Genesis 19

Ilonggo (Ang Biblia (1982))

← Chapter 18 Jump to: Chapter 20 →

1Ang duha ka manugtunda nag-abut sa Sodoma sa kahaponon; kag si Lot nagalingkod sa gawang sang Sodoma. Sang nakita sila ni Lot, nagtindug sia sa pag-abiabi sa ila, kag nagyaub sia sa duta,

2kag nagsiling, “Mga ginoo nakon, ginaampo ko sa inyo, hapit kamo sa balay sang inyo alagad kag magpabilin sa bug-os nga gab-i, kag hinawi ang inyo mga tiil; niyan bangon kamo sing aga pa kag magpadayon sa inyo dalanon.” Nagsiling sila, “Indi; kondi magapabilin kami sa dalan sa bug-os nga gab-i.”

3Apang ginpilit gid niya sila; gani naghapit sila sa iya kag nagsulud sa iya balay; kag ginhiwatan niya sila sing tabad, kag nagbibingka sing tinapay nga wala sing tapay, kag nagkaon sila.

4Apang sa wala pa sila maghigda, ang mga tawo sang banwa, ang mga tawo sang Sodoma, tingub ang pamatan-on kag tigulang, ang bug-os nga katawohan gikan sa tagsa ka duug, nagkibon sang balay palibut;

5kag gintawag nila si Lot, “Diin bala ang mga lalaki nga nag-abut sa imo sining gab-i? Pagowaa sila sa amon, agud nga maghiusa kami sa ila.”

6Si Lot naggowa sa ganhaan sa mga lalaki, gintakpan ang ganhaan sa nalikod niya,

7kag nagsiling, “Ginaampo ko sa inyo, mga utud ko, dili kamo maghimo sing subong kalaut.

8Yari karon, may duha ako ka anak nga babayi nga wala makakilala sing lalaki; tuguti ako nga pagowaon ko sila sa inyo, kag himoa ninyo sa ila ang inyo ginapakamaayo; lamang sa sining mga lalaki indi kamo maghimo sing bisan ano, kay nagpasilong sila sa landong sang akon atop.”

9Apang nagsiling sila, “Halin dira!” Kag nagsiling sila, “Nagkari ining tawo sa pagpanlugayaw, kag buut sia manginhukom! Karon himoan ikaw namon sing malain pa sang sa ila.” Niyan gindagusoan nila ang tawo nga si Lot, kag nagpalapit sa pagbingkal sang ganhaan.

10Apang ang mga lalaki nagdawhat sang ila mga kamut kag ginpasulud si Lot upud sa ila, kag gintakpan ang ganhaan.

11Kag ginbulag nila ang mga tawo nga yara sa ganhaan sang balay, kutub sa magamay tubtub sa dalagku, sa bagay nga ginbudlayan sila sa pagpangita sang ganhaan.

12Niyan ang mga lalaki nagsiling kay Lot, “May iban ka pa bala diri? Mga umagad nga lalaki, mga anak nga lalaki, mga anak nga babayi, ukon bisan sin-o nga imo sa banwa, pagowaa sila gikan sa duug;

13kay laglagon na namon ining duug, bangud nga ang pagsinggit batok sa iya katawohan daku sa atubangan sang Ginoo, kag ginpadala kami sang Ginoo sa paglaglag sini.”

14Gani naggowa si Lot kag nagsiling sa iya mga umagad, nga magapangasawa sa iya mga anak nga babayi, “Tindug kamo, gowa gikan sining duug; kay laglagon na sang Ginoo ang banwa.” Apang sa iya mga umagad nga lalaki daw sa nagalahog sia.

15Sang pagpamanagbanag, ginpadalidali sang mga manugtunda si Lot, nga nagasiling, “Tindug ka, kuhaa ang imo asawa kag ang imo duha ka anak nga babayi nga yari diri, basi maupus ka sa silot sang banwa.”

16Apang nagdologdolog sia; gani gin-uyatan sang mga lalaki sia kag ang iya asawa kag ang iya duha ka anak nga babayi sa kamut, kay nalooy ang Ginoo sa iya, kag gindala nila sia kag ginbutang sia sa gowa sang banwa.

