Genesis 43

Ilonggo (Ang Biblia (1982))

← Chapter 42 Jump to: Chapter 44 →

1Karon ang tiggulutum matama sa duta.

2Kag sang naorot nila kaon ang uyas nga nadala nila gikan sa Egipto, nagsiling sa ila ang ila amay, “Balik liwat, dalawat kamo sa aton sing diotay nga kalan-on.”

3Apang si Juda nagsiling sa iya, “Ang lalaki nagpaandam sa amon sing maligdong, nga nagasiling, ‘Indi kamo makakita sang akon nawung, kon wala ang inyo utud upud sa inyo.’

4Kon ipadala mo ang amon utud upud sa amon, magadulhog kami kag magadalawat sa imo sing kalan-on;

5apang kon indi mo pag-ipadala sia, indi kami magdulhog, kay ang lalaki nagsiling sa amon, ‘Indi kamo makakita sang akon nawung, kon wala ang inyo utud upud sa inyo.’”

6Si Israel nagsiling, “Ngaa bala nga ginhimoan ninyo ako sing amo nga kalainan sa pagsugid sa lalaki nga may utud pa kamo?”

7Nagsabat sila, “Ang lalaki nagpamangkot sing masusihon nahanungud sa aton kag sa aton kahimataan, nga nagasiling, ‘Buhi pa bala ang inyo amay? May utud pa kamo?’ Ang amon ginsugid sa iya among sabat sa sining mga pamangkot; makahibalo bala kami nga mas-a nga magsiling sia, ‘Dalha padulhog ang inyo utud nga lalaki’?”

8Kag si Juda nagsiling kay Israel nga iya amay, “Ipadala ang pamatan-on upud sa akon, kag magatindug kami kag magalakat, agud nga mabuhi kita kag indi mapatay, tingub kami kag ikaw kag ang amon mga magamay man.

9Ako manginkalig-onan nga sa iya; kinahanglanon mo sia sa akon kamut. Kon indi ko sia mauli sa imo kag mabutang sia sa atubangan mo, niyan paantusa ako sang kabasulanan sing dayon;

10kay kon wala kami maglantang, karon nakabalik na kami kuntani sing makaduha.”

11Niyan si Israel nga ila amay nagsiling sa ila, “Kon amo ini, niyan himoa ninyo ini: dala kamo sang pinili nga mga bunga sang duta sa inyo mga suludlan, kag dalhi ninyo ang lalaki sing dolot, diotay nga ihalaplas kag diotay nga dugus, pahumut, mirra, mga nuez, kag mga almendra.

12Dala kamo sing pilo nga cuarta; dalha ninyo liwat ang cuarta nga gin-uli sa baba sang inyo mga sako; ayhan basi naligaan.

13Dalha man ang inyo utud, kag tindug, balik kamo sa lalaki;

14ang Makaako nga Dios magkalooy sa inyo sa atubangan sang lalaki, agud nga buhian niya ang inyo isa ka utud kag si Benjamin. Kon mawalaan ako sang akon kabataan, mawalaan ako.”

15Gani nagdala ang mga lalaki sadtong dolot, kag nagdala sila sing pilo nga cuarta, kag kay Benjamin; kag nagtindug kag nagdulhog sa Egipto, kag nag-atubang sila kay Jose.

16Sang nakita ni Jose si Benjamin upud sa ila, nagsiling sia sa tulugyanan sang iya balay, “Dalha sa balay ang mga lalaki, kag ihawi kag maghanda, kay ang mga lalaki magapaniaga upud sa akon.”

17Ginhimo sang lalaki sono sa ginsogo ni Jose, kag gindala ang mga tawo sa balay ni Jose.

18Kag ginhadlukan ang mga tawo bangud nga gindala sila sa balay ni Jose, kag nagsiling sila, “Bangud sang cuarta nga gin-uli sa aton mga sako sang una ginpasulud kita, agud nga makakita sia sing sil-an sa aton kag magdamhag sa aton, sa pagdakup sa aton subong nga mga ulipon kag sa aton mga asno.”

19Gani nagpalapit sila sa tulugyanan sang balay ni Jose, kag nagpamolong sa iya sa ganhaan sang balay,

20kag nagsiling, “O, ginoo ko, nagdulhog kami sang una sa pagbakal sing kalan-on;

21kag sang pag-abut namon sa dalayonan ginhubaran namon ang amon mga sako, ang cuarta sang tagsa ka tawo yara sa baba sang iya sako, ang amon cuarta sa bug-os nga timbang; gani gindala namon liwat,

22kag nagdala man kami sing iban nga cuarta sa amon kamut sa pagbakal sing kalan-on. Wala kami makahibalo kon sin-o ang nagbutang sang amon cuarta sa amon mga sako.”

23Nagsiling sia, “Ang paghidait sa inyo, dili kamo magkahadluk; ang inyo Dios kag ang Dios sang inyo amay naghatag sa inyo sing bahandi sa inyo mga sako; ang inyo cuarta yari sa akon.” Niyan ginpagowa niya sa ila si Simeon.

24Kag sang nadala sang lalaki ang mga tawo sa balay ni Jose, kag nahatagan sila sing tubig, kag nakapanghinaw sila sang ila mga tiil, kag sang nahatagan niya ang ila mga asno sing kompay,

25gin-aman nila ang dolot sa wala pa mag-abut si Jose sa odto, kay nabatian nila nga magakalaon sila didto.

26Sang nagpauli si Jose sa balay, gindala nila sa iya ang dolot nga yara sa ila sa sulud sang balay, kag nagyaub sila sa iya sa duta.

27Kag nagpamangkot sia sa ila kon maanoano sila, kag nagsiling “Maayo bala ang inyo amay, ang tigulang nga ginpamolong ninyo? Buhi pa bala sia?”

28Nagsiling sila, “Ang imo alagad nga amon amay maayo, buhi pa sia.” Kag nagduko sila kag nagyaub.

29Kag ginbayaw niya ang iya mga mata, kag nakita si Benjamin nga iya utud, anak sang iya iloy, kag nagsiling, “Amo ini bala ang inyo utud, nga ginpamolong ninyo sa akon? Ang Dios magkalooy sa imo, anak ko.”

30Niyan nagdalidali si Jose, kay ginhidlaw ang iya tagiposoon tungud sa iya utud, kag nagpangita sia kon diin mahibi. Kag nagsulud sia sa iya hulut, kag naghibi didto.

31Niyan ginhilam-osan niya ang iya nawung kag naggowa; kag sa nagapugung sang iya kaugalingon sia nagsiling, “Butang kamo sing pagkaon.”

32Nagbutang sila sing pahain nga sa iya, kag pahain nga sa ila, kag pahain nga sa mga Egiptohanon nga nagkaon upud sa iya, bangud nga ang mga Egiptohanon indi magkaon upud sa mga Hebreo, kay kangil-aran ini sa mga Egiptohanon.

33Kag naglingkod sila sa atubang niya, ang magulang sono sa iya pagkapanganay kag ang kamanghuran sono sa iya pagkamanghud; kag ang mga tawo natingala sa isa kag isa.

34Ang mga pahat gindala sa ila gikan sa latok ni Jose, apang ang pahat ni Benjamin lima ka pilo sang bisan kay sin-o sa ila. Gani nag-inum sila, kag nagkasadya upud sa iya.

← Chapter 42 Jump to: Chapter 44 →