Genesis 38

Ilonggo (Ang Biblia (1982))

← Chapter 37 Jump to: Chapter 39 →

1Nahanabu sa sadtong tion nga si Juda nagdulhog halin sa iya mga utud, kag naghapit sa isa ka Adulamnon, nga ang iya ngalan si Hira.

2Nakita didto ni Juda ang babayi nga anak sang isa ka Canaanhon nga ang iya ngalan si Sua; ginkuha niya sia kag naghiusa sa iya,

3kag nagpanamkon sia kag nag-anak sing lalaki, kag ginhingalanan niya sia Er.

4Nagpanamkon sia liwat kag nag-anak sing lalaki, kag ginhingalanan niya sia Onan.

5Apang nag-anak pa sia liwat sing lalaki, kag ginhingalanan sia Sela. Didto sia sa Kezib, sang pag-anak niya sa iya.

6Kag ginpaasaw-an ni Juda si Er nga iya panganay, kag ang ngalan sang babayi si Tamar.

7Apang si Er, panganay ni Juda, malaut sa itololok sang Ginoo; kag pinatay sia sang Ginoo.

8Niyan si Juda nagsiling kay Onan, “Hiusa ka sa asawa sang imo utud, kag himoa sa iya ang katungdanan sang utud sang bana, kag bangon ka sing kaliwat sa imo utud.”

9Apang nahibaloan ni Onan nga ang kaliwat indi mangin-iya; gani sang naghiusa sia sa asawa sang iya utud ginpaawas niya ang binhi sa duta, agud nga indi sia makahatag sing kaliwat sa iya utud.

10Kag ang ginhimo niya malaut sa itololok sang Ginoo, kag ginpatay man niya sia.

11Niyan si Juda nagsiling kay Tamar nga iya umagad, “Pabilin ka nga balo sa balay sang imo amay, tubtub nga magdaku si Sela nga akon anak”—kay nahadluk sia nga si Sela mapatay kaangay sa iya mga utud. Gani naglakat si Tamar kag nagpuyo sa balay sang iya amay.

12Sa pag-alagisud sang tion ang babaying anak ni Sua, ang asawa ni Juda, napatay; kag sang si Juda ginlipay, nagtaklad sia pakadto sa mga manug-alot sang iya mga carnero sa Timna, sia kag ang iya abyan nga si Hira nga Adulamnon.

13Kag sang ginsugid kay Tamar, “Ang imo ugangan nagataklad sa Timna sa pag-alot sang iya mga carnero,”

14gin-uba niya ang iya panapton sa pagkabalo, kag nagpanabon sang iya takurong, nga nagapangunup sia, kag naglingkod sa gawang sang Enaim, nga yara sa higad sang dalan pa Timna; kay nakita niya nga nagdaku na si Sela, kag sia wala pag-ipaasawa sa iya.

15Sang nakita sia ni Juda, ginhunahuna niya nga babaying makihilawason sia, kay gintabonan niya ang iya nawung.

16Naghapit sia sa iya sa higad sang dalan, kag nagsiling, “Kari ka, pahiusaha ako sa imo,” kay wala sia makahibalo nga sia umagad niya. Nagsiling sia, “Ano bala ang ihatag mo sa akon, agud nga makahiusa ka sa akon?”

17Nagsabat sia, “Padalhan ko ikaw sing tinday sang mga kanding gikan sa panong.” Kag nagsiling sia, “Mahatagan mo bala ako sing kalig-onan, tubtub nga mapadala mo ini?”

18Nagsiling sia, “Ano bala nga kalig-onan ang ihatag ko sa imo?” Nagsabat sia, “Ang imo singsing nga inugpat-in kag ang imo wagkus, kag ang imo sungkud nga yara sa imo kamut.” Gani ginhatag niya sila sa iya, kag naghiusa sa iya, kag nagpanamkon sia paagi sa iya.

19Niyan nagtindug sia kag nagtaliwan, kag sang nahukas niya ang iya takurong ginsuklub ang mga panapton sang iya pagkabalo.

20Sang ginpadul-ong ni Juda ang tinday sang mga kanding paagi sa iya abyan nga Adulamnon, sa pagbawi sang kaligonan gikan sa kamut sang babayi, wala niya makita sia.

21Kag nagpamangkot sia sa mga tawo sa duug, “Diin bala ang babaying makihilawason sa Enaim sa higad sang dalan?” Kag nagsiling sila, “Wala diri sing babaying makihilawason.”

22Gani nagbalik sia kay Juda, kag nagsiling, “Wala ko sia makita; kag ang mga tawo man sang duug nagsiling, ‘Wala sing babaying makihilawason diri.’”

23Kag si Juda nagsabat, “Ihatag ini sila sa iya, basi mahuy-an kita; yari karon, ginpadul-ong ko ining tinday, kag wala mo makita sia.”

24Sang nagligad ang tatlo ka bulan ginsugid kay Juda, “Si Tamar nga imo umagad nagpakamakihilawason; kag labut pa nagabusong sia tungud sa pagkamahilawason.” Kag si Juda nagsiling, “Dalha ninyo sia, kag sonogon sia.”

25Sang nadala sia, ginpakadtoan niya ang iya ugangan, “Paagi sa lalaki nga tag-iya sini, nagabusong ako.” Kag nagsiling sia, “Kilalaha, ginaampo ko sa imo, kon kay sin-o ini sila, ang singsing nga inugpat-in kag ang wagkus kag ang sungkud.”

26Niyan nakilala sila ni Juda, kag nagsiling, “Labi pa katarung sia sa akon, sanglit nga wala ko sia ginhatag kay Sela nga akon anak.” Kag wala na gid sia maghiusa sa iya.

27Sang tion nga ginasakitan sia, may kapid sa iya tiyan.

28Kag sang ginsakitan sia, naggowa ang kamut sang isa; kag ginkaptan sang partera kag ginhigtan niya ang kamut sing nahot nga escarlata, nga nagasiling, “Ini naggowa sing una.”

29Apang sang pagbutong niya sang iya kamut, yari karon, ang iya utud nga lalaki naggowa; kag ang partera nagsiling, “Daw ano nga pagbulho ang imo!” Busa ginhingalanan sia Perez.

30Sang olihi naggowa ang iya utud nga lalaki nga may nahot nga escarlata sa iya kamut; kag ginhingalanan sia Zera.

← Chapter 37 Jump to: Chapter 39 →