17Kag sang napagowa nila sila, nagsiling sila. “Palagyo tungud sang inyo kabuhi; dili magbalikid sa likod ukon magpabilin sa bisan diin sa kapatagan; palagyo sa kabakoloran, basi maupus kamo.”

18Kag si Lot nagsiling sa ila, “O, indi, mga ginoo ko;

19yari karon, nakapahamuut ang imo alagad sa imo itololok, kag ginpakita mo sa akon ang imo daku nga pagkalolo sa pagluwas sang kabuhi ko; apang indi ako makapalagyo sa kabakoloran, basi lambuton ako sang malaut, kag mapatay ako.

20Yari karon, yadtong banwa malapit nga palagyohan, kag diotay sia. Papalagyoha ako didto—indi bala yadto diotay?—kag maluwas ang akon kabuhi!”

21Nagsiling sia sa iya, “Yari karon, nabaton ko ikaw nahanungud man sining butang, nga indi ko paglaglagon ang banwa nga ginpamolong mo.

22Dalidali ka, palagyo didto; kay wala ako sing mahimo tubtub nga makalambut ka didto.” Busa ginhingalanan ang banwa Zoar.

23Ang adlaw nagsubang sa ibabaw sang duta sang nag-abut si Lot sa Zoar.

24Niyan ginpaulan sang Ginoo sa Sodoma kag sa Gomorra ang azufre kag kalayo gikan sa Ginoo gikan sa langit;

25kag ginlaglag niya yadtong kabanwaanan, kag ang bug-os nga kapatagan, kag ang tanan nga pumuluyo sang kabanwaanan, kag ang nagtubo sa duta.

26Apang ang asawa ni Lot sa olihi niya nagbalikid, kag nanginhaligi sia nga asin.

27Kag nagbangon sing aga pa si Abraham pakadto sa duug diin sia nagtindug sa atubangan sang Ginoo;

28kag naglantaw sia nayon sa Sodoma kag Gomorra kag nayon sa bug-os nga duta sang kapatagan, kag nakakita, kag yari karon, ang aso sang duta nagtob-ok subong sang aso sang horno.

29Gani nahanabu, sang ginlaglag sang Dios ang kabanwaanan sang kapatagan, nga ang Dios nagdumdum kay Abraham, kag ginpagowa si Lot gikan sa tunga sang kalaglagan, sang paglaglag niya sang kabanwaanan nga ginpuy-an ni Lot.

30Karon si Lot nagtaklad gikan sa Zoar, kag nagpuyo sa kabakoloran upud ang iya duha ka anak nga babayi, kay nahadluk sia magpuyo sa Zoar; gani nagpuyo sia sa isa ka lungib upud ang iya duha ka anak nga babayi.

31Kag ang magulang nagsiling sa manghud, “Ang aton amay tigulang na, kag wala sing tawo sa duta nga maghiusa sa aton sono sa kinaugali sang bug-os nga duta.

32Kari, paimnon naton sing alak ang aton amay, kag maghulid kita sa iya, agud nga makatipig kita paagi sa aton amay sing kaliwat.”

33Gani ginpainum nila sing alak ang ila amay sadtong gab-i; kag nagsulud ang magulang, kag naghulid sa iya amay; sia wala makahibalo sang paghigda niya, ukon sang pagbangon niya.

34Kag sa adlaw nga masonod, nagsiling ang magulang sa manghud, “Yari karon, ako naghulid kagab-i upud sa akon amay; paimnon naton sia sining gab-i man; niyan sulud ka kag maghulid sa iya, agud nga makatipig kita paagi sa aton amay sing kaliwat.”

35Gani ginpainum nila sing alak ang ila amay sadtong gab-i man; kag nagtindug ang manghud, kag naghulid sa iya; kag wala sia makahibalo sang paghigda niya ukon sang pagbangon niya.

36Sa amo nga bagay ang duha ka babayi nga anak ni Lot nagdala tungud sa ila amay.

37Ang magulang nag-anak sing lalaki, kag ginhingalanan sia Moab; sia among amay sang mga Moabnon tubtub karon nga adlaw.

38Ang manghud man nag-anak sing lalaki, kag ginhingalanan sia Ben-ammi; sia among amay sang mga Ammonhon tubtub karon nga adlaw.

← Chapter 18 Jump to: Chapter 20 →