Genesis 33

Ilonggo (Ang Biblia (1982))

← Chapter 32 Jump to: Chapter 34 →

1Kag ginbayaw ni Jacob ang iya mga mata kag naglantaw, kag yari karon, si Esau nagapakari, kag upud sa iya apat ka gatus ka tawo. Gani ginbahinbahin niya ang kabataan kay Lea kag kay Raquel kag sa duha ka alagad nga babayi.

2Kag ginbutang niya ang mga alagad nga babayi kag ang ila kabataan sa una, niyan madason si Lea kag ang iya kabataan, kag si Raquel kag si Jose sa olihi gid.

3Sia iya nag-una sa ila, nga nagayaub sa duta sing makapito, tubtub nga naglapit sia sa iya utud.

4Apang si Esau nagdalagan sa pagsugata sa iya, kag ginhakus sia, kag nagkupo sa iya liog kag ginhalukan sia, kag naghibi sila.

5Kag sang ginbayaw ni Esau ang iya mga mata kag nakita niya ang mga babayi kag ang kabataan, nagsiling sia, “Sin-o bala ini sila nga kaupud mo?” Si Jacob nagsiling, “Ang kabataan nga ginhatag sing mainayohon sang Dios sa imo alagad.”

6Niyan nagpalapit ang mga alagad nga babayi, sila kag ang ila kabataan, kag nagyaub sila;

7si Lea man kag ang iya kabataan nagpalapit kag nagyaub sila; kag sang olihi nagpalapit si Jose kag si Raquel, kag nagyaub sila.

8Si Esau nagsiling, “Ano bala ang kahologan sini tanan nga hut-ong nga nasugata ko?” Si Jacob nagsabat, “Sa pagpahamuut sa itololok sang akon ginoo.”

9Apang nagsiling si Esau, “Tuman na ako sang akon, utud ko; mangin-imo ang imo.”

10Nagsiling si Jacob, “Indi, ginaampo ko sa imo, kon nakapahamuut ako karon sa imo itololok, niyan batona ang akon dolot sa akon kamut; kay sa pagkamatuud ang pagtan-aw sa imo nawung kaangay sa pagtan-aw sa nawung sang Dios, nga sa among kahamuut ginbaton mo ako.

11Batona, ginaampo ko sa imo, ang akon dolot nga ginadala sa imo, bangud nga ang Dios nagmainayohon sa akon, kag bangud nga may tuman ako nga akon.” Sa amo ginpilit niya sia, kag ginbaton niya ini.

12Niyan si Esau nagsiling, “Magpadayon kita kag maglakat kita, kag ako magauna sa imo.”

13Apang si Jacob nagsiling sa iya, “Ang akon ginoo nakahibalo nga ang kabataan linghud pa, kag nga ang mga panong kag ang kabakahan upud sa akon may mga tinday; kag kon patam-an sila sing lakat sa isa ka adlaw, magakalamatay ang tanan nga panong.

14Mag-una ang akon ginoo sa iya alagad, kag ako magalakat sing hinayhinay, sono sa tikang sang kahayupan nga nagauna sa akon kag sono sa tikang sang kabataan, tubtub nga mag-abut ako sa akon ginoo sa Seir.”

15Gani si Esau nagsiling, “Pabilina sa imo ang pila ka tawo nga nagaupud sa akon.” Apang sia nagsiling, “Ano bala ang kinahanglan sini? Magmahamut-an ako sa itololok sang akon ginoo.”

16Gani si Esau nagbalik sadtong adlaw sa iya dalanon pa Seir.

17Apang si Jacob nagkadto sa Sucot, kag nagpatindug sang iya balay, kag naghimo sing mga payagpayag nga sa iya kahayupan; busa ginhingalanan yadtong duug Sucot.

18Kag si Jacob nag-abut nga may paghidait sa banwa sang Siquem, nga yara sa duta sang Canaan, sang paghalin niya sa Padan-aram; kag nagpahamtang sia sing layanglayang sa tampad sang banwa.

19Kag ginbakal niya ang puna sang duta, diin ginhumlad niya ang iya layanglayang, sa kamut sang mga anak ni Hamor, amay ni Siquem, sing isa ka gatus ka bilog nga pilak.

20Nagpatindug sia didto sing halaran kag ginhingalanan ini El-Elohe-Israel.

← Chapter 32 Jump to: Chapter 34 →