Numbers 34

Ilonggo (Ang Biblia (1982))

← Chapter 33 Jump to: Chapter 35 →

1Ang Ginoo nagsiling kay Moises,

2“Sogoa ang katawohan sang Israel, kag isiling sa ila, Kon makasulud kamo sa duta sang Canaan (ini amo ang duta nga maigo sa inyo subong nga panublion, ang duta sang Canaan sono sa mga dulunan niya),

3ang inyo dulunan sa bagatnan kutub sa kamingawan sang Zin sa ubay sang kilid sang Edom, kag ang inyo dulunan nga nabagatnan kutub sa ukbung sang Dagat nga Maasin pa sidlangan;

4kag ang inyo dulunan magaliko pa bagatnan sang taklaran sang Acrabim, kag magapadayon sa Zin, kag magalapus sa bagatnan sang Cades-barnea; niyan magapadayon ini sa Hazar-addar, kag magaubay sa Azmon;

5kag ang dulunan magaliko gikan sa Azmon pakadto sa Sapa sang Egipto, kag magalapus sa Dagat.

6“Nahanungud sa dulunan nga nakatundan, mangin-inyo ang Dakung Dagat kag ang dulunan sini; ini mangin-inyo dulunan nga nakatundan.

7“Ini mangin-inyo dulunan nga naaminhan: kutub sa Dakung Dagat pat-inan ninyo nga sa inyo ang Bukid nga Hor;

8kutub sa Bukid nga Hor pat-inan ninyo tubtub sa salamputan sang Hamat, kag ang dulunan magalapus sa Zedad;

9niyan ang dulunan magapadayon sa Zifron, kag magalapus ini sa Hazar-enan; ini mangin-inyo dulunan nga naaminhan.

10“Pat-inan ninyo ang inyo dulunan nga nasidlangan kutub sa Hazer-enan tubtub sa Sefam;

11kag magadolhog ang dulunan kutub sa Sefam tubtub sa Ribla sa nasidlangan nga kilid sang Ain; kag ang dulunan magadolhog, kag magalambut sa kilid sang dagat sang Cineret pa sidlangan;

12kag ang dulunan magadolhog sa Jordan, kag magalapus sia sa Dagat nga Maasin. Ini mangin-inyo duta sono sa mga dulunan niya palibut.”

13Si Moises nagsogo sa katawohan sang Israel, nga nagasiling, “Ini amo ang duta nga panublion ninyo paagi sa papalad, nga ginsogo sang Ginoo nga ihatag sa siam ka kabikahan kag sa katunga nga kabikahan;

14kay ang kabikahan sang mga anak ni Ruben sono sa ila mga kabaranggayan kag ang kabikahan sang mga anak ni Gad sono sa ila mga kabaranggayan, kag ang katunga sang kabikahan ni Manases nakabaton sang ila panublion;

15ang duha ka kabikahan kag ang katunga nga kabikahan nagbaton sang ila panublion sa tabok sang Jordan sa tampad sang Jerico nayon sa sidlangan, nayon sa bulutlakan.”

16Ang Ginoo nagsiling kay Moises,

17“Ini amo ang mga ngalan sang mga lalaki nga magabahinbahin sang duta sa inyo nga sa panublion: si Eleazar nga sacerdote kag si Josue nga anak ni Nun.

18Magakuha kamo sa tagsa ka kabikahan sing isa ka principe, sa pagbahinbahin sang duta nga panublion.

19Ini amo ang mga ngalan sang mga lalaki: gikan sa kabikahan ni Juda, si Caleb nga anak ni Jefone.

20Gikan sa kabikahan sang mga anak ni Simeon, si Semuel nga anak ni Amiud.

21Gikan sa kabikahan ni Benjamin, si Elidad nga anak ni Cislon.

22Gikan sa kabikahan sang mga anak ni Dan isa ka principe, si Buqui nga anak ni Jogli.

23Gikan sa mga anak ni Jose: gikan sa kabikahan sang mga anak ni Manases isa ka principe, si Haniel nga anak ni Efod.

24Kag gikan sa kabikahan sang mga anak ni Efraim isa ka principe, si Kemuel nga anak ni Siftan.

25Gikan sa kabikahan sang mga anak ni Zabulon isa ka principe, si Elisafan nga anak ni Parnac.

26Gikan sa kabikahan sang mga anak ni Isacar isa ka principe, si Paltiel nga anak ni Azan.

27Kag gikan sa kabikahan sang mga anak ni Aser isa ka principe, si Ahiud nga anak ni Selomi.

28Gikan sa kabikahan sang mga anak ni Neftali isa ka principe, si Pedahel nga anak ni Amiud.

29Ini sila amo ang ginsogo sang Ginoo sa pagbahinbahin sang panublion sa katawohan sang Israel sa duta sang Canaan.”

← Chapter 33 Jump to: Chapter 35 →