Genesis 49

Ilonggo (Ang Biblia (1982))

← Chapter 48 Jump to: Chapter 50 →

1Niyan gintawag ni Jacob ang iya mga anak, kag nagsiling, “Tilipon kamo, agud nga masugid ko sa inyo ang mahanabu sa inyo sa olihi nga mga adlaw.

2Tilipon kamo kag pamati, O mga lalaking anak ni Jacob, kag dungga ninyo si Israel nga inyo amay.

3Ruben, ikaw amo ang akon panganay, ang akon kusug, kag pamuno sang akon kabakud, labaw sa bugal kag labaw sa gahum.

4Mabalhinon subong sang tubig, indi ikaw manginlabaw bangud nga nagsaka ka sa katre sang imo amay; niyan gindagtaan mo ini—ikaw nagsaka sa akon higdaan!

5Si Simeon kag si Levi mag-utud; ang ila mga espada mga hinganiban sang pagpanlugus.

6O kalag ko, indi magsulud sa ila himbon; sa ila pagtilipon, O himaya ko, indi ka magsimpon; kay sa ila kaakig nagapatay sila sing tawo, kag sa ila pagpatuyang ginkitinan nila ang baka.

7Pinakamalaut ang ila kaakig, kay mabangis; kag ang ila kasingkal, kay mapintas! Bahinbahinon ko sila sa kay Jacob kag paaplaagon sila sa Israel.

8Juda, dayawon ka sang imo mga utud; ang imo kamut manginsa liog sang imo mga kaaway; ang mga anak sang imo amay magayaub sa imo.

9Totoy nga leon si Juda; sa tulukbon, anak ko, nagtukhayaw ka. Nagkuub sia, nagluko sia subong sang leon, kag subong sang leon nga babayi; sin-o ang magapukaw sa iya?

10Ang cetro indi mahamulag kay Juda, ukon ang sungkud sang manuggahum gikan sa tunga sang iya mga tiil, tubtub nga mag-abut ang Silo; kag ang pagkamasinolondon sang mga katawohan manginsa iya.

11Nga nagalawig sang iya tinday sa balagon kag sang tinday sang iya asno sa pinili nga balagon, ginabunakan niya sa alak ang iya mga panapton kag sa dugo sang mga uvas ang iya kunup;

12ang iya mga mata magapula tungud sa alak, kag ang iya mga ngipon magaputi tungud sa gatas.

13Si Zabulon magapuyo sa mga dungkaan sang dagat; mangindungkaan sang mga sakayan, kag ang iya dulunan manginsa Sidon.

14Si Isacar asno nga mabakud, nga nagaluko sa tunga sang mga toril sang carnero;

15nakita niya nga maayo ang palahuwayan, kag nga ang duta kalahamut-an; gani gintaya niya ang iya abaga nga sa pagdala, kag nangin-ulipon sa palangabudlayan.

16Si Dan magahukom sang iya katawohan, subong nga isa sang mga kabikahan sang Israel.

17Si Dan mangin man-ug sa dalanon, man-ug nga dalitan sa banas, nga nagakagat sa mga tikod sang kabayo sa bagay nga nagatingkaya ang iya manugkabayo.

18Ginahulat ko ang imo kaluwasan, O Ginoo.

19Si Gad damhagan sang kasoldadosan, apang sia magadamhag sa ila tikod.

20Ang kalan-on ni Aser mangintambok, kag sia magapatubas sing manamit nga mga kalan-on nga harianon.

21Si Neftali usa nga babayi nga nabuhian, nga nagahatag sing mga tinday nga maayo.

22Si Jose sanga nga mabungahon, sanga nga mabungahon sa luyo sang tuburan; ang iya mga sanga nagalakbay sa kuta.

23Ang mga manugpana nagsakit sa iya sing tama, nagpana sa iya, kag naghingabut sa iya;

24apang ang iya pana nagdayon sa kusug, ang iya mga butkon ginpaabtik tungud sa mga kamut sang Makagagahum ni Jacob (sa ngalan sang Manugpahalab, ang Igang sang Israel),

25paagi sa Dios sang imo amay nga magabulig sa imo, paagi sa Makaako nga magapakamaayo sa imo sa mga pagpakamaayo sang langit sa ibabaw, mga pagpakamaayo sang kadadalman nga nagaluko sa idalum, mga pagpakamaayo sang mga dughan kag sang tiyan.

26Ang mga pagpakamaayo sang imo amay naglabaw sa mga pagpakamaayo sang mga nag-anak sa akon, tubtub sa kaukbongan sang kabakoloran nga dayon; manginsa olo sila ni Jose, kag sa agtang niya nga napain gikan sa iya mga utud.

27Si Benjamin lobo nga nagapanukub, sa aga magahalunhon sia sang tulukbon, kag sa kahaponon magabahinbahin sia sang inagaw.”

28Ini tanan amo ang napulog duha ka kabikahan ni Israel; kag ini amo ang ginsiling sa ila sang ila amay sang nagpakamaayo sia sa ila, nga nagapakamaayo sa tagsatagsa sang pagpakamaayo nga sono sa iya.

29Niyan nagtulin sia sa ila, kag nagsiling sa ila, “Ako igasimpon sa akon katawohan; ilubung ako upud sa akon mga ginikanan sa lungib nga yara sa latagon ni Efron nga Hethanon,

30sa lungib nga yara sa latagon sang Macpela, sa nasidlangan sang Mamre, sa duta sang Canaan, nga ginbakal ni Abraham upud sa latagon kay Efron nga Hethanon nga kaugalingon nga lulubngan.

31Didto ginlubung nila si Abraham kag si Sara nga iya asawa; didto ginlubung nila si Isaac kag si Rebeca nga iya asawa; kag didto ginlubung ko si Lea—

32ang latagon kag ang lungib nga yara sa iya ginbakal sa mga Hethanon.”

33Sang pagkatapus ni Jacob sa pagtulin sa iya mga anak, ginhugpong niya ang iya mga tiil sa higdaan, kag nabugto ang iya ginhawa, kag ginsimpon sa iya katawohan.

← Chapter 48 Jump to: Chapter 50 →