Genesis 18

Ilonggo (Ang Biblia (1982))

← Chapter 17 Jump to: Chapter 19 →

1Kag ang Ginoo nagpahayag sa iya sa luyo sang mga terebinto ni Mamre, sang nagalingkod sia sa ganhaan sang iya layanglayang sa kainit sang adlaw.

2Ginbayaw niya ang iya mga mata kag nagtolok, kag yari karon, ang tatlo ka lalaki nagtindug sa atubang niya. Sang nakita niya sila, nagdalagan sia gikan sa ganhaan sang layanglayang sa pagbaton sa ila, kag nagyaub sia sa duta,

3kag nagsiling, “ Ginoo ko, kon karon nakapahamuut ako sa imo itololok, indi pagligari ang imo alagad.

4Ipakuha karon ang diotay nga tubig, kag hinawi ninyo ang inyo mga tiil, kag pahuway kamo sa idalum sang kahoy,

5samtang nagakuha ako sing isa ka hungit nga tinapay, agud malig-on ninyo ang inyo tagiposoon, kag sa tapus sina magpadayon kamo—sanglit nga nag-abut kamo sa inyo alagad.” Gani nagsiling sila, “Buhata ang sono sa ginsiling mo.”

6Kag si Abraham nagdalidali sa pagsulud sa layanglayang kay Sara, kag nagsiling, “Amana sing madali ang tatlo ka sukub nga harina, masaha, kag maghimo sing mga kalan-onon.”

7Kag si Abraham nagdalagan sa kabakahan, kag nagkuha sing isa ka tinday sang baka, linghod kag maayo, kag ginhatag ini sa alagad, nga nagdalidali sa pag-aman sini.

8Niyan nagkuha sia sang latab sang gatas, kag gatas, kag sang tinday nga baka nga naaman niya, kag ginbutang ini sa atubangan nila; kag nagtindug sia sa luyo nila sa idalum sang kahoy samtang nga nagakaon sila.

9Nagsiling sila sa iya, “Diin bala si Sara nga imo asawa?” Kag nagsiling sia, “Yara sa sulud sang layanglayang.”

10Nagsiling sia, “Sa pagkamatuud magabalik ako sa imo sa pagsapul sang panag-on, kag si Sara nga imo asawa magaanak sing lalaki.” Kag si Sara nakabati sa ganhaan sang layanglayang nga yara sa likod niya.

11Karon si Abraham kag si Sara tigulang na, sobol sa panuigon; kay Sara nag-untat na ang kinaugali sang mga babayi.

12Gani si Sara nagkadlaw sa iya kaugalingon, nga nagasiling, “Sa tapus nga nagtigulang na ako, magakalipay bala ako, nga ang akon ginoo tigulang na man?”

13Ang Ginoo nagsiling kay Abraham, “Ngaa bala nagkadlaw si Sara, nga nagasiling, ‘Magaanak bala sa pagkamatuud ako, nga karon ako tigulang na?’

14May butang bala nga tama kaiwat sa Ginoo? Sa pat-ud nga panag-on magabalik ako sa imo, sa pagsapul sang panag-on, kag si Sara magaanak sing lalaki.”

15Apang si Sara nagpanghiwala, nga nagasiling, “Wala ako magkadlaw”; kay hinadlukan sia. Nagsiling sia, “Indi, kondi nagkadlaw ka.”

16Niyan ang mga lalaki nagtindug gikan didto, kag naglantaw nayon sa Sodoma; kag si Abraham nag-upud sa ila sa pagdol-ong sa ila sa ila dalanon.

17Ang Ginoo nagsiling, “Likman ko bala si Abraham sang akon ginahimo,

18sa ginatan-aw nga si Abraham mangindaku kag gamhanan nga pungsud, kag paagi sa iya pakamaayohon ang tanan nga mga pungsud sang duta?

19Indi, kay nakilala ko sia, nga sogoon niya ang iya kabataan kag ang iya panimalay sa olihi niya agud nga bantayan nila ang dalanon sang Ginoo sa paghimo sing pagkamatarung kag katarungan; agud nga madala sang Ginoo kay Abraham ang iya ginsaad sa iya.”

20Niyan ang Ginoo nagsiling, “Bangud nga ang pagsinggit batok sa Sodoma kag Gomorra daku kag ang sala nila mabug-at sing tama,

21magakunsad ako kag tan-awon kon nahimo nila sing bug-os sono sa singgit nga nag-abut sa akon; kag kon wala, mahibaloan ko.”

22Gani nagtaliwan didto ang mga lalaki, kag nagpadulong sa Sodoma; apang si Abraham nagtindug pa sa atubangan sang Ginoo.

23Niyan nagpalapit si Abraham, kag nagsiling, “Papason mo bala ang matarung upud sa malauton?

24Pananglit may kalim-an ka matarung sa sulud sang banwa; papason mo bala kag indi pagpaiwayon ang duug tungud sa kalim-an ka matarung nga yara sa sulud niya?

25Magmalayo sa imo ang paghimo sing subong sini, sa pagpatay sang matarung upud sa malauton, sa bagay nga ang matarung manginsubong sang malauton! Magmalayo sa imo ina! Indi bala maghimo sing matarung ang Hukom sang bug-os nga duta?”

26Kag ang Ginoo nagsiling, “Kon may makita ako sa Sodoma nga kalim-an ka matarung sa sulud sang banwa, niyan paiwayon ko ang bug-os nga duug tungud sa ila.”

27Si Abraham nagsabat, “Yari karon, nangahas ako sa paghambal sa Ginoo, ako nga yab-ok kag abo lamang.

28Pananglit ang kalim-an ka matarung makulangan sing lima? Laglagon mo bala ang bug-os nga banwa tungud sa kulang nga lima?” Kag nagsiling sia, “Indi ko paglaglagon ini kon may kap-atan kag lima.”

29Sa liwat si Abraham nagpamolong sa iya, kag nagsiling, “Pananglit may makita didto nga kap-atan.” Nagsabat sia, “Indi ko paghimoon ini tungud sang kap-atan.”

30Niyan nagsiling sia, “O indi maakig ang akon Ginoo, kag magahambal ako. Pananglit may makita didto nga katloan.” Nagsabat sia, “Indi ko paghimoon ini, kon didto makita ko ang katloan.”

31Nagsiling sia, “Yari karon, nangahas ako sa paghambal sa Ginoo. Pananglit may makita didto nga duha ka pulo.” Nagsabat sia, “Indi ko paglaglagon ini tungud sang duha ka pulo.”

32Niyan nagsiling sia, “O indi maakig ang Ginoo, kag magahambal ako sing makaisa na lang. Pananglit makita didto ang napulo.” Nagsabat sia, “Indi ko paglaglagon ini tungud sang napulo.”

33Kag ang Ginoo nagpadayon sa iya dalanon, sang nakatapus sia pagpakighambal kay Abraham; kag si Abraham nagpauli sa iya duug.

← Chapter 17 Jump to: Chapter 19 →