Genesis 39

Ilonggo (Ang Biblia (1982))

← Chapter 38 Jump to: Chapter 40 →

1Karon si Jose gindala padulhog sa Egipto, kag ginbakal sia ni Potifar, manugdumala ni Faraon, ang pangolo sang mga bantay, nga Egiptohanon, sa kamut sang mga Ismaelnon nga nagdala sa iya didto.

2Ang Ginoo nag-upud kay Jose, kag mauswagon sia nga tawo; kag yara sia sa balay sang iya agalon nga Egiptohanon,

3kag nakita sang iya agalon nga ang Ginoo upud sa iya, kag nga ang tanan nga ginahimo niya ginpauswag sang Ginoo sa iya kamut.

4Gani si Jose nagpahamuut sa iya itololok kag nag-alagad sa iya, kag ginhimo niya sia nga manugtatap sang iya balay kag gintugyan niya sa iya kamut ang tanan nga iya.

5Kutub sang tion nga ginhimo niya sia nga manugtatap sang iya balay kag sang tanan nga iya, ginpakamaayo sang Ginoo ang panimalay sang Egiptohanon tungud kay Jose; ang pagpakamaayo sang Ginoo yara sa tanan nga iya, sa balay kag sa latagon.

6Gani ginbilin niya ang tanan nga iya sa kamut ni Jose; kag wala sia sing kabalaka sa bisan ano luwas sang tinapay nga ginkaon niya. Karon si Jose magayon kag maambong.

7Kag sa tapus sining tion ang asawa sang iya agalon nagpalanat sang iya mga mata kay Jose, kag nagsiling, “Hulid ka sa akon.”

8Apang nagdumili sia kag nagsiling sa asawa sang iya agalon, “Yari karon, ang akon agalon wala sing kabalaka sa bisan ano sa balay, kag ginbutang niya sa akon kamut ang tanan nga iya;

9indi sia labi pa kadaku sa akon sa sining balay; kag wala sia sing bisan anong butang nga gindumili sa akon kondi ikaw, bangud nga ikaw asawa niya; paano bala niyan nga makahimo ako sining daku nga pagkamalaut, kag magpakasala batok sa Dios?”

10Kag bisan nagpamolong sia kay Jose sa adlawadlaw, wala niya sia pagpamatii, sa paghulid sa iya, ukon sa pag-upud sa iya.

11Apang sa isa ka adlaw, sang nagsulud sia sa balay sa paghimo sang iya hilikuton kag wala gid sing bisan sin-o sang mga tawo sa sulud sang balay,

12ginbuyotan niya sia sa iya bayo, nga nagasiling, “Hulid ka sa akon.” Apang ginbayaan niya ang iya bayo sa iya kamut, kag nagpalagyo kag naggowa sia.

13Kag sang nakita niya nga nabilin ang iya panapton sa iya kamut, kag nagpalagyo sa gowa,

14gintawag sang babayi ang mga tawo sang iya balay kag nagsiling sa ila, “Tan-awa, gindalhan niya kita diri sing Hebreo sa pagpakahuya sa aton; nagsulud sia sa paghulid sa akon, kag nagsinggit ako sa mabaskug nga tingug;

15kag sang nabatian niya nga ako nagbayaw sang akon tingug kag nagsinggit, ginbayaan niya sa luyo nakon ang iya bayo, kag nagpalagyo kag naggowa sia.”

16Niyan ginbutang niya sa iya luyo ang bayo tubtub nga nagpauli ang iya agalon,

17kag nagpamolong sia sa iya sono sa sining mga polong, nga nagasiling, “Ang alagad nga Hebreo nga gindala mo sa aton, nagsulud sa pagpakahuya sa akon;

18apang sang nagbayaw ako sang akon tingug kag nagsinggit, ginbayaan niya ang iya panapton sa luyo nakon, kag nalagyo pa gowa.”

19Sang pagkabati sang iya agalon sang mga polong sang iya asawa nga ginpamolong sa iya, “Sa sining bagay naghimo sa akon ang imo alagad,” nagdabdab ang iya kasingkal.

20Kag ginkuha sang iya agalon si Jose kag ginsulud sia sa bilanggoan, ang duug diin nagapus ang mga binilanggo sang hari, kag didto sia sa bilanggoan.

21Apang ang Ginoo kaupud kay Jose kag nagpakita sing malig-on nga paghigugma sa iya, kag nagpahamuut sa iya sa itololok sang manugbantay sang bilanggoan.

22Kag ang manugbantay sang bilanggoan nagtugyan sa kamut ni Jose sang tanan nga mga binilanggo nga yadto sa bilanggoan; kag ang bisan anong ginhimo didto, sia amo ang manughimo sini;

23wala nagatatap ang manugbantay sang bilanggoan sang bisan anong butang nga yara sa kamut ni Jose bangud nga ang Ginoo kaupud niya; kag ang bisan ano nga iya ginhimo, ang Ginoo nagpauswag sini.

← Chapter 38 Jump to: Chapter 40 →