaac nga iya anak, nayon sa sidlangan sa duta sang sidlangan.

7Amo ini ang mga adlaw sang mga tuig sang kabuhi ni Abraham, isa ka gatus kag kapitoan kag lima ka tuig.

8Nabugto ang ginhawa ni Abraham kag napatay sa maayo nga katigulangon, tigulang na kag busug sang pagkabuhi, kag ginsimpon sa iya katawohan.

9Ginlubung sia ni Isaac kag ni Ismael nga iya mga anak sa lungib sang Macpela, sa latagon ni Efron nga anak ni Zohar nga Hethanon, nga yara sa tampad sang Mamre,

10ang latagon nga ginbakal ni Abraham sa mga Hethanon. Didto ginlubung si Abraham, upud kay Sara nga iya asawa.

11Sang patay na si Abraham ginpakamaayo sang Dios si Isaac nga iya anak. Kag si Isaac nagpuyo sa Beer-lahai-roi.

12Ini sila amo ang mga kaliwatan ni Ismael, anak ni Abraham, nga gin-anak kay Abraham ni Agar nga Egiptohanon, alagad nga babayi ni Sara.

13Ini sila amo ang mga ngalan sang lalaki nga mga anak ni Ismael, sono sa paagisud sang ila pagkatawo: ang panganay ni Ismael, si Nebayot; kag si Cedar, si Adbeel, si Mibsam,

14si Misma, si Duma, si Masa,

15si Hadad, si Tema, si Jetur, si Nafis, kag si Kedema.

16Ini sila amo ang lalaki nga mga anak ni Ismael kag ini amo ang ila mga ngalan, tungud sa ila mga minoro kag sa ila mga dologan, napulog duha ka principe sono sa ila mga kabikahan.

17(Ini amo ang mga tuig sang kabuhi ni Ismael, isa ka gatus kag katloan kag pito ka tuig; nabugto ang iya ginhawa kag napatay, kag ginsimpon sa iya kahimataan.)

18Nagpuyo sila kutub sa Havila tubtub sa Sur, nga yara sa tampad sang Egipto sa nagapakadto ka sa Asiria; nagpuyo sia sa atubang sang tanan niya nga utud.

19Ini sila amo ang mga kaliwatan ni Isaac, anak ni Abraham: Si Abraham amay ni Isaac,

20kag si Isaac kap-atan ka tuig sang pagpangasawa niya kay Rebeca, babayi nga anak ni Betuel nga Sirianhon sang Padan-aram, utud ni Laban nga Sirianhon.

21Kag nagpangamuyo si Isaac sa Ginoo tungud sang iya asawa, bangud nga baw-as sia; kag ang Ginoo nagtugut sang iya pangamuyo, kag nagpanamkon si Rebeca nga iya asawa.

22Ang mga bata naghublag sa sulud niya; kag nagsiling sia, “Kon amo ini, ngaa bala nga buhi ako?” Gani nagkadto sia sa pagpakiana sa Ginoo.

23Kag ang Ginoo nagsiling sa iya, “Duha ka pungsud sa imo tiyan, kag duha ka katawohan, matawo sa imo, nga bahinon; ang isa magabakud pa sa isa, ang magulang magaalagad sa kamanghuran.”

24Sang pagkatuman sang iya mga adlaw sa pag-anak, yari karon, may kapid sa iya tiyan.

25Ang nahauna nga naggowa mapula, ang bug-os niya nga lawas subong sang panapton nga bulbulan; gani ginhingalanan nila sia Esau.

26Sang olihi naggowa ang iya utud nga lalaki, kag nagakapyot ang iya kamut sa tikod ni Esau; gani ginhingalanan sia Jacob. Si Isaac kan-uman ka tuig sang pag-anak ni Rebeca sa ila.

27Sang nagtubo ang kabataan, si Esau sampaton nga mangangayam, tawo sang latagon, samtang si Jacob tawo nga maligdong, nga nagapuyo sa mga layanglayang.

28Ginhigugma ni Isaac si Esau, bangud nga nagkaon sia sang iya pinangayaman; apang ginhigugma ni Rebeca si Jacob.

29Sang si Jacob nagluto sing linaga, si Esau nag-abut gikan sa latagon, kag gutum sia.

30Kag si Esau nagsiling kay Jacob, “Pakaona ako sinang mapula nga linaga, kay gutum ako!” (Busa ginhingalanan sia Edom.)

31Si Jacob nagsiling, “Ibaligya anay sa akon ang imo pagkapanganay.”

32Si Esau nagsiling, “Tagumatayon ako; ano bala ang kapuslanan sa akon sang pagkapanganay?”

33Si Jacob nagsiling, “Sumpa ka anay sa akon.” Gani nagsumpa sia sa iya, kag ginbaligya kay Jacob ang iya pagkapanganay.

34Niyan ginhatagan ni Jacob si Esau sing tinapay kag linaga nga mga lentejas, kag nagkaon sia kag nag-inum, kag nagtindug kag naglakat sia. Sa amo gintamay ni Esau ang iya pagkapanganay.

← Chapter 24 Jump to: Chapter 26 →