Numbers 10

Ilonggo (Ang Biblia (1982))

← Chapter 9 Jump to: Chapter 11 →

1Ang Ginoo nagpamolong kay Moises,

2“Himo ka sing duha ka budyong nga pilak; salsalon mo sila; kag gamiton mo sila sa pagtawag sang katilingban, kag sa pagpanlakatan sang mga dologan.

3Kag kon patonggon nila sila, ang bug-os nga katilingban magtipon sa ila kaugalingon sa imo sa ganhaan sang layanglayang nga tiliponan.

4Apang kon patonggon nila ang isa lamang, niyan ang mga principe, ang mga pangolo sang linibo sang Israel, magtipon sa ila kaugalingon sa imo.

5Kon magpatonog kamo sing paandam, ang mga dologan nga nahamtang sa kilid nga nasidlangan maglakat.

6Kag kon magpatonog kamo sing paandam sa ikaduha, ang mga dologan nga nahamtang sa kilid nga nabagatnan maglakat. Magpatonog sila sing paandam nga sa ila mga paglakat.

7Apang kon magpatipon sang katilingban, magpatonog kamo, apang dili kamo magpatonog sing paandam.

8Kag ang mga anak ni Aaron, ang mga sacerdote, magpatonog sang mga budyong. Ang mga budyong manginpalatukuran nga dayon sa inyo bug-os nga mga kaliwatan.

9Kag kon sa inyo duta magkadto kamo sa inaway batok sa kasumpung nga nagapigus sa inyo, niyan magpatonog kamo sing paandam sang mga budyong, agud nga dumdumon kamo sa atubangan sang Ginoo nga inyo Dios, kag maluwas kamo sa inyo mga kaaway.

10Sa adlawa man sang inyo kinasadya, kag sa inyo pinat-ud nga piesta, kag sa mga pamuno sang inyo mga bulan, magpatonog kamo sing mga budyong sa ibabaw sang inyo mga halad-nga-sinonog kag sa ibabaw sang inyo mga halad-sa-paghidait; manginhandumanan ninyo sila sa atubangan sang inyo Dios: Ako amo ang Ginoo nga inyo Dios.”

11Sa tuig nga ikaduha, sa bulan nga ikaduha, sa ikaduha ka pulo nga adlaw sang bulan, ang panganud naghayaw sa ibabaw sang layanglayang sang pagpamatuud,

12kag naglakat ang katawohan sang Israel sono sa ila mga panlakatan gikan sa kamingawan sang Sinai; kag nagdolog ang panganud sa kamingawan sang Paran.

13Sa nahauna nagpanlakatan sila sono sa sogo sang Ginoo paagi kay Moises.

14Ang hayahay sang dologan sang mga anak sang Juda naglakat sing una sono sa ila mga kadam-an; kag ang nagdumala sang iya kadam-an amo si Naason nga anak ni Aminadab.

15Kag ang nagdumala sang kadam-an sang kabikahan sang mga anak ni Isacar amo si Natanael nga anak ni Zuar.

16Kag ang nagdumala sang kadam-an sang kabikahan sang mga anak ni Zabulon amo si Eliab nga anak ni Helon.

17Kag sang ginbungkag ang kayangkayang, ang mga anak ni Gerson kag ang mga anak ni Merari, nga nagdala sang kayangkayang, naglakat.

18Kag ang hayahay sang dologan ni Ruben naglakat sono sa ila mga kadam-an; kag ang nagdumala sang iya kadam-an amo si Elisur nga anak ni Sedeur.

19Kag ang nagdumala sang kadam-an sang kabikahan sang mga anak ni Simeon amo si Selumiel nga anak ni Zurisadai.

20Kag ang nagdumala sang kadam-an sang kabikahan sang mga anak ni Gad amo si Eliasaf nga anak ni Deuel.

21Niyan ang mga Coatnon, nga nagadala sang santuario, naglakat, kag ang iban nagpatindug sang kayangkayang nga naghulat sang pag-abut nila.

22Kag ang hayahay sang dologan sang mga anak ni Efraim naglakat sono sa ila mga kadam-an; kag ang nagdumala sang iya kadam-an amo si Elisama nga anak ni Amiud.

23Kag ang nagdumala sang kadam-an sang kabikahan sang mga anak ni Manases amo si Gamaliel nga anak ni Pedazur.

24Kag ang nagdumala sang kadam-an sang kabikahan sang mga anak ni Benjamin amo si Abidan nga anak ni Gedeoni.

25Niyan ang hayahay sang dologan sang mga anak ni Dan, nga naolihi sa tanan nga dologan, naglakat sono sa ila mga kadam-an; kag ang nagdumala sang iya kadam-an amo si Ahiezer nga anak ni Amisadai.

26Kag ang nagdumala sang kabikahan sang mga anak ni Aser amo si Pagiel nga anak ni Ocran.

27Kag ang nagdumala sang kadam-an sang kabikahan sang mga anak ni Neftali amo si Ahira nga anak ni Enan.

28Amo ini ang mga pagpanlakatan sang katawohan sang Israel sono sa ila mga kadam-an, sang naglakat sila.

29Kag si Moises nagsiling kay Hobab ang anak ni Reuel nga Madianhon, ugangan ni Moises, “Nagapanlakatan kami pakadto sa duug nga ginsiling sa ang Ginoo, ‘Ihatag ko ini sa inyo’; upud ka sa amon, kag himoan ka namon sing maayo; kay ang Ginoo nakapamolong sing maayo nahanungud sa Israel.”

30Apang nagsiling sia sa iya, “Indi ako mag-upud; kondi magapauli ako sa akon kaugalingon nga duta kag sa akon himata.”

31Kag si Moises nagsiling, “Ginaampo ko sa imo, dili kami pagbayai, kay ikaw nakahibalo kon paano ang pagpahamtang namon sing dologan sa kamingawan, kag ikaw mangin-amon mga mata.

32Kag kon mag-upud ka sa amon, ang bisan ano nga maayo nga himoon sa amon sang Ginoo, amo ang himoon namon sa imo.”

33Gani naglakat sila gikan sa bukid sang Ginoo sing tatlo ka adlaw nga lalakton; kag ang kaban sang katipan sang Ginoo nag-una sa ila sing tatlo ka adlaw nga lalakton, sa pagpangita sa ila sing duug nga pahuwayan.

34Kag ang panganud sang Ginoo yara sa ibabaw nila sa adlaw, kon maglakat sila gikan sa dologan.

35Kag sang pagtaliwan sang kaban, si Moises nagsiling, “Tindug ka, O Ginoo, kag paaplaaga ang imo mga kaaway; kag papalagyoha gikan sa atubangan mo ang mga nagadumut sa imo.”

36Kag sang nagdolog ini, nagsiling sia, “Balik ka, O Ginoo, sa mga linaksa sang mga linibo sang Israel.”

← Chapter 9 Jump to: Chapter 11 →