Genesis 22

Ilonggo (Ang Biblia (1982))

← Chapter 21 Jump to: Chapter 23 →

1Sa tapus sining mga butang ang Dios nagtilaw kay Abraham, kag nagsiling sa iya, “Abraham!” Kag nagsiling sia, “Yari ako.”

2Nagsiling sia, “Kuhaa ang imo anak, ang imo bugtong nga anak si Isaac, nga ginahigugma mo, kag kadto ka sa duta sang Moria, kag ihalad mo sia didto subong nga halad-nga-sinonog sa isa sang mga bukid nga akon isiling sa imo.”

3Gani si Abraham nagbangon sing aga pa, nagsiya sang iya asno, kag nagdala upud sa iya sang duha sang iya mga pamatan-on nga lalaki, kag kay Isaac nga iya anak; kag nagbis-ak sia sang gatong sa halad-nga-sinonog, kag nagtindug kag nagkadto sa duug nga ginsiling sa iya sang Dios.

4Sa ikatlong adlaw ginbayaw ni Abraham ang iya mga mata kag nakita ang duug sa malayo.

5Niyan si Abraham nagsiling sa iya mga pamatan-on, “Pabilin kamo diri kaupud sang asno; ako kag ang bata makadto sa unhan kag masimba kami, kag mabalik sa inyo.”

6Kag si Abraham nagkuha sang gatong sang halad-nga-sinonog, kag ginpapas-an ini kay Isaac nga iya anak; kag gindala niya ang kalayo kag ang sundang. Gani naglakat sila nga duha.

7Kag si Isaac nagsiling kay Abraham nga iya amay, “Amay ko!” Kag si Abraham nagsiling, “Yari ako, anak ko.” Si Isaac nagsiling, “Yari karon, ang kalayo kag ang gatong; apang diin bala ang cordero sa halad-nga-sinonog?”

8Si Abraham nagsiling, “Ang Dios iya magaaman sang cordero sa halad-nga-sinonog, anak ko.” Gani nagpadayon sila nga duha sa paglakat.

9Sang nag-abut sila sa duug nga ginsiling sa iya sang Dios, si Abraham nagpatindug didto sang halaran, kag ginbangdaybangday niya ang gatong, kag gingapus si Isaac nga iya anak, kag gintungtung sia sa halaran, sa gatong.

10Niyan gin-untay ni Abraham ang iya kamut, kag ginkuha ang sundang sa pagpatay sang iya anak.

11Apang ang manugtunda sang Ginoo nagtawag sa iya gikan sa langit, kag nagsiling, “Abraham, Abraham!” Kag nagsiling sia, “Yari ako.”

12Nagsiling sia, “Dili pagpatup-i sang imo kamut ang bata ukon pag-anha sia; kay karon nakilala ko nga ikaw nagakahadluk sa Dios, sa ginatan-aw nga wala mo pag-idumili sa akon ang imo anak nga bugtong.”

13Kag ginbayaw ni Abraham ang iya mga mata kag nagtolok, kag, yari karon, sa iya likod isa ka cordero nga lalaki, napukot sa mga sungay sa kasiotan; kag nagkadto si Abraham kag ginkuha ang carnero nga lalaki, kag ginhalad sia nga halad-nga-sinonog sa baylo sang iya anak.

14Gani ginhingalanan ni Abraham yadtong duug Ang Ginoo magatigana; subong sang ginasiling tubtub karon nga adlaw, “Sa bukid sang Ginoo may itigana.”

15Kag ang manugtunda sang Ginoo nagtawag kay Abraham sa ikaduhang tion gikan sa langit,

16kag nagsiling, “Sa akon kaugalingon nagsumpa ako, nagasiling ang Ginoo, bangud nga naghimo ka sining butang, kag wala mo pag-idumili ang imo anak, ang imo bugtong nga anak,

17sa pagkamatuud pakamaayohon ko ikaw, kag pabuaron ko ang imo mga kaliwatan subong sang kabitoonan sang langit kag subong sang balas nga yara sa baybayon sang dagat. Kag ang imo mga kaliwatan magatag-iya sang gawang sang ila mga kaaway,

18kag sa imo mga kaliwatan pakamaayohon ang tanan nga pungsud sang duta, bangud nagtuman ka sa akon tingug.”

19Gani nagbalik si Abraham sa iya mga pamatan-on nga lalaki, kag nagtindug sila kag nagkadto sing tingub sa Beer-seba; kag si Abraham nagpuyo sa Beer-seba.

20Karon sa tapus sining mga butang ginsugid kay Abraham, “Yari karon, si Milca man nag-anak kay Nahor nga imo utud:

21si Uz nga iya panganay, si Buz nga iya utud nga lalaki, si Kemuel nga amay ni Aram,

22si Kesed, si Hazo, si Pildas, si Jidlaf, kag si Betuel.”

23Si Betuel amay ni Rebeca. Ini sila nga walo gin-anak ni Milca kay Nahor, utud nga lalaki ni Abraham.

24Labut pa, ang iya babayi, nga ginhingalanan si Reuma, nag-anak man kay Teba, kay Gaham, kay Taas, kag kay Maaca.

← Chapter 21 Jump to: Chapter 23 →